ភ្នំពេញ ៖ មន្ត្រីជាន់ខ្ពស់ក្រសួងការពារជាតិ បានឲ្យដឹងនៅថ្ងៃសុក្រ ទី១៦ ខែមីនា ឆ្នាំ២០១៨ថា រថក្រោះ រថពាសដែកចំនួន ៨គ្រឿង និងឧទ្ធម្ភាគចក្រចំនួន ៣គ្រឿង ព្រមទាំងគ្រឿងយុទ្ធោបករណ៍យោធាមួយចំនួនទៀត សម្រាប់បម្រើដល់វិស័យយោធា របស់កងទ័ពចិន បានបញ្ជូនមកដល់កម្ពុជារួចហើយ ដើម្បីត្រៀមចូលរួមសមយុទ្ធលំហាត់នាគមាសឆ្នាំ២០១៨ នៅភូមិសាស្ត្រតំបន់ភ្នំធំម្រះព្រៅ ស្ថិតក្នុងភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺ។
មន្ត្រីក្រសួងការពារជាតិ បានឲ្យដឹងថា ទីតាំងធ្វើសមយុទ្ធយោធា រវាងកងទ័ពកម្ពុជា-ចិន នៅពេលនេះ គឺមានទីតាំងនៅក្នុងបរិវេណទីតាំង របស់ កងពលអន្តរាគមន៍លេខ៧០ ដែលនឹងត្រូវចាប់ផ្តើមធ្វើសមយុទ្ធ នៅថ្ងៃសៅរ៍ ទី១៧ ខែមីនា ឆ្នាំ២០១៨តទៅ។
មន្ត្រីជាន់ខ្ពស់ក្រសួងការពារជាតិកម្ពុជា បានឲ្យដឹងថា សមយុទ្ធនាគមាសឆ្នាំ២០១៨ រវាងកងទ័ពកម្ពុជា-ចិន នឹងត្រូវចាប់ពីថ្ងៃទី១៧ ដល់ថ្ងៃទី៣០ ខែមីនា ឆ្នាំ២០១៨។ ហើយថា សមយុទ្ធនេះ បានផ្តោតសំខាន់ ទៅលើការហ្វឹកហ្វឺនប្រឆាំងភេរវកម្ម សង្គ្រោះបន្ទាន់ លំហាត់បាញ់គ្រាប់ពិត និងប្រើប្រាស់សព្វាវុធទំនើបៗមានដូចជា៖ ឧទ្ធម្ភាគចក្រ Z10 បំពាក់កាំជ្រួចបាញ់ចំគោលដៅ កាំភ្លើងត្បាល់បាញ់ចូលគោលដៅដែលបានកំណត់ ព្រមទាំងលំហាត់សមយុទ្ធរថក្រោះ និងរថពាសដែកជាដើម។
មន្ត្រីដដែល បានឲ្យដឹងទៀតថា ៖ សមយុទ្ធខាងលើនេះ ខាងភាគីកងទ័ពកម្ពុជា មានកងទ័ពចំនួន ២៨០នាក់ និងភាគីកងទ័ពចិន មានកងទ័ពចំនួន ១៩០នាក់។
មន្ត្រីក្រសួងការពារជាតិ បានឲ្យដឹងទៀតថា គ្រឿងយុទ្ធោបករណ៍យោធា របស់កងទ័ពចិន សម្រាប់បម្រើដល់ ការធ្វើសមយុទ្ធយោធាកម្ពុជា-ចិន ឬហៅថា «សមយុទ្ធនាគមាស»ឆ្នាំ២០១៨នេះ គឺខាងភាគីកងទ័ពចិន បានបញ្ជូន រថពាសដែក រថក្រោះចំនួន ៨គ្រឿង និង និងឧទ្ធម្ភាគចក្រចំនួន ៣គ្រឿង ព្រមទាំងគ្រឿងយុទ្ធោបករណ៍មួយចំនួនទៀត ព្រមទាំងបានដឹកមកដល់កម្ពុជារួចហើយ កាលពីថ្ងៃទី១៥ ខែមីនា ឆ្នាំ២០១៨។
សមយុទ្ធនេះខាងភាគីកងទ័ពចិន មានឧទ្ធម្ភាគចក្រចំនួន ៣គ្រឿង រថពាសដែក គ្រឿង និងសម្ភារៈយោធាសម្រាប់បំរើឲ្យការធ្វើសមយុទ្ធនេះជាច្រើនប្រភេទទៀត សរុបទាំងអស់ មានចំនួន ២៥គ្រឿង។
មន្ត្រីក្រសួងការពារជាតិ ឲ្យដឹងទៀតថា ពេលនេះ ទាំងរងក្រោះ ឬរថពាសដែក និងឧទ្ធម្ភាគចក្រព្រមទាំងយុទ្ធោបករណ៍យោធាមួយចំនួនទៀត ត្រូវបាននាំយកទៅដាក់ដល់ភូមិសាស្ត្រតំបន់ភ្នំធំ ម្រះព្រៅ ស្ថិតក្នុងភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺជាស្ថាពររួចហើយ។
