ប្រធានាធិបតីអាមេរិច ដូណាល់ ត្រាំកាលពីថ្ងៃសុក្រម្សិលមិញនេះ បានចេញច្បាប់ថ្មី ដែលអនុញ្ញាតឲ្យមន្ត្រីជាន់ខ្ពស់អាមេរិចធ្វើដំណើរទៅកាន់កោះតៃវ៉ាន់បាន ដើម្បីជួបប្រជុំជាមួយនឹងមន្ត្រីជាន់ខ្ពស់តៃវ៉ាន់ ដែលវិធានការនៃនឹងធ្វើឲ្យប្រទេសចិនក្តៅក្រហាយ។ នេះបើតាមការចេញផ្សាយរបស់សារព័ត៌មាន Channel News Asia។
បើតាមសេតវិមានបានឲ្យដឹងថា លោក ត្រាំបានចុះហត្ថលេខាលើច្បាប់ធ្វើដំណើរតៃវ៉ាន់ ដែលជំរុញឲ្យមានការធ្វើដំណើរទៅវិញទៅមករវាងមន្ត្រីអាមេរិច និងតៃវ៉ាន់ គ្រប់កំរិត។
អ្នកតំណាងអាមេរិចធ្លាប់បានធ្វើដំណើរទៅកាន់តៃវ៉ាន់ ហើយមន្ត្រីតៃវ៉ាន់ក៏ធ្លាប់ធ្វើដំណើរមកសេវិមានម្តងម្កាលដែរ ប៉ុន្តែការធ្វើកិច្ចប្រជុំជាធម្មតាជាកិច្ចប្រជុំកំរិតទាបប៉ុណ្ណោះ គឺដើម្បីចៀសវាងធ្វើឲ្យប្រទេសចិនមានការអាក់អនចិត្ត។
សូមបញ្ជាក់ថា ទីក្រុងវ៉ាស៊ីនតោនបានកាត់ផ្តាច់ទំនាក់ទំនងការទូតជាមួយនឹងកោះតៃវ៉ាន់ ក្នុងឆ្នាំ ១៩៧៩ ប៉ុន្តែអាមេរិចនៅតែរក្សាទំនាក់ទំនងជំនួញជាមួយនឹងកោះតៃវ៉ាន់ ព្រមទាំងមានលក់អាវុធដល់កោះនេះផងដែរ ដែលធ្វើឲ្យចិនមានការខឹងសម្បារយ៉ាងខ្លាំង។
ប្រទេសចិនចាត់ទុកកោះតៃវ៉ាន់គឺជាខេត្តមួយរបស់ខ្លួន និងបានប្រកាសថានឹងធ្វើការរួបរួមគ្នាវិញនៅពេលអនាគត។
មេដឹកនាំថ្មីតៃវ៉ាន់ បានចាត់ទុកតៃវ៉ាន់គឺជាផ្លូវទៅកាន់លទ្ធិប្រជាធិបតេយ្យនៅក្នុងតំបន់អាស៊ី និងបានអះអាងថា សម្មិផលប្រជាធិបតេយ្យរបស់តៃវ៉ាន់បានជំរុញទឹកចិត្តដល់ប្រទេសជាច្រើន និងប្រជាជននៅក្នុងតំបន់៕ សុភ័ក្ត្រ