ភ្នំពេញ ៖ ដើម្បីកាត់បន្ថយការលិចលង់ដោយជំនន់ទឹកភ្លៀង រដ្ឋបាលរាជធានីភ្នំពេញបានខិតខំប្រឹងប្រែងណាស់ក្នុងស្តារ លាងសំអាតលូនិងប្រឡាយ រួមទាំងបានស្ថាបនាស្ថានីយបូមទឹកថ្មីៗជាច្រើនកន្លែងទៀតផងដែរ។
ជាក់ស្តែងនៅថ្ងៃទី១៦ខែមីនាឆ្នាំ២០១៨ រដ្ឋបាលរាជធានីភ្នំពេញ បានចាប់ផ្តើមជីកស្តារប្រឡាយ និងកាយប្រមូលសំរាមពីប្រឡាយបឹងសាឡាង ចាប់ពីផ្លូវលេខ២៣០ ដល់ផ្លូវលេខ២៧១ ក្នុងបឹងសាឡាង ខណ្ឌទួលគោក ដើម្បីរំដោះទឹកកុំអោយលិចលង់នៅរដូវវស្សាខាងមុខនេះ ខណៈដែលប្រជាពលរដ្ឋមួយចំនួនដែលមិនមានការយល់ដឹងយកសំរាមមកបោះចូលក្នុងប្រឡាយបឹងសាឡាងនេះយ៉ាងច្រើននោះ។
មន្ត្រីរដ្ឋបាលរាជធានីភ្នំពេញបានអោយដឹងថា នៅថ្ងៃទី១៦ខែមីនាឆ្នាំ២០១៨ រដ្ឋបាលរាជធានីភ្នំពេញ បានចាប់ផ្តើមជីកស្តារប្រឡាយ និងកាយប្រមូលសំរាមពីប្រឡាយបឹងសាឡាង ចាប់ពីផ្លូវ២៣០ ដល់ផ្លូវ២៧១ ក្នុងបឹងសាឡាង ខណ្ឌទួលគោក ដែលប្រជាពលរដ្ឋមួយចំនួន បានបោះសម្រាមចូលយ៉ាងច្រើន។
លោកដួង ចាន់សារ៉ាត់ប្រធានលូទឹកនៃមន្ទីរសាធារណការនិងដឹកជញ្ជូនរាជធានីភ្នំពេញ បានអោយដឹងនៅព្រឹកថ្ងៃទី១៧មីនានេះថា ប្រឡាយបឹងសាឡាងដែលបាននឹងកំពុងធ្វើសកម្មភាពនេះមានប្រវែង១២៣០ម៉ែត្រ ដោយធ្វើការស្តារដោយកាយនិងកើបយកសំរាមចេញសិន ដែលការងារនេះនឹងធ្វើអោយហើយនៅមុនចូលឆ្នាំខ្មែរ ហើយក្រុមការងាររបស់លោកនឹងធ្វើការស្តារភក់ចេញពីពោះប្រឡាយ ដែលភក់នេះមានជម្រៅចាប់ពី២ម៉ែត្រទៅ២ម៉ែត្រកន្លះ ហើយកិច្ចការងារនេះគ្រោងបញ្ចប់នៅក្រោយបុណ្យចូលឆ្នាំខ្មែរ ។
លោកដួង ចាន់សារ៉ាត់ បានបញ្ជាក់ថា បន្ទាប់ពីស្តារប្រឡាយបឹងសាឡាង នេះចប់ ក្រុមការងារនឹងបន្តស្តារប្រឡាយស្ទឹងមានជ័យ ចាប់ពីគល់ស្ពានអាកាសស្ទឹងមានជ័យ រហូតដល់ស្ថានីយ៍បូមទឹកបឹងទំពុនបន្ថែមទៀត។ ពាក់ព័ន្ធនិងបញ្ហានេះ រដ្ឋបាលរាជធានីភ្នំពេញបានអំពាវនាវ ដល់ប្រជាពលរដ្ឋទាំងអស់សូមបញ្ឈប់ការបោះចោលសំរាមចូលលូ ចូលប្រឡាយ ដែលនាំបង្កើតជាឧបសគ្គដល់ផ្លូវបង្ហូរទឹក និងប៉ះពាល់ដល់បរិស្ថាន និងសោភ័ណភាពទីក្រុងយើង៕ ដោយ ៖ កូឡាប
