ភ្នំពេញ ៖ នាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ អំពាវនាវឲ្យសាធារណជន ប្រជាពលរដ្ឋ ចូលរួមអនុវត្តច្បាប់ និងប្រព្រឹត្តនូវអំពើល្អ ដើម្បីរួមចំណែកក្នុងការអនុវត្តច្បាប់ រក្សាសន្តិសុខ សុវត្ថិភាព សណ្តាប់ធ្នាប់ លុបបំបាត់បាតុភាព អសីលធម៌សង្គម សូមបញ្ឈប់ជាបន្ទាន់ នូវសកម្មភាពការប្រើអំពើហិង្សា ទៅលើអ្នកបើកបរ និងយានយន្ដ ក្នុងករណីគ្រោះថ្នាក់ចរាចរណ៍ ដោយចូលរួមចាប់ឃាត់ និងប្រគល់ជូនសមត្ថកិច្ច ដើម្បីអនុវត្តទៅតាមនីតិវិធីច្បាប់។
បើតាមសេចក្ដីអំពាវនាវនៅថ្ងៃទី១៣ ខែមីនា ឆ្នាំ២០១៨នេះ លោកស្នងការដ្ឋាននគរបាលរាជធានីភ្នំពេញ ក៏បានអំពាវនាវឲ្យពលរដ្ឋចូលរួមគោរពប្រតិបត្តិ អនុវត្តឲ្យបានត្រឹមត្រូវ តាមច្បាប់ស្ដីពីចរាចរណ៍ផ្លូវគោក ច្បាប់ស្ដីពីការប្រើប្រាស់ផ្លូវថ្នល់ និងក្រមព្រហ្មទណ្ឌនៃព្រះរាជាណាចក្រកម្ពុជា ដើម្បីចូលរួមទទួលខុសត្រូវចំពោះអំពើខុសច្បាប់ ដែលខ្លួនបានប្រព្រឹត្ត ក្នុងពេលធ្វើចរាចរណ៍នៅលើដងផ្លូវសាធារណៈ។
លោកជួន សុវណ្ណ បានបញ្ជាក់ថា សកម្មភាពទាំងអស់នេះ បានធ្វើឲ្យប្រាស់ចាកអំពីការអនុវត្ដច្បាប់ ស្ដីពីចរាចរណ៍ផ្លូវគោក និងប្រាសចាកពីសីលធម៌សង្គម ទាំងជនបង្កគ្រោះថ្នាក់ និងជនដែលប្រើអំពើហិង្សារបស់ប្រជាពលរដ្ឋខ្មែរ ដែលមានប្រពៃណីថ្លៃថ្នូរ ក្នុងការគោរពប្រតិបត្តិច្បាប់ និងជាអ្នកកាន់ព្រះពុទ្ធសាសនា។
បើតាមសេចក្តីអំពាវនាវរបស់ស្នងការដ្ឋាននគរបាលរាជធានីភ្នំពេញ ៖ ដោយពិនិត្យឃើញថាក្នុងរយៈពេលថ្មីៗនេះ មានករណីប្រើអំពើហិង្សា ការវាយបំផ្លិចបំផ្លាញទ្រព្យសម្បត្តិ ទៅលើជនបង្កគ្រោះថ្នាក់ចរាចរណ៍ ចំនួន២ករណី ពីសំណាក់បងប្អូនប្រជាពលរដ្ឋ បង្កឲ្យអ្នកបើករថយន្ដចំនួន២នាក់ បានទទួលរងរបួសធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់។
ក្នុងករណីប្រព្រឹត្តល្មើសច្បាប់ ដោយប្រើអំពើហិង្សា និងការបំផ្លិចបំផ្លាញទ្រព្យសម្បត្តិអ្នកដទៃ អាចប្រឈមទៅនឹងការទទួលទោសតាមមាត្រាច្បាប់ ដូចជា៖ ជនណាបើកបរធ្វេសប្រហែសខ្ជីខ្ជាមិនប្រុងប្រយ័ត្ន ឬមិនគោរពបកាតព្វកិច្ច ដែលបទប្បញ្ញត្តិ ស្តីពីចរាចរណ៍ផ្លូវគោល បណ្តាលឲ្យអ្នកដទៃរងរបួស អសមត្ថភាព ស្មើ នឹងមិនលើសពី៨ថ្ងៃ ការរត់គេចពីកន្លែងកើតហេតុក្នុងគោលបំណងគេចវេសពីការទទួលខុសត្រូវ ត្រូវផ្តន្ទាទោសដាក់ពន្ធនាគារពី១ឆ្នាំ ដល់៣ឆ្នាំ និងពិន័យជាប្រាក់ពី៤លានរៀល ដល់១៥លានរៀល ។ មាត្រា៤១០ ៤១១ និង៤១២ នៃក្រមព្រហ្មទណ្ឌ បទធ្វើឲ្យខូចខាតដោយចេតនា មានស្ថានទម្ងន់ទោសត្រូវផ្តន្ទាទោសដាក់ពន្ធនាគារពី៦ខែ ទៅ៥ឆ្នាំ តាមស្ថានទម្ងន់ទោសជាក់ស្តែង។ មាត្រា២១៧ និង២១៨ នៃក្រមព្រហ្មទណ្ឌ អំពើហិង្សាដោយចេតនា ប្រព្រឹត្តលើអ្នកដទៃ ត្រូវផ្តន្ទាទោសដាក់ពន្ធនាគារពី១ឆ្នាំទៅ៥ឆ្នាំ តាមស្ថានទម្ងន់ទោសជាក់ស្តែង។ មាត្រា១៩៩ បទឃាតកម្ម នៃក្រមព្រហ្មទណ្ឌ អំពើសម្លាប់មនុស្សដោយចេតនា ដោយប្រើអាវុធមានស្ថានទម្ងន់ មិនប្រើអាវុធ ស្ថានទម្ងន់ ត្រូវផ្តន្ទាទោសដាក់ពន្ធនាគារ ពី១០ឆ្នាំ ទៅ១៥ឆ្នាំ៕ ដោយ ៖ បញ្ញាស័ក្តិ