សៀមរាប ៖ រដ្ឋបាលខេត្តសៀមរាប បានឲ្យដឹងថា ក្រោមការដឹកនាំកម្លាំងផ្ទាល់របស់លោក ឃឹម ប៊ុនសុង អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត គិតមកត្រឹមម៉ោង១១:៥០នាទី នាថ្ងៃសុក្រ ទី១៦ ខែមីនា ឆ្នាំ២០១៨នេះ អគ្គិភ័យដែលបានឆាបឆេះសាលមហោស្រពអាណាចក្រអង្គ នៅក្នុងក្រុងសៀមរាបត្រូវបានរលត់ទាំងស្រុងហើយ ដោយប្រើប្រាស់រថយន្តពន្លត់អគ្គីភ័យសរុបចំនួន ២០ គ្រឿង។ សាលមហោស្រពនេះ មានតម្លៃប្រមាណ១៥លានដុល្លារ ត្រូវបានឆេះស្ទើរទាំងស្រុង ដោយសារទុស្សេខ្សែភ្លើង។
សូមបញ្ជាក់សាលមហោស្រពអង្គរត្រូវបានភ្លើងឆាបឆេះនៅវេលាម៉ោង៩និង៣០នាទី ដល់ម៉ោង ១១និង៥០នាទី ត្រូវបានរលត់ទាំងស្រុង អគានេះមានទំហំ ៥០ម៉ែត្រគុណនឹង១០០ម៉ែត្រ។
ក្នុងហេតុការណ៍អគ្គិភ័យនេះពុំមានប៉ះពាល់ដល់អាយុជីវិតមនុស្ស និងមិនរាលដាលដល់ផ្ទះអ្នកជិតខាងនោះឡើយ ហើយសមត្ថកិច្ចជំនាញកំពុងធ្វើការស្រាវជ្រាវរកមូលហេតុនៃការឆេះនេះ ដោយឡែកចំពោះទំហំនៃការខូចខាតពុំទាន់ទទួលបានពីខាងក្រុមហ៊ុននៅឡើយទេ ។
ទន្ទឹមនឹងនេះដែរ អាជ្ញាធរខេត្ត សូមអំពាវនាវដល់បងប្អូនប្រជាពលរដ្ឋ និងបណ្តាលក្រុមហ៊ុន សហគ្រាស ត្រូវយកចិត្តទុកដាក់ប្រុងប្រយ័ត្នខ្ពស់ ជៀសវាងមានគ្រោះអគ្គិភ័យកើតឡើង៕ ដោយ៖បញ្ញាស័ក្តិ