តុលាការកាលពីថ្ងៃច័ន្ទ បានបញ្ចេញវីដេអូ បង្ហាញឲ្យឃើញស្ត្រីជាភ្ញាក់ងារធ្វើប័ណ្ណធានាម្នាក់ បានធ្វើការបាញ់ប្រហារទៅលើអតិថិជនម្នាក់ កាលពីឆ្នាំមុន ស្ថិតនៅក្នុងការិយាល័យរបស់នាង ។
Chasity Dawn Carey ត្រូវបានចោទប្រកាន់ពីបទឃាតកម្មកំរិតទី១ បន្ទាប់ពីធ្វើសកម្មភាពបាញ់ប្រហារបុរសជាអតិថិជនម្នាក់ ។ កាលពីថ្ងៃសុក្រ ចៅក្រមស្រុក Payne បានដោះលែងស្ត្រីអាយុ ៤២ ឆ្នាំ រូបនេះ ដែលបានប្រព្រឹត្តអំពើបាញ់ប្រហារមនុស្សកាលពីថ្ងៃទី៩ ខែសីហា ឆ្នាំមុន ។
នៅក្នុងខណៈពេលកាត់ក្តី Carey បានផ្តល់សក្ខីកម្មថា នាងបានបាញ់សម្លាប់អតិថិជនម្នាក់ដែលមានឈ្មោះ Brandon James William អាយុ ៣៨ ឆ្នាំ រស់នៅក្នុងទីក្រុង Stillwater ដើម្បីស្វ័យការពារខ្លួនរបស់នាង ។ នាង និងកូនប្រុសអាយុ ១៩ ឆ្នាំ ឈ្មោះ Justin Henserson បានព្យាយាមនាំខ្លួន Williams ដែលបានរួចពីពន្ធនាគារដោយបង់ប្រាក់ធានាចំនួន ៣៥,០០០ ដុល្លារ ត្រឡប់ទៅឃុំខ្លួនវិញនៅពេលនោះ ។
Carey បានបញ្ជាក់ថា Williams បានព្យាយាមច្បាមកាំភ្លើងពីនាង មុនពេលគេចខ្លួនតាមបង្អួចការិយាល័យ ។ នាងនិយាយថា នាងបានវាយ Williams នឹងកាំភ្លើង ហើយបើកការបាញ់ប្រហារ នៅពេលគាត់កំពុងចាកចេញតាមបង្អួច ។ នាងបានបាញ់ Williams នៅត្រង់ខ្នង ។
កូនប្រុសរបស់ Carey បានដំឡើងកាមេរ៉ា GoPro នៅក្នុងការិយាល័យ មុនពេល Williams បានមកដល់នៅថ្ងៃនោះ ៕ ចន្ទី