កំពង់ឆ្នាំង ៖ លោកឧត្តមសេនីយ៍ត្រី ឡុច វណ្ណារ៉ា ស្នងការនគរបាលខេត្តកំពង់ឆ្នាំង បានធ្វើការក្រើនរំលឹកដល់មន្ត្រីនគរបាលគ្រប់លំដាប់ថ្នាក់ ក្រោមឱវាទរបស់ខ្លួនអោយបង្កើនការយកចិត្តទុកដាក់អោយបានខ្លាំងក្លាបន្ថែមទៀត ក្នុងការរក្សា ការពារ សន្តិសុខសុវត្ថិភាព ជូនប្រជាពលរដ្ឋអោយបានល្អប្រសើរ។
លោកស្នងការបានមានប្រសាសន៍ក្រើនរំលឹកដល់មន្ត្រីនគរបាលបែបនេះ នៅក្នុងឱកាសដែលលោកស្នងការអញ្ជើញចូលរួមក្នុងសន្និបាតបូកសរុបសភាពការណ៍ លទ្ធផលកិច្ចប្រតិការ រក្សាសន្តិសុខ សណ្តាប់ ឆ្នាំ២០១៧ និង លើកទិសដៅការងារ ឆ្នាំ២០១៨ កាលពីថ្ងៃទី១៥ ខែមិនា ឆ្នាំ២០១៨។
លោកឡុច វណ្ណារ៉ា ស្នងការនគរបាលខេត្តកំពង់ឆ្នាំង បានមានប្រសាសន៍ដោយគូសបញ្ជាក់ថា មន្ត្រីនគរបាលគ្រប់លំដាប់ថ្នាក់ត្រូវអប់រំផ្សព្វផ្សាយច្បាប់ដោយសហការជាមួយប្រជាពលរដ្ឋនិងអាជ្ញាធរដែនដីគ្រប់ជាន់ថ្នាក់បង្ការទប់ស្កាត់ឲ្យមានប្រសិទ្ធភាពមុខសញ្ញាបទល្មើសច្បាប់គ្រប់ប្រភេទ ដូចជាបញ្ហាគ្រឿងញៀន ល្បែងស៊ីសង អំពើចោរលួចចោរឆក់ ចោរប្លន់ និង ត្រូវជំរុញការផ្សព្វផ្សាយច្បាប់ និង រឹតបន្តឹងការអនុវត្តច្បាប់ចរាចរណ៍ផ្លូវគោកឲ្យមានប្រសិទ្ធភាព។
លោកអៀរ ប៊ុនធឿន ស្នងការរងនគរបាលខេត្តកំពង់ឆ្នាំង បានអោយដឹងថា នៅក្នុងឆ្នាំ ២០១៧ បទល្មើសជារួមមានការកើតឡើងចំនួន ៣៨ លើក បង្ក្រាបបានចំនួន ៣៥ លើក ឃាត់ខ្លួនជនល្មើសបានចំនួន ៥៤ នាក់។ គ្រោះថ្នាក់ចរាចរណ៍កើតឡើងចំនួន ៨៥ លើក បណ្តាលអោយមនុស្សស្លាប់ចំនួន ៣៣ នាក់ របួសចំនួន ១៧៩ នាក់ ក្នុងនោះធ្ងន់ចំនួន៨០នាក់៕ ដោយ ៖ ចៅ សន
