សៀមរាប ៖ រថយន្តមួយគ្រឿងម៉ាក Lexus RX 330 កំពុងបើកបរ ស្រាប់តែរ៉េចង្កូត ទៅខាងឆ្វេងដៃ ក៏បានបុកម៉ូតូមួយគ្រឿងកំពុង ធ្វើ ដំណើរ ចំហៀងខាងឆ្វេង បណ្ដាលឲ្យអ្នកបើកបរម៉ូតូ និងអ្នករួមដំណើរចំនួន៣នាក់ រងរបួសធ្ងន់ ក្នុងចំណោមនោះមានម្នាក់ ដាច់ជើងខាងឆ្វេងត្រឹមក្រលៀន និងបាក់កំភួនដៃឆ្វេង។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ កើតឡើងនៅវេលាម៉ោង១១:១០នាទី ថ្ងៃទី១៤ ខែមីនានេះ នៅលើដងផ្លូវជាតិលេខ ៦ ចំណុច ចន្លោះបង្គោលគីឡូលេខ៣៥៦-៣៥៧ ស្ថិតក្នុងភូមិគំរូ ឃុំស្រណាល ស្រុកក្រឡាញ់ ខេត្តសៀមរាម។
លោកវរសេនីយឯក ជី បេងជន អធិការនៃអធិការដ្ឋាននគរបាលស្រុកក្រឡាញ់ បានអោយដឹងថា ជនរងគ្រោះ ជិះម៉ូតូមានគ្នាចំនួន ៣ នាក់៖ ទី១ឈ្មោះ ង៉ិក សុថាត់ ភេទប្រុស អាយុ ២០ឆ្នាំ ទីលំនៅ ភូមិ អូរក្រឡាញ់ ឃុំ ក្រឡាញ់ ស្រុក ក្រឡាញ់ ខេត្តសៀមរាប (ដាច់ជើង ខាងឆ្វេងត្រឹមក្រលៀន និងបាក់កំភួនដៃខាងឆ្វេង)។ ទី២ ឈ្មោះ សោម សុជាតិ ភេទ ប្រុស អាយុ ២២ឆ្នាំ ទីលំនៅ ភូមិ អូរក្រឡាញ់ ឃុំ ក្រឡាញ់ ស្រុក ក្រឡាញ់ ខេត្តសៀមរាប (បាក់ភ្លៅខាងឆ្វេង)។ ទី៣ ឈ្មោះ អែម សុផាត ភេទ ប្រុស អាយុ ២១ឆ្នាំ ទី លំនៅ ភូមិ អូរក្រឡាញ់ ឃុំ ក្រឡាញ់ ស្រុក ក្រឡាញ់ ខេត្តសៀមរាប (បាក់ដៃលើកែងដៃខាងឆ្វេង)។ បើកបរម៉ូតូម៉ាក ហុងដាឌ្រីម C100 ពណ៌ក្រហម ស៊េរីឆ្នាំ២០០០ គ្មានស្លាកលេខ។ ចំណែករថយន្តបង្កមានគ្នា ២នាក់៖ ទី១ ឈ្មោះ ឯម ចាន់ថា ភេទ ប្រុស អាយុ ឆ្នាំកំណើត ១២.១១.១៩៦៦ (ម្ចាស់រថយន្ត) ទីលំនៅភូមិរូបគោ សង្កាត់ ព្រៃឆ្លាក់ ក្រុងស្វាយរៀង ខេត្តស្វាយរៀង។ ទី២ ឈ្មោះ ហេង ហៀង ភេទ ប្រុស ឆ្នាំកំណើត ២៦.០៧.១៩៨៩ (អ្នកបើកបររថយន្ត) ទីលំនៅភូមិ ស្ទឹងជ្រៅ សង្កាត់ ដើមមៀន ក្រុង តាខ្មៅ ខេត្ត កណ្តាល។ រថយន្តបង្កម៉ាក Lexus RX 330 ពណ៌ស ពាក់ស្លាកលេខ ភ្នំពេញ 2AA-6607 ។
លោកបានបន្តថា មូលហេតុ នៃគ្រោះថ្នាក់រវាងរថយន្តនិងម៉ូតូ ដែលកំពុងបើកបរបញ្ច្រាសទិសគ្នា ដល់ចំណុចកើតហេតុខាងលើ រថយន្តបង្ករ៉េចង្កូតទៅខាងឆ្វេងដៃ បុកម៉ូតូជនរងគ្រោះ ចំពីចំហៀងខាងឆ្វេង បណ្តាលអោយអ្នកបើកបរម៉ូតូ និងអ្នករួមដំណើរ រង របួសធ្ងន់។ ភ្លាមៗនោះសមត្ថកិច្ចមូលដ្ឋានបានជួយសង្គ្រោះជនរងគ្រោះ បញ្ជូនទៅមន្ទីពេទ្យខេត្តសៀមរាប ចំណែករថយន្តបង្ក និងម៉ូតូ សមត្ថកិច្ចជំនាញ បានយកមករក្សាទុក នៅអធិការនគរបាលស្រុក៕ ដោយ៖បញ្ញាស័ក្តិ