ភ្នំពេញ ៖ នៅរសៀលថ្ងៃទី១៤ ខែមីនា ឆ្នាំ២០១៨ នៅការិយាល័យសិទ្ធិមនុស្សនៃអង្គការសហប្រជាជាតិប្រចាំកម្ពុជា ដែលមានអាសយដ្ឋាន អគារលេខ៤ ផ្លូវ ២៧១ ក្រុម១ភូមិ១សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ អ្នករាយការណ៍ពិសេសអង្គ ការសហប្រជាជាតិទទួលបន្ទុកសិទ្ធិមនុស្សនៅកម្ពុជា លោកស្រី រ៉ូណា ស្មីត បានធ្វើសន្និសីទសារព័ត៌មានមួយ ដើម្បីពិភាក្សាអំពីរបកគំហើញបឋម នៃដំណើរទស្សនកិច្ចរយៈពេល ១០ ថ្ងៃរបស់អ្នកស្រី នៅប្រទេសកម្ពុជា ។
អ្នកចូលរួមប្រហែល៥០នាក់ ក្នុងនោះមានអ្នកកាសែតប្រហែល៤០នាក់ អ្នកកាសែតបរទេសប្រហែល១០នាក់ ។ សន្និសីទកាសែតបានបញ្ចប់ លោកស្រី រ៉ូណា ស្មីត ក៏បានបញ្ចេញនូវសេចក្តីថ្លែងការណ៍បញ្ចប់បេសកកម្មនៅកម្ពុជា ដែលមានចំនួន៦ទំព័រ ដោយលោកស្រីបញ្ជាក់ថា ” ក្នុងកិច្ចប្រជុំផ្លូវការនានារបស់ខ្ញុំ ខ្ញុំបានសម្តែងនូវកង្វល់ចំពោះភាពទូទៅនៃអត្ថាធិប្បាយនានាដែលផ្តោតតែលើអាទិភាពនៃសន្តិសុខ ស្ថេរភាព និងការអភិវឌ្ឍ ជាជាងការអត្ថាធិប្បាយពីសិទ្ធិមនុស្ស។ អាស្រ័យហេតុនេះ ខ្ញុំសូមបញ្ជាក់ជាថ្មីថា សិទ្ធិមនុស្សគឺសំខាន់ចាំបាច់ខ្លាំងណាស់ សម្រាប់សន្តិភាព ស្ថេរភាព និងការអភិវឌ្ឍដ៏ស្ថិតស្ថេរជានិរន្តរ។ សិទ្ធិមនុស្សមិនអាចត្រូវ បានគោរពដោយអន្លើរៗ ឬមើលរំលងនោះទេ ហើយសិទ្ធិមនុស្សក៏មិនត្រូវលះបង់ឡើយ ។ សន្តិភាពដែលខ្វះយុត្តិធម៌ គឺមិនស្ថិតស្ថេរទេ ហើយការអភិវឌ្ឍដែលខ្វះសេរីភាព គឺជាការបោះបង់ប្រជាជនចោល។ ទស្សនវិស័យនេះគឺផ្អែកលើធម្មនុញ្ញសហប្រជាជាតិ និងមាននៅក្នុងរបៀបវារឆ្នាំ២០៣០ ដែលគូសបញ្ជាក់ពីគោលដៅអភិវឌ្ឍន៍ប្រកបដោយចីរភាព។ ទស្សនវិស័យនេះក៏មានឆ្លុះបញ្ចាំងក្នុងរដ្ឋធម្មនុញ្ញរបស់កម្ពុជាដែលចែងថា ប្រទេសកម្ពុជានឹងត្រូវកសាងឲ្យទៅជា កោះសន្តិភាព ដោយផ្អែកលើប្រព័ន្ធប្រជាធិបតេយ្យសេរីពហុបក្ស ធានាសិទ្ធិមនុស្សគោរពច្បាប់ ឲ្យបានឈានឡើងរីកចម្រើនលូតលាស់សំបូររុងរឿង”៕ ដោយ៖បញ្ញាស័ក្តិ