លោក Stephen Hawking កំពូលអ្នករូបវិទូដ៏អស្ចារ្យដែលបានលាតត្រដាងពីអាថ៌កំបាំងរបស់ចក្រវាល បានទទួលមរណៈភាពហើយ នៅក្នុងវ័យ ៧៦ ឆ្នាំ។ នេះបើតាមអ្នកនាំពាក្យរបស់ក្រុមគ្រួសារលោក និងត្រូវបានចុះផ្សាយដោយសារព៌តមាន CNN។
លោក Stephen Hawking ត្រូវបានគេចាត់ទុកជាអ្នកវិទ្យាសាស្ត្រអស្ចារ្យបំផុតរបស់ពិភពលោក ដែលនៅរស់រានមានជីវិត។ លោកក៏ជាអ្នកធាតុវិទូ តារាវិទូ គណិតវិទូ និងជាអ្នកនិពន្ធផងដែរ។
លោកស្លាប់ដោយសារតែជំងឺម្យ៉ាងឈ្មោះ (amyotrophic lateral sclerosis) ដែលមានភាពកាចសាហាវក្នុងរយៈពេលប៉ុន្មានឆ្នាំនេះ។ គាត់បានឆ្លងជំងឺនេះនៅក្នុងឆ្នាំ ១៩៦៣ នៅពេលដែលគាត់ទើបតែមានអាយុ ២១ឆ្នាំ ហើយពេទ្យបានប្រាប់ថា គាត់អាចរស់បានតែ ២ទៅ ៣ឆ្នាំទៀតប៉ុណ្ណោះ។
ប៉ុន្តែភាពអច្ឆរិយបានធ្វើឲ្យរូបលោកអាចរស់នៅរហូតដល់សព្វថ្ងៃ។ ដោយសារតែជំងឺនេះ លោកមិនអាចធ្វើចលនាបាន និងអាចអង្កុយតែលើកៅអី។ គាត់អាចកំរើកម្រាមដៃបានតែ ២ ឬ ៣ប៉ុណ្ណោះ ហើយជីវិតរបស់គាត់បានពឹងផ្អែកទាំងស្រុងទៅលើអ្នកដទៃ និងបច្ចេកវិទ្យា សំរាប់ការធ្វើអ្វីៗទាំងអស់ រូមមាន ការងូតទឹក ការស្លៀកពាក់ ការញាំ និងសូម្បីតែការនិយាយ។
“ខ្ញុំព្យាយាមដឹកនាំជីវិតរបស់ខ្ញុំឲ្យនៅធម្មតាដូចដែលអាចធ្វើបាន និងមិនដែលគិតពីសភាពរបស់ខ្ញុំនោះទេ ឬក៏សោកស្តាយចំពោះអ្វីដែលវារារាំងខ្ញុំមិនឲ្យធ្វើអ្វីដែរ។”
“ខ្ញុំពិតជាសំណាងណាស់ដែលសភាពរាងកាយខ្ញុំមានការវិវត្តន៍យ៉ាងយឺតជាងធម្មតា ប៉ុន្តែវាបានបង្ហាញថា យើងគ្រប់គ្នាមិនត្រូវអស់សង្ឃឹមនោះទេ”។ នេះជាអ្វីដែលគាត់បានសរសេរនៅលើគេហទំព័ររបស់លោក៕ សុភ័ក្ត្រ