ព្រះវិហារ ៖ មេជួញដូរគ្រឿងញៀនជនជាតិឡាវម្នាក់ទៀត រួមជាមួយថ្នាំញៀនប្រភេទម្ស៉ៅ និងគ្រាប់ប្រមាណ៥គីឡូក្រាម ត្រូវបានកម្លាំងនគរបាល បង្ក្រាបនៅចំណុចព្រំដែន ឈមគ្នារវាងស្រុកឆែប ខេត្តព្រះវិហារ និងស្រុកមឿងខូង ខេត្តចំប៉ាសាក់ ប្រទេសឡាវ នៅរសៀលថ្ងៃទី១៤ ខែមីនា ឆ្នាំ២០១៨នេះ។
លោក យិន បញ្ញារិទ្ធ ប្រធានការិយាល័យ ក៩ នៃមន្ទីរប្រឆាំងគ្រឿងញៀន បានបញ្ជាក់ថា ក្រោមការសម្របសម្រួលពីព្រះរាជអាជ្ញាអមសាលាដំបូងខេត្ត បានចាប់បានមេជួញដូរគ្រឿងញៀនជនជាតិឡាវម្នាក់ទៀតហើយដកហូតថ្នាំញៀន៥គីឡូក្រាម។ ជនល្មើសជនជាតិឡាវ ឈ្មោះ ប៊ី គិនខាន់ចាន់ថា ហៅ ស៊ីយង់ អាយុ៣៤ឆ្នាំ ទីលំនៅភូមិគីឡូលេខ១៤ ស្រុកបាចៀង ក្រុងប៉ាក់សេ ខេត្តចំប៉ាសាក់ ប្រទេសឡាវ ត្រូវបានចាប់ខ្លួននៅចំណុចកំពង់ស្រឡៅ ព្រំដែននៃប្រទេសទាំង២ ក្នុងខេត្តព្រះវិហារ និងខេត្តចំប៉ាសាក់ ដោយដកហូតថ្នាំញៀនមេតំហេ្វតាមីន (គ្រាប់មានអក្សរ WY) ចំនួន១ម៉ឺនគ្រាប់ ស្មើនឹង១គីឡូក្រាម និងមេតំហ្វេតាមីន ICE ទម្ងន់៤គីឡូក្រាម។
មេជួញដូរគ្រឿងញៀន ជនជាតិឡាវរូបនេះ កម្លាំងប្រតិបត្ដិការបានធ្វើការតាមដាន និងស៊ើបអង្កេត អស់រយៈពេល១ខែមកហើយ។ មុនការចាប់ខ្លួនកម្លាំងសមត្ថកិច្ចបានដេក និងពួនស្ទាក់នៅក្នុងព្រៃទាំងយប់ ទាំងថ្ងៃរយៈពេល២-៣ថ្ងៃ។ ក្រោយការចាប់ខ្លួន ជនសង្ស័យបាននិងកំពុងកសាងសំណុំរឿង បញ្ជូនទៅកាន់តុលាការ ដើម្បីចាត់វិធានការតាមផ្លូវច្បាប់៕ ដោយ ៖ បញ្ញាស័ក្តិ