បន្ទាយមានជ័យ ៖ មន្ត្រីទទួលស្គាល់ថា បងប្អូនមកតវ៉ា ទាមទារពិតជាជនពិការមែន ប៉ុន្តែបងប្អូនមិនមែនជាជាយោធិន នគរបាល កងជីវពលឬពលរដ្ឋពិការដោយសារសង្គ្រាមទាំងអស់ទេ ហើយក៏គ្មានឈ្មោះក្នុងបញ្ជីទទួលស្គាល់ដោយអន្តរក្រសួង គឺក្រសួងការពារជាតិ ក្រសួងសង្គមកិច្ចឬសមាគមអតីតយុទ្ធជនដែរ។
លោក ឃុន វុទ្ធី ប្រធានមន្ទីរសង្គមកិច្ច យុវនិតិសម្បទានិងអតីតយុទ្ធជននិងជាអនុប្រធានអចិន្ត្រៃយ៍សមាគមអតីតយុទ្ធជនខេត្តបន្ទាយមានជ័យប្រាប់ថ្ងៃទី១៣មីនាថា : ” បងប្អូនមកតវ៉ាភាគច្រើនជាជនពិត ជាជនពិការមែន ប៉ុន្តែមិនច្បាស់ថាជាយោធិន នគរបាល ជីវពល ពលរដ្ឋដែលរងគ្រោះក្នុងបុព្វហេតុជាតិមាតុភូមិ ឬពិការក្នុងសម័យសង្គ្រាមឡើយ។ហើយពួកគាត់ក៏មិនទាន់ឃើញមានបញ្ចូលឈ្មោះក្នុងបញ្ជីដែលក្រសួងការពារជាតិនិងរាជរដ្ខាភិបាលទទួលស្គាល់ ហើយត្រូវទទួលគោលរបបគោលនយោបាយឡើយ។
លោកបន្តថា បើមានអតីតយុទ្ធជន នារីខ្លះ ក៏ពួកគាត់ជាទាហានរំសាយផ្តាច់ មិនបានគោលរបបអ្វីទៀតឡើយ។
សូមរំលឹកថា កាលពីព្រឹកថ្ងៃទី ១២ ខែមីនា ជនពិការចំនួន ៦៤ នាក់ ដែលអះអាងថា ស្ថិតក្នុងសមាសភាពសរុប ៥២០ នាក់ នៃ ៩ ស្រុក-ក្រុង ទូទាំងខេត្តបន្ទាយមានជ័យ បានលើកគ្នាមកតវ៉ានៅមុខសាលាខេត្តបន្ទាយមានជ័យសុំអភិបាលជួយអន្តរាគមន៍បញ្ចូលឈ្មោះជាយោជិនពិការដើម្បីបានការឧបត្ថម្ភប្រាក់គោលនយោបាយរាល់ខែដូចសមាជិកអតីតយុទ្ធជន ជនពិការដទៃទៀតដែរ។
លោកចាន់ សុម៉ុល អាយុ៥៣ឆ្នាំ យោធិនពិការជើងម្ខាងម្នាក់រស់នៅភូមិ-ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ប្រាប់សារព័ត៌មានថា ៖ ក្រុមខ្លួនជាអតីតជាជនពិការ ហើយក៏មានជាយោធិន នគរបាល កងជីវពល មន្ត្រីនិងពលរដ្ឋជាជនពិការដោយសារសង្គ្រាមទាំង ៦៤ នាក់ ស្ថិតក្នុងចំណោម ៥២០ នាក់ ។
ពួកខ្លួន មានបំណងតវ៉ាឬសំណូមពរសុំលោកសួន បវរ អភិបាលខេត្តបន្ទាយមានជ័យជួយអន្តរាគមន៍រកដំណោះស្រាយបញ្ចូលឈ្មោះពួកគាត់អោយបានប្រាក់គោលនយោបាយឧបត្ថម្ភរាល់ខែដែរ ដើម្បីបានចិញ្ចឹមជីវភាពដូចយោធិនពិការដទៃទៀត ។
