ភ្នំពេញ ៖ ស្ថានីយបូមទឹកលូ៥ មួយកន្លែងទៀត បានបើកការដ្ឋានសាងសង់ហើយ នៅព្រឹកថ្ងៃទី១៦ មីនានេះ ក្រោមអធិបតីភាពលោក ឃួង ស្រេង អភិបារាជធានីភ្នំពេញ ដោយមានការចូលរួមពីមន្ត្រីក្រោមឱវាទនិងប្រជាពលរដ្ឋប្រមាណជិត១ពាន់នាក់ ដើម្បីបូមទឹករំដោះការលិចលង់ជូនប្រជាពលរដ្ឋ៣ខណ្ឌជាយក្រុង ។
លោកសាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានបញ្ជាក់អោយដឹងថា ស្ថានីយបូមទឹកលូ៥ ត្រូវបានស្ថាបនាឡើងនៅចំណុចមុំបី ចំណុចប្រសព្វ៣ខណ្ឌ គឺខណ្ឌមានជ័យ ពោធិសែនជ័យនិងខណ្ឌដង្កោ ហើយប្រឡាយនេះមានតួនាទីយ៉ាងសំខាន់ក្នុងការរំដោះទឹកជំនន់ទឹកភ្លៀងចេញពីតំបន់ជាច្រើននៅក្នុងខណ្ឌទាំង៣នេះផងដែរ។
លោកបន្តថា ស្ថានីយបូមទឹកលូ៥ ធ្វើឡើងតាមគម្រោងប្លង់មេអភិវឌ្ឍន៍របស់រាជធានីភ្នំពេញ ដែលបានសិក្សាដោយអង្គការចៃកាជាយូរមកហើយ ។ស្ថានីយបូមទឹកលូ៥នេះ គឺជាទីតាំងយុទ្ធសាស្ត្រមួយ ក្នុងការបូមទឹកចេញពីតំបន់ខាងកើតព្រលានយន្តហោះ តំបន់ចោមចៅ តំបន់ត្រពាំងថ្លឹង ភូមិគោកបញ្ជាន់ តំបន់ផ្សារស៊ិនជូរីផ្លាហ្សា តំបន់ថ្មគោល ផ្លូវ២០០៤ និងមួយផ្នែកទៀតពីសង្កាត់ទឹកថ្លា ខាងត្បូងមហាវិថីសហព័ន្ធរុស្សុី ដែលមានទំហំផ្ទៃរងទឹកភ្លៀងរហូតដល់១០២៨ហិកតា។
លោកបន្តថា ស្ថានីយបូមទឹកលូ៥ ដែលបើកការដ្ឋានស្ថាបនានៅពេលនេះ នឹងត្រូវសាងសង់អគារថ្មីបណ្តោយ១៨,៩ម៉ែត្រ ទទឹង ១០,៩ម៉ែត្រ បំពាក់បំពង់បូមទឹក៤គ្រឿង ក្នុងនោះ បំពង់មុខកាត់៨តឹក២គ្រឿងនិងបំពង់មុខកាត់១ម៉ែត្រចំនួន២គ្រឿង ដែលអាចមានសមត្ថិភាពបូមទឹកបាន៥ម៉ែត្រគុប ក្នុងមួយវិនាទីនិងស្មើនិង២៨៨០០ម៉ែត្រគុប ក្នុង១ម៉ោង។
លោក ឃួង ស្រេង បានប្រសាសន៍លើកឡើងថាគ្មានការជោគជ័យណាមួយមិនមានការចូលរួមពីប្រជាពលរដ្ឋនោះទេ ។ រដ្ឋបាលរាជធានីភ្នំពេញបានខិតខំណាស់ក្នុងការដោះស្រាយបញ្ហាលិចលង់ ដោយក្រៅពីកសាងស្ថានីយហើយ យើងនៅបើកយុទ្ធនាការស្តារប្រឡាយនិងលូ នៅ៤ខណ្ឌកណ្តាលក្រុងថែមទៀត។ លោកបន្តថា ដើម្បីអោយទឹកលែងលិច យើងត្រូវរួមគ្នាថែរក្សាប្រឡាយ ។
ជាក់ស្តែងយើងកំពុង កាយអភិវឌ្ឍប្រឡាយស្ទឹងមានជ័យ ដែលមានសម្រាមរហូតដល់៤៣ម៉ឺនមែត្រគុប និងបានប្រើប្រាស់ថវិកា
អស់យ៉ាងច្រើន ហើយប្រឡាយស្ទឹងមានជ័យនេះ នៅរដូវវស្សាខាងមុខនេះអាចដោះស្រាយការលិចលង់បានហើយ។
លោក ឃួង ស្រេង បន្តថាប្រឡាយទឹកត្រូវមើលថែទាំ ការពារទាំងអស់គ្នា មិនថាអាជ្ញាធរឬ ប្រជាពលរដ្ឋនោះទេ ។លោកស្នើរអោយមន្ត្រី សង្កាត់ ខណ្ឌ ត្រូវចុះមើលដល់មូលដ្ឋានប្រជាពលរដ្ឋ ដើម្បីចង់ដឹងពីការចង់បានរបស់ប្រជាពលរដ្ឋ មិនថាបញ្ហាលិចលង់ ឬការ ផ្តល់សេវាផ្សេងៗ ជូនពួកគាត់នោះទេ ។ លោកបានបញ្ជាក់ថា យើងមានថវិកាមួយចំនួនដើម្បីជួយលើការងារនេះជូនប្រជាពលរដ្ឋ៕ ដោយ ៖ កូឡាប