រាជទាយាទប្រទេសអារ៉ាប៊ីសៅ អូឌីត គឺព្រះអង្គម្ចាស់ Mohammed bin Salman បានធ្វើការព្រមានថា ប្រទេសរបស់ព្រះអង្គនឹងធ្វើការអភិវឌ្ឍអាវុធនុយក្លេអ៊ែរ ប្រសិនបើប្រទេសអៀរ៉ង់ផលិតវា។ នេះបើតាមការចេញផ្សាយរបស់ CNN នៅថ្ងៃសុក្ររសៀលនេះ។
ព្រះអង្គម្ចាស់ ដែលជារដ្ឋមន្ត្រីការពារជាតិប្រទេសអារ៉ាប៊ីសៅ អូឌីត បានថ្លែងដូច្នេះថា “ប្រទេសអារ៉ាប៊ីសៅ អូឌីតមិនចង់បានអាវុធនុយក្លេអ៊ែរទេ ប៉ុន្តែពួកយើងនឹងលេងល្បែងនេះដែរប្រសិនជាប្រទេសអៀរ៉ង់ផលិតគ្រាប់បែកនុយក្លេអ៊ែរ”។
សហគមន៍អន្តរជាតិមានការព្រួយបារម្ភជាយូរមកហើយថា ការអភិវឌ្ឍន៍អាវុធនុយក្លេអ៊ែររបស់អៀរ៉ង់នឹងធ្វើឲ្យមានការប្រកួតប្រជែងនុយក្លេអ៊ែរនៅមជ្ឈិមបូព៌ា។
ព្រះអង្គម្ចាស់ Mohammed bin Salman គឺធ្វើការដាក់ការជឿជាក់ទ្វេរដងចំពោះការប្រដូចរបស់លោកចំពោះមេដឹកនាំជាន់ខ្ពស់អៀរ៉ង់ Ali Khamenei ទៅនឹងមេដឹកនាំផ្តាច់ការ អាដុល ហ៊ីត្លែ (Adolf Hitler) ដោយលោកបានបញ្ជាក់ថា មេដឹកនាំទាំងពីរនាក់នេះមានគោលដៅវាតទីដ៏គ្រោះថ្នាក់។
ព្រះអង្គបញ្ជាក់ថា “គាត់ (លោក Ali Khamenei) ចង់បង្កើតគំរោងផ្ទាល់ខ្លួននៅក្នុងបជ្ឈិមបូព៌ាដូចទៅនឹង Adolf Hitler ដែលចង់វាតទីពង្រីកទឹកដីនោះពេលនោះ។ ប្រទេសជាច្រើននៅក្នុងពិភពលោក និងតំបន់អៀរ៉ង់មិនបានដឹងថា Adolf Hitler មានគ្រោះថ្នាក់យ៉ាង ណានោះទេ រហូតដល់ពេលវាកើតឡើង។ ខ្ញុំមិនចង់ឃើញព្រឹត្តិការណ៍ដូចគ្នាកើតឡើងនៅបជ្ឈិមប្រទេសនោះទេ”។
សូមបញ្ជាក់ថា កាលពីខែវិច្ឆការ ឆ្នាំមុន ព្រះអង្គម្ចាស់បានហៅមេដឹកនាំអៀរ៉ង់ថា ជាហ៊ីត្លែថ្មី នៅតំបន់បជ្ឈិមបូព៌ា៕ សុភ័ក្ត្រ