ភ្នំពេញ ៖ លោករដ្ឋមន្រី្ដក្រសួងការងារ និងបណ្ដុះបណ្ដាលវិជ្ជាជីវៈ បានលើកទឹកចិត្ដដល់វេជ្ជបណ្ឌិតដែលគ្មានការងារធ្វើអាចទាក់ទងទៅពេទ្យការងារ ដើម្បី មានការងារធ្វើនៅតាម រោងកច្រសគ្រាសផ្សេងៗបាន។
លោក អ៊ិត សំហេង រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងនៅក្នុងពិធីប្រគល់សញ្ញបត្រ ថ្នាក់វេជ្ជបណ្ឌិត ជូនដល់និស្សិតសាកលវិទ្យាល័យអន្ដរជាតិ កាលពីព្រឹកថ្ងៃទី១៥ មីនា នៅសាកលវិទ្យាល័យអន្ដរជាតិក្នុងរាជធានីភ្នំពេញថា ក្រោយពីវេជ្ជបណ្ឌិត ដែលជានិស្សិតបានបញ្ចប់ការសិក្សាហើយ ហើយមិនមានការងារធ្វើនោះ ក្រុមគ្រូពេទ្យ គឺអាចទៅទំនាក់ទំនងជាមួយនាយកដ្ឋានពេទ្យការងារនៃក្រសួងការងារបានដែលជាឱកាសល្អសម្រាប់វេជ្ជបណ្ឌិតគ្មានការងារធ្វើក្នុងពេលបច្ចុប្បន្ននេះ ។ លោក រដ្ឋមន្ត្រីបញ្ជាក់ថា និស្សិតដែលរៀនជំនាញជាវេជ្ជបណ្ឌិត គឺជាធនធានមនុស្សផ្នែកសុខភាព ដែលបានរួមចំណែកយ៉ាងសំខាន់ ដល់សង្គមជាតិ ដោយសារបញ្ហាវិស័យខុសភាពនេះ គឺជាវិស័យមួយ ដែលត្រូវទាមទានូវការអភិវឌ្ឍឥតឈប់ឈរ ដើម្បី បំពេញនូវតម្រូវការជូនដល់ប្រជាពលរដ្ឋ និងសង្គមទាំងមូលផងដែរ ។
លោក ឡេង តុង ទីប្រឹក្សាអមក្រសួង និងជាប្រធាននាយកដ្ឋានពេទ្យការងារ នៃក្រសួងការងារ និងបណ្ដុះបណ្ដាវិជ្ជាជីវៈ ក៏បានឲ្យដឹងដែរថា ក្នុងចំណោមសហគ្រាស ក្នុងវាយណៈភ័ណ្ឌ ដែលបានសហការជាមួយក្រសួងការងារ ក្នុងចំណោមជាង១២០០សហគ្រាស ដែលមានគ្រូពេទ្យប្រចាំការ អាចខ្វះចំនួនជាង១២%បន្ថែមទៀត ដែលជាឱកាសសម្រាប់គ្រូពេទ្យ ដែលចេញថ្មីអាចបានការងារធ្វើបាន។ លោកបញ្ជាក់ថា វេជ្ជបណ្ឌិត ដែលមានបំណងចង់ធ្វើការនៅតាមសហគ្រាសនោះ តម្រូវជាវេជ្ជបណ្ឌិត មានការបណ្ដុះបណ្ដាល ស្ដីពីសុខភាព សុវត្ថិភាពការងារជាមុនសិន និងសុំលិខិតការអនុញ្ញាត្ដពីនាយកដ្ឋានការងារដែលមានរយៈពេល២ឆ្នាំឡើងទៅ។
សូមបញ្ជាក់ថា ៖ និស្សិត ដែលទទួលបានសញ្ញាបត្រ ជាវេជ្ជបណ្ឌិតពីសាកលវិទ្យាល័យអន្ដរជាតិមាននាពេលនេះ គឺមានចំនួនជាង៤០០នាក់៕ ដោយ ៖ បញ្ញាស័ក្តិ