ភ្នំពេញ ៖ ដើម្បីថែទាំផ្លូវមិនឲ្យខូចគុណភាពនោះ សម្តេចតេជោនាយករដ្ឋមន្ត្រី បានបញ្ជាក់បន្ថែមជាថ្មីម្តងទៀតថា ប្រតិបត្តិការកាត់ទ្រុងរថយន្តដែលតខុសលក្ខណៈបច្ចេកទេសមិនអាចបញ្ឈប់នោះឡើយ គឺត្រូវតែធ្វើជារៀងរហូត។ សម្តេចតេជោ ក៏បានបញ្ជាឲ្យបិទរាល់យានដ្ឋានទាំងឡាយ ដែលបន្តតទ្រុងរថយន្តខុសលក្ខណៈបច្ចេកទេស។
សម្ពោធដាក់ឲ្យប្រើប្រាស់ជាផ្លូវការកំណាត់ផ្លូវជាតិលេខ១នាព្រឹកថ្ងៃអង្គារ ទី១៣ ខែមីនា ឆ្នាំ២០១៨នេះ សម្តេចតេជោ ហ៊ុន សែន បានបញ្ជាក់យ៉ាងដូច្នេះ “សូមបញ្ជាឲ្យបន្តកាត់ទ្រុងរថយន្តតខុសលក្ខណៈបច្ចេកទេសទាំងអស់ កាត់ហ្នឹងអត់មានថយទេ។
គួរបញ្ជាក់លើកនេះធ្វើឲ្យច្បាស់ជាមួយគ្នាមិនមែនធ្វើម្តងហើយ នាយករដ្ឋមន្ត្រីឈប់និយាយបែរជាឈប់ធ្វើនោះទេ។ ឡានតទ្រុងវាកើតមកពីណា ឥឡូវហ្នឹងដើរបិទឲ្យអស់អាហ្គារ៉ាស់ឡានណាហ៊ានតទ្រុងខុសច្បាប់បិទវាគ្រវាត់ចោល។ ឡានគេផលិតតែប៉ុន្មានម៉ែត្រទេ ឯងមកតទ្រុង បិទអាហ្នឹងគ្រវាត់ចោលទៀត”។
សម្តេចតេជោ ហ៊ុន សែន ក៏បានស្នើសុំរបស់ក្រុមអ្នករកស៊ីដឹកជញ្ជូន ដែលចង់ឲ្យរថយន្តកុងតឺន័រសណ្តោងរ៉ឺម៉ក វែងជាង ១៦ម៉ែត្រ ដោយបានលើកបញ្ហាប្រទេសមួយចំនួនជាឧទាហរណ៍។ ឆ្លើយតបសំណើនេះ សម្តេចតេជោ បានបញ្ជាក់ថា ស្ថានភាពផ្លូវនៅប្រទេសគេផ្សេង ហើយផ្លូវនៅកម្ពុជាផ្សឹង ពោលផ្លូវនៅកម្ពុជាតូច បើមិនកាត់ទេនឹងធ្វើឲ្យពិបាក ក្នុងការបត់ចុះឡើងផងដែរ។
តាមរបាយការណ៍បានបង្ហាញថា គិតត្រឹមខែកុម្ភៈកន្លងទៅនេះ រថយន្ត ៤៥.៦១៣គ្រឿងត្រូវបានត្រួតពិនិត្យ រថយន្ត ៧៩៧គ្រឿង ត្រូវបានកាត់ទ្រុង រថយន្ត ៣៣៩គ្រឿង ត្រូវបានដោះរានខាងក្រោយ រថយន្ត ១៧គ្រឿង ត្រូវបានឃាត់ទុករង់ចាំកាត់ទ្រុង។ ក្នុងនោះរកឃើញអ្នកបើកបរ ១២៨នាក់ គ្មានបណ្ណបើកបរ រថយន្តគ្មានផ្លាកលេខ ៦២គ្រឿង ពាក់ផ្លាកលេខក្លែងក្លាយ ៣គ្រឿង រថយន្តដឹកសំពីងសំពោង ៦២៨គ្រឿង ខ្វះឯកសារ ៣៦២គ្រឿង និងរថយន្តត្រួតពិនិត្យឃើញត្រឹមត្រូវមាន ៤៣.២៧៧គ្រឿង៕ ដោយ ៖ បញ្ញាស័ក្តិ
