មនុស្សយ៉ាងហោចណាស់ចំនួន ៤នាក់ បានស្លាប់បាត់បង់ជីវិត នៅពេលស្មានថ្មើរជើងដែលស្ថិតនៅក្បែរសកលវិទ្យាល័យអន្តរជាតិ Florida បានបាក់ចុះក្រោម។ នេះបើតាមការចេញផ្សាយរបស់ CNN។
ហេតុការណ៏បាក់ស្មានដ៏រន្ធត់កាលពីថ្ងៃព្រហស្បតិ៍ម្សិលមិញនេះ ក៏បានសង្កត់ឡានចំនួន ៨គ្រឿងផងដែរ ដែលកំពុងបើកបរនៅខាងក្រោម ចំនែកមនុស្សចំនួន ៩នាក់រងរបួស ហើយត្រូវបានគេដឹកទៅកាន់មន្ទីរពេទ្យ។
អភិបាលរដ្ឋ Florida ឈ្មោះ Rick Scott បានថ្លែងដូច្នេះថា “អ្វីដែលសំខាន់សំរាប់ពួកយើងនៅនៅពេលនេះគឺការបួងសួងឲ្យអ្នករាល់គ្នានៅក្នុងមន្ទីរពេទ្យជាសះស្បើយឡើងវិញ និងបួងសួងដល់ក្រុមគ្រួសារជនរងគ្រោះដែលបាត់បង់ជីវិត”។
លោកថ្លែងបន្តទៀតថា រដ្ឋនឹងព្យាយាមឲ្យអស់ពីលទ្ធភាពដើម្បីកំណត់ថាតើបញ្ហាបច្ចេកទេសទើបបណ្តាលឲ្យស្ពានបាក់ឬយ៉ាងណា ហើយប្រសិនដូច្នេះមែន វានឹងមានអ្នកទទួលខុសត្រូវ។
សូមបញ្ជាក់ថា ស្ពានថ្មើរជើងនេះត្រូវបានអាជ្ញាធរចាប់ផ្តើមដំឡើងកាលពីថ្ងៃសៅរិ៍អាទិត្យមុន ដើម្បីជំរុញផ្នែកសុវត្ថិភាពនៅលើដងផ្លូវដែលមានចរាចរណ៏មមាញឹក បន្ទាប់ពីសិស្សសកលវិទ្យាល័យនៅទីនោះម្នាក់ ត្រូវបានឡានបុកស្លាប់កាលពីឆ្នាំមុន។
គេនៅពុំទាន់ដឹងមូលហេតុច្បាស់លាស់នៅឡើយទេ ពីការបាក់ស្ពាននេះ។ មុនពេលបាក់ ស្ពានកំពុងស្ថិតក្រោមការសាងសងនៅឡើយ៕ សុភ័ក្ត្រ
