ចក្រភពអង់គ្លេសនឹងបណ្តេញអ្នកការទូតរុស្សី ចំនួន ២៣នាក់ ចេញពីប្រទេស ក្រោយពេលអង់គ្លេស បានធ្វើការសន្និដ្ឋានថាប្រទេសរុស្សីគឺជាអ្នកនៅពីក្រោយការប៉ុនប៉ងធ្វើឃាត អតីតអ្នកស៊ើបការណ៍ជនជាតិរុស្សី និងកូនស្រីរបស់គាត់ នៅក្នុងទឹកដីអង់គ្លេស។ នេះបើតាមការចេញផ្សាយរបស់ CNN នៅថ្ងៃព្រហស្បតិ៍នេះ។
នាយករដ្ឋមន្ត្រីអង់គ្លេស Theresa May បាននិយាយថា អ្នកការទូតចំនួន ២៣នាក់ នោះគឺជាមន្ត្រីស៊ើបការណ៏របស់រុស្សី ហើយពួកគេមានពេលត្រឹម ១សប្តាហ៏ប៉ុណ្ណោះដើម្បីចាកចេញ។
អ្នកស្រីថ្លែងដូច្នេះថា “សំរាប់អ្នកដែលព្យាយាមផ្តល់ការគំរាមកំហែងដល់យើង អ្នកឯងមិនត្រូវបានស្វាគមន៏ទៀតទេ”។
ការបណ្តេញអ្នកការទូតរុស្សីចេញនេះ កើតឡើងក្រោយពេលមានការបំពុលអតីតអ្នកស៊ើបការណ៍ជនជាតិរុស្សី (ជាអ្នកស៊ើបការណ៍ឲ្យអង់គ្លេស) ឈ្មោះ Sergei Skripal និងកូនស្រីរបស់លោក Yulia នៅភាគខាងត្បូងទីក្រុង Salisbury កាលពីថ្ងៃទី ៤ ខែមីនា កន្លងទៅ។
លោក Sergei Skripal កំពុងមានសភាពធ្ងន់ធ្ងរនៅក្នុងមន្ទីរពេទ្យ ក្រោយពេលត្រូវបានគេបំពុលដោយសារធាតុគីមី ដែលត្រូវគេស្គាល់ថា Novichok ដែលសារធាតុគីមីនេះត្រូវបានគេផលិតនៅក្នុងប្រទេសរុស្សី។
នាយករដ្ឋមន្ត្រីអង់គ្លេសថ្លែងថា វាទំនងខ្លាំងណាស់ដែលថា ទីក្រុងមូស្កូជាអ្នកនៅពីក្រោយនៃការបំពុលនោះ។
ជុំវិញបញ្ហានេះ ឯកអគ្គរដ្ឋទូតរុស្សីប្រចាំអង់គ្លេសក៏ត្រូវបានគេកោះហៅឲ្យមកធ្វើការពន្យល ថាតើការវាយប្រហារនោះធ្វើឡើងដោយផ្ទាល់ពីអាជ្ញាធររុស្សីឬយ៉ាងណា ឬក៏ទីក្រុងមូស្កូបាត់ការគ្រប់គ្រងលើសារធាតុគីមីនោះ។
អ្នកស្រី Theresa May បានទាមទារឲ្យវិមានគ្រេមឡាំងរបស់រុស្សី ធ្វើការឆ្លើយតបឲ្យបានមុនថ្ងៃអង្គារ ទៅដល់រដ្ឋាភិបាលអង់គ្លេស ប៉ុន្តែទីក្រុងមូស្កូ មិនអើពើទៅនឹងការដាក់កំហិតឲ្យឆ្លើយនោះ៕ សុភ័ក្ត្រ
