ខេត្តព្រះសីហនុ ៖ ស្នងការនគរបាលខេត្តព្រះសីហនុ បានចុះពិនិត្យរកសារធាតុញៀនទៅកម្មករ ឬបុគ្គលិកធ្វើការងារនៅតាមក្រុមហ៊ុនមួយចំនួននាខេត្តព្រះសីហនុ ក្នុងនោះក៏មានកម្មករបំរើការងារនៅរោងចក្រចម្រាញ់ដូងប្រេង របស់លោកឧកញ៉ា ម៉ុង ប្ញទ្ធី ផងដែរ។ លោកឧត្តមសេនីយ៍ត្រី ស៊ុន សុផាត ស្នងការរង ទទួលផែនប្រឆាំងបទល្មើស នៃស្នងការដ្ឋាននគរបាលខេត្តព្រះសីហនុ បានឲ្យដឹងថា កាលពីថ្ងៃទី១៤ ខែមីនា ឆ្នាំ២០១៨ លោកវរសេនីយ៍ទោសួស សីលា នាយការិយាល័យនគរបាលប្រឆាំងគ្រឿងញៀនខេត្ត ព្រះសីហនុ បានដឹកនាំកម្លាំងនគរបាលប្រឆាំងគ្រឿងញៀន សហការជាមួយ នគរបាលស្រុកព្រៃនប់ ចុះផ្សព្វផ្សាយអប់រំអំពីផលប៉ះពាល់ នៃការប្រើប្រាស់គ្រឿញៀន ចំពោះបុគ្គលិក កម្មករ នៅរោងចក្រចំរាញ់ដូងប្រេង មនោរម្យទី១ និងទី២ នៅតំបន់អន្លង់ក្រពើ ដែលជាចំការដូងប្រេង របស់ លោកឧកញ្ញា ម៉ុង ឫទ្ធី ស្ថិតនៅភូមិមនោរម្យ ឃុំតានៃស្រុកព្រៃនប់ ខេត្តព្រះសីហនុ។
លោកបន្តថា បន្ទាប់ពីបានផ្សព្វផ្សាយច្បាប់គ្រឿងញៀន និងផលប៉ះពាល់ នៃការសេពគ្រឿងញៀនរួចមក កម្លាំងជំនាញ ក៏បានធ្វើតេស្ដទឹកនោម ចំពោះបុគ្គលិកកម្មករចំនួន ៩៦ នាក់ (ប្រុស) ដើម្បីរកមើលអ្នកសេពគ្រឿងញៀន ហើយជាលទ្ធផលបានរកឃើញមានកម្មករប្រុស ៣ នាក់ មានប្រើប្រាស់គ្រឿងញៀន ឬមានសញ្ញាវិជ្ជមាន។ លោក ស៊ុន សុផាត បន្តថា នឹងបន្តចុះអនុវត្តការងាអប់រំពីផលប៉ះពាល់ នៃការប្រើប្រាស់គ្រឿងញៀន និងធ្វើតេស្តរកសារធាតុញៀនដូចគ្នានេះ ទៅលើបុគ្គលិកនៅតាមក្រុមហ៊ុន ឬរោងចក្រផ្សេងៗទៀតនាថ្ងៃខាងមុខទៀត៕ ដែន សីមា