ភ្នំពេញ ៖ ឆេះផ្សារច្បារអំពៅអស់តូបលក់ដូរទំនិញគ្រប់ប្រភេទរបស់អាជីវករប្រមាណជិត៦៥០តូប ក្នុងចំណោមជាង ១៤០០ តូប រយៈពេលប្រមាណជិត១០ម៉ោង ទើបរលត់ ដោយប្រើទឹកអស់ជាង ២៥០ ឡាន ។
លោក ទេព បូរ៉ា នាយប៉ុស្ដិ៍ច្បារអំពៅ២ បានប្រាប់ថា ភ្លើងឆេះផ្សារច្បារអំពៅកើតឡើងនៅវេលាម៉ោង១១និង៣០នាទីយប់ ថ្ងៃព្រហស្បតិ៍ ទី១៥ ខែមីនា ឆ្នាំ២០១៨ រហូតដល់ព្រឹកថ្ងៃទី១៦មីនានេះទើបរលត់ ក្រោយពីអន្តរាគមន៍របស់នគរបាលពន្លត់អគ្គិភ័យ ហើយមូលហេតុដែលបង្កឲ្យមានអគ្គិភ័យលើកនេះ បណ្តាលមកពីទុស្សេចរន្តអគ្គិសនី នៅម្តុំតូបឆៀងខាងកើតផ្សារ បង្កជាអណ្តាតភ្លើងឆេះតូបតគ្នាៗតែម្ដង។ លោកបន្តថា ករណីនេះ បណ្ដាលឲ្យឆេះតូបលក់ដូរចំនួន ៦៤៦ តូប រួមទាំងសម្ភារៈ ក្នុងចំណោម ១៤៤៧តូប៕ ដោយ ៖ បញ្ញាស័ក្តិ