ភ្នំពេញ ៖ កម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ បានចាប់ខ្លួន បុរសជនជាតិម៉ាឡេស៊ីម្នាក់ ពាក់ព័ន្ធការឆបោកលុយជាង២លានដុល្លារ ពីជនជាតិជប៉ុនចំនួន២៩នាក់ ក្រោមរូបភាពវិនិយោគខ្យល់ នៅខេត្តកំពត និងខេត្តកំពង់ស្ពឺ នៅម៉ោងជាង១១ព្រឹកថ្ងៃទី១៥ខែមីនា ស្ថិតនៅក្នុងភោជនីយដ្ឋានតាយម៉េង ក្នុងរាជធានីភ្នំពេញ។
លោកស្រី ស៊ឺ វណ្ណនី ព្រះរាជអាជ្ញារង សាលាដំបូងរាជធានីភ្នំពេញ បានបញ្ជាក់ថា បុរសជនជាតិម៉ាឡេស៊ី ឈ្មោះ WOO KEE MUN ហៅ WOO CLEMENT អាយុ៤៦ឆ្នាំ ស្នាក់នៅផ្ទះលេខ១២/១១ ផ្លូវ៥៩៨ សង្កាត់ឃ្មួញ ខណ្ឌសែនសុខ រាជធានីភ្នំពេញ។ ជនសង្ស័យត្រូវបានឃាត់ខ្លួនតាមដីកាបង្គាប់ឱ្យចូលខ្លួន លេខ០៨៥ អ.យ.យ ចុះថ្ងៃទី១៥ ខែមីនា ឆ្នាំ២០១៨ របស់លោកស្រី ស៊ឺ វណ្ណនី ព្រះរាជ អាជ្ញារងអមសាលាដំបូងរាជធានីភ្នំពេញ ដោយតម្រូវឱ្យជនសង្ស័យ ចូលបង្ហាញខ្លួននៅអយ្យការអមសាលាដំបូងរាជធានីភ្នំពេញ ឲ្យបានមុខថ្ងៃទី១៣ខែមេសា ឆ្នាំ២០១៨ ដើម្បីសាកសួរលើបណ្តឹងព្រហ្មទណ្ឌពីបទ ឆបោកប្រាក់ តាមបណ្តឹងរបស់មេធាវី ណាច ទ្រី មេធាវី កែវ ចំណាន និងមេធាវី ជុន សុជាតិ ជាតំណាងដោយអាណត្តិឲ្យដើមបណ្តឹងជនជាតិជប៉ុនចំនួន២៩នាក់ ។
មន្ត្រីនគរបាលនាយកដ្ឋានព្រហ្មទណ្ឌ ក៏បានឲ្យដឹងថា ជនសង្ស័យបានបោកលុយពីជនជាតិជប៉ុនចំនួន២៩នាក់ ក្នុងទំហំទឹកប្រាក់រហូតដល់ជាង២លានដុល្លារ ក្រោមរូបភាពវិនិយោគខ្យល់។ មន្ត្រីនគរបាលប្រាប់ថា កាលពីអំឡុងឆ្នាំ២០១៣-២០១៤ ជនសង្ស័យ បានទាក់ទងជនជាតិជប៉ុនមួយក្រុមមានចំនួន២៩នាក់ ដោយភូតថា ខ្លួនមានដីសម្រាប់ដាំម្រេច នៅឃុំត្រពាំងក្តារ ស្រុកដងទង់ ខេត្តកំពត មានដីសម្រាប់ដាំដំឡូង និងដើមអាកាស្សា នៅឃុំក្រាំងដង្វាយ ស្រុកភ្នំស្រួច ខេត្តកំពង់ស្ពឺ និងមានដីសម្រាប់ដាំស្វាយ នៅខេត្តកំពង់ស្ពឺ តែតាមការពិត ពេលទទួលលុយពីជនរងគ្រោះរួចហើយ គឺគេចខ្លួនរហូត ពោលគ្មានដីសម្រាប់ការវិនិយោគទាំងនេះឡើយ។
ជនសង្ស័យបានប្រើប្រាស់លិខិតឆ្លងដែនចំនួន៤ ដើម្បីងាយស្រួលដើរហើរ និងប្រើរូបភាពឆបោក។ ក្រៅពីមានជនជាតិជប៉ុនខាងលើនេះ ក៏មានជនជាតិម៉ាឡេស៊ី និងជនជាតិសឹង្ហបុរីប្រមាណ១០នាក់ទៀត ដែលបានចាញ់បោកជនសង្ស័យរូបនេះ តែពួកគេមិនទាន់មកដាក់ពាក្យបណ្តឹង៕ ដោយ ៖ បញ្ញាស័ក្តិ
