ភ្នំពេញ ៖ បុរសម្នាក់ ត្រូវគេអារកសម្លាប់ឱបជាប់នឹងគល់ឈើ ស្ថិតក្នុងដីឡូដ៍មួយកន្លែង ជិតការដ្ឋានសាងសង់បុរីផ្ទះល្វែង ស្ថិតនៅ ក្នុងភូមិព្រៃស្វាយ សង្កាត់ត្រពាំងក្រសាំង ខណ្ឌពោធិ៍សែនជ័យ។ករណីនេះកើតឡើងទាំងព្រឹកព្រលឹម នៅថ្ងៃទី១៥ ខែមីនា ឆ្នាំ២០១៨នេះ ។ជំហានដំបូងគេសង្ស័យថាជាករណីប្លន់សម្លាប់យកម៉ូតូឬក៏គំនំ។
សមត្ថកិច្ចខណ្ឌពោធិសែនជ័យបានឱ្យដឹងថា៖ជនរងគ្រោះឈ្មោះ ហែម សុជាតិ ហៅវ៉ិត អាយុ២៣ឆ្នាំរស់នៅខេត្តកំពង់ស្ពឺតែទោះបីជាយ៉ាងណាក៏ដោយសមត្ថកិច្ចកំពុងតែស្រាវជ្រាវរកក្រុមគ្រួសារជនរងគ្រោះដើម្បីបញ្ជាក់ថាពិតឬបែបណាសិន។
ចំពោះករណីនេះសមត្ថកិច្ច មិនទាន់បញ្ជាក់ពីមូលហេតុដែលនាំឲ្យមានឃាតកម្មនេះនៅឡើយទេខណៈកំពុងស្រាវជ្រាវស្វែងរកជន ដៃដល់ផងដែរ៕ ដោយ ៖ បញ្ញាស័ក្តិ
