ភ្នំពេញ ៖ ប្រឡាយបង្ហូរទឹកសម្អុយបឹងត្របែកជាប្រឡាយដ៏ធំមួយខ្សែ ដែលមានសារសំខាន់ ក្នុងការរំដោះទឹកចេញពីរាជធានីភ្នំពេញ ហើយប្រឡាយនេះ ត្រូវបានប្រជាពលរដ្ឋ រស់នៅជុំវិញសងខាងមាត់ប្រឡាយយកសំរាមមកបោះចូលទៅក្នុងប្រឡាយ បង្កឲ្យកកស្ទះណែនណាន់តាន់តាប់ដែលធ្វើឲ្យមានបញ្ហាដល់ចរន្តទឹកហូរ ពិសេសប៉ះពាល់ធ្ងន់ធ្ងរដល់បរិស្ថានអនាម័យ និងសោភ័ណភាពទីក្រុងភ្នំពេញផងដែរ ។
មន្ត្រីមូលដ្ឋាននិយាយថា បងប្អូនពលរដ្ឋយើងតែងនាំគ្នាយកសំរាមទៅចោលក្នុងប្រឡាយលូបង្ហូរទឹកនោះជាបន្តបន្ទាប់រហូត បើទោះបីជាអាជ្ញាធរព្យាយាមពន្យល់ណែនាំ យ៉ាងណាក្តី។
ជុំវិញបញ្ហានេះ លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានឡាដឹងនៅព្រឹកថ្ងៃ១៤ មីនានេះថា ដោយមើលឃើញពីបញ្ហាប្រឈមនេះ មន្ទីរសាធារណការនិងដឹកជញ្ជូនរាជធានីភ្នំពេញ ក្រោមការណែនាំពីលោកឃួង ស្រេងអភិបាលរាជធានីភ្នំពេញ បានឲ្យមន្ត្រីជំនាញដាក់គ្រឿងចក្រចុះកាយផងដែរ ដែលមកដល់ពេលនេះ សកម្មភាពនៃការកាយស្តារប្រឡាយខាងលើ បានចំនួនពីរសប្តាហ៍ហើយស្មើនឹង៤០ភាគរយ ដោយរុញសំរាមទាំងអស់ទឹកក្រោម ទើបធ្វើសកម្មភាពកាយនិងកើបយកចេញ ហើយកិច្ចការងារនេះគ្រោងនឹងបញ្ចប់នេះ នៅពីរសប្តាហ៍ទៀត។
លោកដួង ចាន់សារ៉ាត់ ប្រធានលូទឹកបូមទឹកនៃមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យដឹងនៅព្រឹកថ្ងៃទី១៤ខែមីនានេះថា តាមការណែនាំពីប្រធានមន្ទីរ ក្រុមការងាររបស់លោកបានដាក់គ្រឿងចក្រចុះកាយប្រឡាយនេះភ្លាមៗ ។ លោកបន្តថា ការកាយសំរាមនៅប្រឡាយបឹងត្របែកលើផ្លូវ១០៥នេះ ពិតជាមានភាពយឺតយ៉ាវបន្តិច ដោយសារតែផ្លូវមានការកកស្ទះចរាចរនិងមានរោងការនិងរោងបុណ្យ មិនអាចឲ្យគ្រឿងចក្រចូលកាយសំរាមក្នុងប្រឡាយនេះ ។ ប៉ុន្តែទោះបីជាយ៉ាងណាក្តី ប្រធានអង្គភាពអះអាងថា ក្រុមការងារនៃមន្ទីរសាធារណការនិងដឹកជញ្ជូនរាជធានីភ្នំពេញនឹងបញ្ចប់ការងារនេះនៅពីរសប្តាហ៍ទៀត៕ ដោយ៖កូឡាប