ភ្នំពេញ ៖ ទឹកប្រាក់ចំនួន៣៥២.៦៣៥ដុល្លារ ដែលជាជំនួយឥតសំណងរបស់រដ្ឋាភិបាលជប៉ុន ស្ថិតក្រោមជំនួយទ្រង់ទ្រាយតូចសន្តិសុខមនុស្សជាតិ (គូសាណូណិ) ជប៉ុន សម្រាប់សាងសង់អគារសិក្សា នៅក្នុងអនុវិទ្យាល័យចំនួន៤ និងសាលាបងបឋមសិក្សាចំនួន២ ដល់ខេត្តចំនួន៤ នៅកម្ពុជា ត្រូវបានចុះហត្ថលេខានាព្រឹកថ្ងៃទី១៦ ខែមីនា នេះ នៅស្ថានឯកអគ្គរាជទូតនៃប្រទេសជប៉ុនប្រចាំកម្ពុជា រវាងលោក ហូរីណូអ៊ូជិ ហ៊ីដេហ៊ីសា (HORINOUCHI Hidehisa) ឯកអគ្គរាជទូតជប៉ុនប្រចាំកម្ពុជា ជាមួយស្ថាប័នទទួលជំនួយចំនួន ៤នៅកម្ពុជា។
ជំនួយឥតសំណងទាំងនេះ នឹងគាំទ្រដល់គម្រាងចំនួន៤នៅកម្ពុជា ក្នុងនោះរួមមាន៖ ទី១៖ គម្រោងសាងសង់អគារសិក្សានៅអនុវិទ្យាល័យធ្លកអណ្តូង ក្រុងសៀមរាប នូវថវិកាចំនួន៩០.៧២៧ដុល្លារ ផ្តល់ជូនមន្ទីរអប់រំ យុវជន និងកីឡា ខេត្តសៀមរាប។ លោក សយ ទិត្យាវង្ស ប្រធានមន្ទីរអប់រំ យុវជន និងកីឡា ខេត្តសៀមរាប បានថ្លែថា តាមរយៈគម្រោងនេះ អគារសិក្សាមួយខ្នង នឹងការបំពាក់បរិក្ខាសិក្សានៅក្នុងអនុវិទ្យាល័យធ្លកអណ្តូង ក្រុងសៀមរាប ខេត្តសៀមរាប។ គម្រោងនេះ នឹងផ្តល់ឲ្យសិស្សានុសិស្សចំនួន២៩៨នាក់ អាចសិក្សាក្នុងបរិស្ថានដែលមានផាសុខភាព និងសុវត្ថិភាព។
គម្រោងសាងសង់អគារសិក្សានៅអនុវិទ្យាល័យគោកងួន ស្រុកកំពង់ស្វាយ ខេត្តកំពង់ធំ នូវថវិកាចំនួន ៨៧.៨៧៩ដុល្លារ ផ្តល់ដល់ មន្ទីរអប់រំ យុវជន និងកីឡាខេត្តកំពង់ធំ។ លោក ជូ វុនធី ប្រធានមន្ទីរអប់រំ យុវជន និងកីឡា ខេត្តកំពង់ធំ បានលើកឡើងថា តាមយរយៈគម្រោងនេះ អគារសិក្សាមួយខ្នងត្រូវបានសាងសង់ជាមួយនឹងការបំពាក់បិក្ខាសិក្សានៅក្នុងអនុវិទ្យាល័យគោកងួន ខេត្តកំពង់ធំ គម្រោងនេះនឹងផ្តល់ឲ្យសិស្សានុសិស្សចំនួន១៧១នាក់ អាចសិក្សានៅក្នុងបរិស្ថានដែលមានផាសុខភាព និងសុវត្ថិភាពផងដែរ។
គម្រោងសាងសង់អគារសិក្សានៅសាលាបឋមសិក្សាព្រះគន្លង និងសាលាបឋមសិក្សាអាតោ ស្រុកចុងកាល់ ខេត្តឧត្តរមានជ័យ នូវថវិកាចំនួន ៨៧.៤១៩ ដុល្លារផ្តល់ដល់ មន្ទីរអប់រំ យុវជន និងកីឡាខេត្តឧត្តរមានជ័យ។ តាមរយៈគម្រោងនេះអគារសិក្សាចំនួន២ខ្នង នឹងត្រូវបានសាងសង់ជាមួយការបំពាក់បរិក្ខាសិក្សានៅក្នុងសាលាបឋមសិក្សាព្រគន្លង និងសាលាបឋមសិក្សាអាតោ គម្រោងនេះអាចឲ្យសិស្សានុសិស្សចំនួន១១១នាក់ អាចសិក្សាបានយ៉ាងល្អ។
គម្រោងសាងសង់អគារសិក្សានៅសាលាបឋមសិក្សាដំណាក់កកោះ និងសាលាបឋមសិក្សាល្បើកស្វាយ ស្រុកស្វាយចេក ខេត្តបន្ទាយមានជ័យ នូវថវិកាចំនួន៨៦.៦១០ ដុល្លារ ផ្តល់ដល់សាម៉ារីតាន់ភឺសសង្គ្រោះអន្តរជាតិ។ តាមរយៈគម្រោងនេះ អគារសិក្សាចំនួន២ខ្នង នឹងត្រូវសាងសង់ជាមួយនឹងការបំពាក់បរិក្ខាសិក្សា ដែលអាចឲ្យសិស្សានុសិស្សអាចចូលសិក្សាបានចំនួន១៩៩នាក់ ផងដែរ។
ជំនួយឥតសំណង គូសាណូណិ របស់ជប៉ុន បានចាប់ផ្តើមនៅប្រទេសកម្ពុជា នៅឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែង របស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញនៅតាមមូលដ្ឋាន។ គម្រោងផ្តល់ជំនួយនេះ មានទិសដៅការពារជនងាយរង់គ្រោះ ពីកត្តាមួយចំនួនដូចជា ភាពក្រីក្រ និងភាពអកុសល ដែលអាចគំរាមកំហែងដោយផ្ទាល់ដល់ជីវភាពរស់នៅ ការចិញ្ចឹមជីវិត និងសេចក្តីថ្លៃថ្នូររបស់ពួកគេក៏ដូចជាជំរុញនូវភាពម្ចាស់ការលើខ្លួនឯងប្រជាសហគមន៍។
ថ្លែងក្នុងពីចុះហត្ថលេខាលើកិច្ចសន្យាផ្តល់ជំនួយឥតសំណង ក្រោមគម្រោងទ្រង់ទ្រាយតូចសន្តិសុខ មនុស្សជាតិរបស់រដ្ឋាភិបាលជប៉ុន លោក ហូរីណូអ៊ូជិ ហ៊ីដេហ៊ីសា (HORINOUCHI Hidehisa) បានបញ្ជាក់ថា ទឹកប្រាក់ដែលជាជំនួយឥតសំណងនេះ ត្រូវបានបែងចែកជា ៤ផ្នែកសម្រាប់ជួយ អភិវឌ្ឍន៍សាលារៀននៅតាមសហគមន៍ដែលកំពុងខ្វះខាតអគារសិក្សា។ ឯកអគ្គរាជទូតជប៉ុនសង្ឃឹមថា ជំនួយលើវិស័យនេះ នឹងរួមចំណែកដល់ការអភិវឌ្ឍធនធាន មនុស្សនៅក្នុងប្រទេសកម្ពុជា ឱ្យកាន់តែប្រសើរឡើងថែមទៀត ទាំងផ្នែកបរិស្ថានសម្រាប់ការអប់រំ របស់សិស្សានុសិស្ស៕ ដោយ៖កូឡាប