ខេត្តស្វាយរៀង៖ មានការភ្ញាក់ផ្អើលដល់អ្នកភូមិឆោឡោស្រែកហៅគ្នីគ្នាមកជួយជះទឹកពន្លត់ និងរាយការណ៍មកសមត្ថកិច្ចមូលដ្ឋានជួយហៅរថយន្តបាញ់ពន្លត់អគ្គីភ័យ ខណៈដែលផ្ទះលក់ចាបហួយមួយខ្នងត្រូវអគ្គិភ័យឆាបឆេះយ៉ាងសន្ធោសន្ធៅផ្សែងហុយងឹតមេឃដោយសារតែចៅស្រីម្ចាស់ផ្ទះមានការធ្វេសប្រហែស យកដបសាំងចាក់សាំងចូលថង់ក្បែរចង្ក្រានបាយ ដែលកំពុងមានរងើកភ្លើងបណ្ដាលឲ្យកំពប់ឆាបឆេះនិងរងរបួសរលាកជើងដៃតែសំណាងល្អមិនបាត់បង់ជីវិត។
ករណីនេះបានកើតឡើងកាលពីវេលាម៉ោង៦ និង៣០នាទីព្រឹក ថ្ងៃអង្គារ ១២រោច ខែផល្គុន ឆ្នាំ រកា នព្វស័ក ព.ស.២៥៦១ ត្រូវនឹងថ្ងៃទី១៣ ខែមីនា ឆ្នាំ២០១៨ រស់នៅភូមិបែកចាន ឃុំរមាំងថ្កោល ស្រុក ស្វាយទាប ខេត្តស្វាយរៀង ។
បើតាមមន្ត្រីកងរាជអាវុធហត្ថស្រុកបានឲ្យដឹងថា៖ ចំពោះម្ចាស់ផ្ទះរងគ្រោះមានឈ្មោះ នាង សេត ភេទស្រី អាយុ ៦៦ ឆ្នាំ មុខរបរលក់ចាបហួយ រស់នៅភូមិ បែកចាន ឃុំ រមាំងថ្កោល ស្រុកស្វាយទាប ខេត្តស្វាយរៀង ។ហើយចៅស្រីដែលរងរបួសរលាកភ្លើងជើងទាំងសងខាងមានឈ្មោះ អោប ស្រីពេជ្រ អាយុ ១៣ឆ្នាំ និយាយទាំងទឹកភ្នែកថា៖មុនកើតហេតុគាត់បានដាំបាយហូបរាល់ព្រឹក ប៉ុន្តែមានភ្ញៀវមកទិញសាំងទើបគាត់បានហៅចៅស្រី អោប ស្រីពេជ្រ មកចាក់សាំង រំលែកចូលក្នុងថង់ ខណៈនោះ ស្រាប់តែកំពប់ខ្ចាយទៅ និងចង្ក្រានបាយ ដែលកំពុងមានរងើកភ្លើងបណ្ដាលឲ្យឆាបឆេះឡើង បង្កការភ្ញាក់ផ្អើលដល់អ្នកភូមិនាំគ្នាជួយពន្លត់ខ្វែងដៃខ្វែងជើង និងរាយការណ៍មកសមត្ថកិច្ចុមូលដ្ឋានជួយអន្តរាគមន៍ ប៉ុន្តែអកុសលដោយភ្លើងឆេះពេញក្រមុំមិនអាចគ្រប់គ្រងស្ថានការណ៍បាននោះទេ ។ហើយទ្រព្យសម្បត្តិដែលខំរកក្នុងក្រុមគ្រួសារគ្មានសេសសល់អ្វីទៀតទេ ដោយនៅសល់តែអាវខោពាក់ជាប់ខ្លួនប៉ុណ្ណោះស្ទើរមិនជឿ និងភ្នែកតែមួយប៉ប្រិចភ្នែកសោះទ្រព្យសម្បត្តិ ដែលខំសន្សំជាច្រើនឆ្នាំទាំងប៉ុន្មានបានរលាយគ្មានសល់។
ប្រភពព័ត៌មានពីម្ចាស់ផ្ទះបានបន្ត ទៀតថា ៖ ទ្រព្យ សម្បត្តិខូចខាតមាន ម៉ូតូ២គ្រឿង ម៉ាកវ៉េវ, កង់ ២គ្រឿង, ស្រាបៀច្រើនប្រភេទ៦០ កេះ, សាំង២កាន និង ម៉ាស៊ូត២កាន, មាស៧ជី៥ហ៊ុន និងលុយខ្មែរ២លានរៀល,លុយដុល្លារ២០០ដុល្លារ និងគ្រឿងចាប់ហួយមួយចំនួនធំ ។ផ្ទះដែលត្រូវអគ្គិភ័យឆាបឆេះនេះគឺមានទំហំទទឹងប្រវែង ៤ គុណ និងបណ្ដោយ ១២ ម៉ែត្រសង់ធ្វើ អំពីឈើ ជញ្ជាំងស័ង្កសី ដំបូលប្រក់ស័ង្កសីខូចខាតស្ទើរទាំងស្រុង៕ វ៉ៃកូ