សិស្សសាលារាប់ពាន់នាក់ ទូទាំងអាមេរិច បានធ្វើយុទ្ធនាការដើរចេញពីថ្នាក់រៀនរបស់ពួកគេនៅថ្ងៃពុធម្សិលម៉ិញនេះ ដើម្បីទាមទារឲ្យមានច្បាប់គ្រប់គ្រងកាំភ្លើងឲ្យតឹងជាងមុន ក្រោយពេលមានការបាញ់ប្រហារក្នុងសាលា បណ្តាលឲ្យមនុស្សចំនួន ១៧នាក់ស្លាប់នៅក្នុងរដ្ឋ Florida។ នេះបើតាមការចេញផ្សាយរបស់ CNN។
សិស្សសាលាចាប់ផ្តើមចេញពីថ្នាក់រៀន និងបានដើរចំនួន ១៧នាទី ដែល ១៧នាទីនេះតំណាងឲ្យជនរងគ្រោះចំនួន ១៧នាក់ ដែលត្រូវបានគេបានសម្លាប់ នៅក្នុងសាលាវិទ្យាល័យ Marjory Stoneman Douglas កាលពី ១ខែមុន។
សិស្សទូទាំងពិភពលោកក៏បានចាកចេញពីថ្នាក់រៀនរបស់ពួកគេដែរ នៅថ្ងៃពុធម្សិលមិញនេះដើម្បីបង្ហាញពីការសាមគ្គីជាមួយនឹងចលនារបស់សិស្សអាមេរិច។
សូមបញ្ជាក់ថា កាលពីខែមុន មានការបាញ់រះនៅក្នុងបរិវេណសាលា បណ្តាលឲ្យសិស្ស និងគ្រូចំនួន ១៧នាក់ស្លាប់បាត់បង់ជីវិត។ ខ្មាន់កាំភ្លើងដែលត្រូវបានគេចាប់ខ្លួន គឺជាអតីតសិស្សសាលានៅទីនោះដែលត្រូវបានគេបណ្តេញចេញ៕ សុភ័ក្ត្រ