ទាក់ទិនបញ្ហានេះ លោកឧត្តមសេនីយ៍ ឥត សារ៉ាត់ អគ្គមេបញ្ជាការរង នៃកងយោធពលខេមរភូមិន្ទ កន្លងទៅនេះ ធ្លាប់បានឲ្យអ្នកសារព័ត៌មានដឹងថា សមយុទ្ធយោធា រវាងកងទ័ពកម្ពុជា-ចិនខាងលើនេះ នឹងប្រើប្រាស់សព្វាវុធទំនើបៗ ដូចជា៖ ឧទ្ធម្ភាគចក្រ Z10 បំពាក់កាំជ្រួចបាញ់ចំគោលដៅ កាំភ្លើងត្បាល់បាញ់ចូលគោលដៅដែលបានកំណត់ និងប្រើប្រាស់រថពាសដែក រថក្រើ ប្រើប្រាស់កម្លាំងថ្មើរជើង និងប្រើប្រាស់យន្តហោះចុះពីលើអាកាស ដើម្បីរំដោះចំណាត់ខ្មាំងជាដើម។
លោកឧត្តមសេនីយ៍ ឥត សារ៉ាត់ បានឲ្យដឹងទៀតថា សមយុទ្ធលំហាត់នាគមាសឆ្នាំ២០១៨នេះ មានប្រធានបទចំនួនពីរ សំខាន់ គឺប្រឆាំងភេរវកម្ម និងមនុស្សធម៌ ហើយថា សមយុទ្ធនេះ ត្រូវបានរៀបចំឡើងតាមរូបភាពជាងកងពលតូច ដោយចុះអនុវត្តជាក់ស្តែងក្នុងកម្រិតថ្នាក់វរសេនាតូច ហើយត្រូវបែងចែកលំហាត់សមយុទ្ធនេះ ជាពីរផ្នែក គឺលំហាត់ទីបញ្ជាការ និងលំហាត់លើទីលាន។
ផ្តើមពីបញ្ហានេះ គណៈកម្មការដឹកនាំធ្វើលំហាត់រួមគ្នា រវាងកងយោធពលខេមរភូមិន្ទ និងកងទ័ពរំដោះប្រជាជនចិន ក៏បានចេញសេចក្តីជូនដំណឹង និងបានផ្សព្វផ្សាយដល់ប្រជាពលរដ្ឋ ដែលមានលំនៅឋាននៅខេត្តកំពង់ស្ពឺ និងអ្នកធ្វើដំណើរឆ្លងកាត់ ស្នើកុំឲ្យមានការភ្ញាក់ផ្អើលចំពោះសំឡេងស្នូរផ្ទុះ និងការចល័តយុទ្ធោបករណ៍យោធា ចន្លោះចាប់ពីថ្ងៃទី១៥ ដល់ទី៣០ ខែមីនា ឆ្នាំ២០១៨។
សេចក្ដីជូនដំណឹងដដែល ឲ្យដឹងថា ការត្រៀមធ្វើសមយុទ្ធនាគមាសឆ្នាំ២០១៨ រវាងកងទ័ពកម្ពុជា-ចិន ដែលត្រូវរៀបចំនៅភូមិ សាស្ត្រតំបន់ភ្នំធំម្រះព្រៅ ស្ថិតក្នុងភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺ មន្ត្រីគណៈកម្មការដឹកនាំធ្វើសមយុទ្ធ ក៏បានសំណូមពរដល់រដ្ឋលេខាធិការអាកាសចរណ៍ស៊ីវិល និងអាជ្ញាធរដែនដីពាក់ព័ន្ធ ឲ្យជួយផ្សព្វផ្សាយព័ត៌មានអំពីលំហាត់បាញ់គ្រាប់ពិតនេះឲ្យបានទូលំទូលាយដល់ប្រជាពលរដ្ឋ ជាពិសេស ហាមឃាត់មិនឲ្យប្រជាពលរដ្ឋ ចូលទៅក្នុងតំបន់ដែលត្រូវកំណត់ធ្វើសមយុទ្ធ ក្នុងទីតាំងធ្វើសមយុទ្ធខាងលើជាដាច់ខាត។
មន្ត្រីគណៈកម្មការដឹកនាំធ្វើលំហាត់សមយុទ្ធ រវាងកងយោធពលខេមរភូមិន្ទ និងកងទ័ពរំដោះប្រជាជនចិន បាន ឲ្យដឹងថា ការធ្វើសមយុទ្ធនាគមាសឆ្នាំ២០១៨នេះ គឺជាលើកទី២ហើយ ដែលភាគីទាំងពីរ យោធាកម្ពុជា-ចិន បានរៀបចំធ្វើរួមមាន៖ ការរុករកមីនកប់ក្រោមដី និងកម្ទេចយុទ្ធភ័ណ្ឌមិនទាន់ផ្ទុះ ការដោះគ្រាប់បែកសារធាតុគីមីពុល ការបន្សាបជាតិគីមីពុល ការប្រយុទ្ធកងអនុសេនាធំរថក្រោះ ដោយសហការជាមួយវរសេនាតូចថ្មើជើង ការរំដោះចំណាប់ខ្មាំងពីសត្រូវ ការធ្វើការងារមនុស្សធម៌ និងការបាញ់គ្រាប់ពិតជាដើម៕ ដែន សីមា