ហើយការលើគ្នាមកនពព្រោះតែល្បីថា អាជ្ញាធរ សមត្ថកិច្ចពាក់ព័ន្ធបានបង្កើតសមាគមអតីតយុទ្ធជន ,សមាគមមនុស្សចាស់,មូលនិធិជួយជនក្រីក្រ…ពោលគឺច្រើនអង្គការ សមាគម ក្លឹប ក្រុមការងារច្រើនក្រុមណាស់ចាំជួយឧបត្ថម្ភ គាំទ្រ ឆ្លើយតប ដោះស្រាយបញ្ហា ទុក្ខកង្វល់ និងជីវភាពមុខសញ្ញាចម្រុះ។
យោង លោកចាន់ សុម៉ុល អោយដឹងថា ៖ ក្រុមជនពិការដែលក្រុមខ្លួនស្រង់នៅទូទាំងខេត្ត មានចំនួន ៥២០ នាក់ ក្នុងនោះមកពីក្រុងសិរីសោភ័ណ ៥៣ នាក់ ស្រុកមង្គលបូរី ២៦ នាក់ ស្រុកអូរជ្រៅ ៦៣ នាក់ ស្រុកព្រះនេត្រព្រះ ២០ នាក់ ស្រុកភ្នំស្រុក ១៣៦ នាក់ ស្រុកស្វាយចេក ១១៦ នាក់ ស្រុកថ្មពួក ៥៧ នាក់ ស្រុកម៉ាឡៃ ១៧ នាក់និងក្រុងប៉ោយប៉ែត ៣២ នាក់។
អ្នកស្រី ពេជ លំអង ប្រធានស្តីទីការិយាល័យនៃទីចាត់ការអន្តរវិស័យសាលាខេត្តបន្ទាយមានជ័យបានចេញមកសម្រកសម្រួល ទទួលលិខិតនិងធ្វើកំណត់ហេតុជូនជនពិការទាំងនេះ ហើយថានឹងដាក់លិខិតនេះជូនលោកអភិបាលខេត្តពិនិត្យ ។
លោក កែវ តារារស្មី នាយកទីចាត់ការអន្តរវិស័យសាលាខេត្តបន្ទាយមានជ័យឲ្យដឹងថ្ងៃទី១៣មីនាថា ៖ បងប្អូនពិតជាជនពិការ ហើយកាលពីឆ្នាំ២០១៧ ពួកគាត៉បានធ្វើលិខិតមកខេត្ត ហើយរដ្ឋបាលខេត្ត បានយោងលិខិតបងប្អូននិងបានធ្វើលិខិតផ្លូវការមួយ ជូនក្រសួងការពារជាតិ ដើម្បីពិនិត្យលទ្ធភាពបញ្ជូលឈ្មោះក្នុងបញ្ជីទទួលគោលរបបឧបត្ថម្ភគោលនយោបាយ។
ប៉ុន្តែបងប្អូនមិនមានលក្ខណ:សម្បត្តិអាចចូលជាអតីតយុទ្ធជនបានទេព្រោះបងប្អូនខ្លះ ជាទាហាន នគរបាលរំសាយ ដែលបើកផ្តាច់គោលរបបអស់ហើយ។
សូមរំលឹកថា ក្នុងសមាសភាពជនពិការដូចនេះ កាលពីឆ្នាំ ២០១៦ យោធិនពិការរំសាយ ២ នាក់ប្តីប្រពន្ធបានស្កាត់ជួបសម្តេចតេជោ ហ៊ុន សែន នាយករដ្ឋមន្ត្រីនៅមណ្ឌលអភិវឌ្ឍន័យោធិនពិការ ៣១៧ តាកែន កោះស្លាស្រុកឈូកខេត្តកំពត។
កាលណោះ ជនពិការនោះមានលក្ខណ:សម្បត្តិអាចបញ្ចូលក្នុងបញ្ជីអតីតយុទ្ធជន ហើយបានគោលរបបឧបត្ថម្ភរហូតមក ។ ឃើញដូច្នេះ ទើបជនពិការនៅខេត្តបន្ទាយមានជ័យលើកគ្នាតវ៉ា ៕ ដោយ ៖ បន្ទាយ
