ភ្នំពេញ ៖ កម្លាំងជំនាញការិយាល័យប្រឆាំងបទល្មើសព្រហ្មទណ្ឌ អាវុធហត្ថរាជធានីភ្នំពេញសហការជាមួយកម្លាំងអាវុធហត្ថខណ្ឌព្រែកព្នៅ បានបង្ក្រាប និងឃាត់ខ្លួនជនសង្ស័យជាចោរប្លន់ប្រដាប់អាវុធ នៅយប់ថ្ងៃទី ១៣ ខែមីនា ឆ្នាំ ២០១៨ បន្ទាប់ពីពួកចោរទាំង ៦ នាក់ បានធ្វើសកម្មភាពប្លន់នៅទំនប់កប់ស្រូវកាលពីយប់ថ្ងៃទី ៨ ខែមីនា ឆ្នាំ ២០១៨ នៅចំណុចផ្ទះលក់ប្រេង តាមបណ្ដោយផ្លូវទំនប់កប់ស្រូវ ភូមិត្រពាំងពោធិ៍ សង្កាត់គោករកា ខណ្ឌព្រែកព្នៅ។
សូមបញ្ជាក់ថា នៅយប់ថ្ងៃទី ៨ ខែមីនា ឆ្នាំ ២០១៨ កម្លាំងអាវុធហត្ថខណ្ឌព្រែកព្នៅ បានសហការជាមួយកម្លាំងជំនាញ ការិយាល័យប្រឆាំងបទល្មើសព្រហ្មទណ្ឌ អាវុធហត្ថរាជធានីភ្នំពេញ បានបង្ក្រាប និងឃាត់ខ្លួនជនសង្ស័យម្នាក់ ពីបទប្លន់ប្រដាប់អាវុធ។
ការបង្ក្រាបនេះធ្វើឡើងនៅផ្ទះលក់ប្រេង តាមបណ្ដោយផ្លូវទំនប់កប់ស្រូវ ភូមិត្រពាំងពោធិ៍ សង្កាត់គោករកាខណ្ឌព្រែកព្នៅ រាជធានីភ្នំពេញ។ ជនសង្ស័យឈ្មោះ ស៊ុន ខេន ភេទប្រុស អាយុ៣៣ឆ្នាំមុខរបរ កម្មកររោងចក្រ មានស្រុកកំណើតភូមិ សំរោងកណ្តាល សង្កាត់សំរោង ខណ្ឌព្រែកព្នៅ។ បច្ចុប្បន្ន រស់នៅផ្ទះជួលភូមិ ទួលពង្រសង្កាត់ចោមចៅ ខណ្ឌពោធិ៍សែនជយ័ រាជធានីភ្នំពេញ។ ចំណែកជនរងគ្រោះឈ្មោះ ថោង គីរី ភេទប្រុស អាយុ៣៨ឆ្នាំ មុខរបរអាវុធហត្ថ (បន្ទាយឡុងឈិន) និងប្រពន្ធឈ្មោះ សេក ចិន្តា ភេទស្រី អាយុ ៤៥ ឆ្នាំ មុខរបរលក់ប្រេង រស់នៅកន្លែងកើតហេតុភូមិ ត្រពាំងពោធិ៍ សង្កាត់គោករកាខណ្ឌព្រែកព្នៅ រាជធានីភ្នំពេញ។ ការបង្ក្រាបនោះ សមត្ថកិច្ចបានចាប់យក កាំភ្លើងវែងម៉ាក AK ៤៧ ស្វ័យកាត់ ១ ដើម បង់ចំនួន ១ មានគ្រាប់ចំនួន ៨ និងទូរស័ព្ទចំនួន២គ្រឿង៕ ដោយ ៖ បញ្ញាស័ក្តិ