ភ្នំពេញ ៖ រាជរដ្ឋាភិបាលកម្ពុជាតាមរយៈសំណើរបស់ក្រសួងបរិស្ថាន បានសម្រេចបង្កើតតំបន់ការពារទេសភាព “សំបូរព្រៃគុក” ដែលមានផ្ទៃដីសរុបចំនួន៤៣៨ ហិកតា ដែលស្ថិតក្នុងភូមិសាស្ត្រ ស្រុកប្រាសាទសំបូរ ខេត្តកំពង់ធំ។
អនុក្រឹត្យដែលចុះហត្ថលេខាដោយសម្តេចតេជោនាយករដ្ឋមន្ត្រីនៅថ្ងៃទី១៣ ខែមីនា ឆ្នាំ២០១៨ គឺដើម្បី ១. ធានាការថែរក្សា និងការពារសោភណ្ឌភាពធម្មជាតិ ប្រព័ន្ធអេកូឡូស៊ី សារព័ន្ធមជ្ឈដ្ឋានធម្មជាតិ សត្វព្រៃ រុក្ខជាតិ និងវប្បធម៌ ២. ផ្តល់ផលិតផល និងសេវាកម្មធម្មជាតិសម្រាប់ការប្រើប្រាស់ប្រកបដោយនិរន្តរភាបព ៣. ថែរក្សាការពារលំនឹងបរិស្ថានធម្មជាតិក្នុងតំបន់ប្រាសាទ ៤. លើកកម្ពស់ការចូលរួមរបស់សហគមន៍មូលដ្ឋានក៏ដូចជាសាធារណៈជនក្នុងការរួមចំណែកដល់ការគ្រប់គ្រង ការការពារ និងការអភិរក្សជីវៈចម្រុះ និងធនធានធម្មជាតិក្នុងតំបន់ និង៥. ថែរក្សាការពារ វប្បធម៌ ប្រពៃណី ការអភិវឌ្ឍ និងសារៈសំខាន់ផ្នែកវប្បធម៌របស់សហគមន៍មូលដ្ឋាន។
យ៉ាងណាក៏ដោយ ផ្ទៃដីនៃអនុក្រឹត្យតំបន់ការពារទេសភាព “សំបូរព្រៃគុក” នេះ មិនបញ្ចូលដីកម្មសិទ្ធិឯកជន និងដីប្រើប្រាស់ប្រយោជន៍សាធារណៈ៕ ដោយ ៖ បញ្ញាស័ក្តិ