សេតវិមានអាមេរិច បានឲ្យដឹងថា ខ្លួនឈរសាមគ្គីជាមួយសម្ព័ន្ធមិត្តអង់គ្លេស និងគាំទ្រដល់ការសម្រេចចិត្តអង់គ្លេសក្នុងការបណ្តេញអ្នកការទូតរុស្សីចំនួន ២៣នាក់ចេញពីប្រទេស។
ការប្រកាសគាំទ្រអង់គ្លេសបានធ្វើឡើង ក្រោយពេលនាយករដ្ឋមន្ត្រីអង់គ្លេស Theresa May បាននិយាយថា អ្នកការទូតរុស្សីនឹងត្រូវបណ្តេញចេញ ក្រោយពេលទីក្រុងមូស្គូបដិសេធមិនធ្វើការពន្យល់ថា តើសារធាតុគីមីដែលផលិតដោយរុស្សី ត្រូវបានគេប្រើប្រាស់ដោយរបៀបណាដើម្បីបំពុល អតីតអ្នកស៊ើបការណ៍នៅក្នុងប្រទេសអង់គ្លេស។
ទោះយ៉ាងណា ទីក្រុងមូស្គូ មិនបានធ្វើការពន្យលនោះឡើយ និងបានបន្តបដិសេធថា ខ្លួនពាក់ព័ន្ធទៅនឹងការវាយប្រហារដោយសារធាតុគីមីនោះ។
អ្នកនាំពាក្យរបស់ប្រធានាធិបតីអាមេរិច បានចោទប្រកាន់ប្រទេសរុស្សីថា បានគំរាមកំហែងសន្តិសុខប្រទេសនានាក្នុងពិភពលោក។
នៅក្នុងសេចក្តីថ្លែងការណ៍ អ្នកនាំពាក្យរបស់លោក ត្រាំ ឈ្មោះ Sarah Sanders បានថ្លែងដូច្នេះថា សហរដ្ឋអាមេរិចចង់បានឲ្យប្រាកដថា ការវាយប្រហារដោយរបៀបនេះនឹងមិនកើតមានឡើងម្តងទៀតទេ។
អ្នកស្រីចាត់ទុកថា ការបណ្តេញអ្នកការទូតរុស្សីចេញពីប្រទេសគ្រាន់តែជាវិធានការឆ្លើយតបប៉ុណ្ណោះ។
សូមរំលឹកផងដែរថា អតីតអ្នកស៊ើបការណ៏ជនជាតិរុស្សី ដែលធ្វើការឲ្យប្រទេសអង់គ្លេសឈ្មោះ Sergei Skripal និងកូនស្រីឈ្មោះ Yulia ត្រូវបានគេបំពុលដោយសារធាតុគីមី នៅភាគខាងត្បូងទីក្រុង Salisbury កាលពីថ្ងៃទី ៤ ខែមីនា កន្លងទៅ។
បច្ចុប្បន្នអ្នកទាំងពីរកំពុងស្ថិតក្នុងស្ថានភាពធ្ងន់ធ្ងរនៅក្នុងមន្ទីរពេទ្យ៕ សុភ័ក្ត្រ