ខេត្តមណ្ឌលគិរី ៖ អាជ្ញាធរមូលដ្ឋានភូមិមានជ័យ បានអោយដឹងថា មានសប្បុរសជនចំនួន ពីរនាក់ បាននាំយកគ្រឿងឧបភោគបរិភោគ យកទៅផ្តល់ជូន លោកយាយ ម៉ៅ រស់នៅម្នាក់ឯងគ្មានសាច់ញាតិ កូនចៅ កំពុងរស់នៅភូមិមានជ័យ ឃុំ ឆក់ដែក ស្រុកកោះញែក កាលពីរសៀលថ្ងៃទី១៦ ខែមីនា ឆ្នាំ២០១៨។
មេភូមិមានជ័យ លោក ស៊ឹម សុន ឲ្យដឹងថា លោកយាយ ម៉ៅ មាន ឈ្មោះពិត ប៉ូ សំអាត គាត់ពុំមានកូនចៅទេ គឺរស់នៅម្នាក់ឯង ហើយរូបគាត់ មានជីវភាពខ្វះខាតស្ទើររកអង្ករច្រកឆ្នាំងពុំបានទេរាល់ថ្ងៃនេះ។ លោកមេភូមិបន្តថា កន្លងមកលោកយាយវ័យជិត ៩០ ឆ្នាំរូបនេះ គឺត្រូវបានបងប្អូនអ្នកស្រុកអ្នកភូមិ រស់នៅជិតខាងគ្នា ជួយផ្ដល់ម្ហូបអាហារដល់រូបគាត់ ជាងនេះកាលពីឆ្នាំមុន នៅពេលលោកយាយ ម៉ៅ បានធ្លាក់ខ្លួនឈឺ ត្រូវបានក្រុមការងារ របស់លោកស្រី កូវ ចន្ទវណ្ណារិទ្ធ ជួយចេញថ្នាំព្យាបាលដល់រូបគាត់ និងបានផ្ដល់ជំនួយសង្គ្រោះចំនួន បីបួនលើករួចមកហើយដែរ។ លោកមេភូមិមានជ័យ ឲ្យដឹងទៀតថា ជំនួយទាំងនោះរួមមាន ៖ ថវិកា អង្ករ ទឹកត្រី ទឹកស៊ីអ៊ីវ ជូនដល់លោកយាយម៉ៅជាបន្តបន្ទាប់។
លោក ស៊ឹម សុន មេភូមិមានជ័យ ឲ្យដឹងបន្តទៀតថា កង្វះខាតអាហារទទួលទានជាប្រចាំថ្ងៃ របស់លោកយាយ ម៉ៅ នាពេលកន្លងមកនេះ ត្រូវបានសប្បុរសមួយចំនួនបានជួយផ្តល់ស្បៀងអាហារជួយដល់លោកយាយ ម៉ៅ ជាបន្តបន្ទាប់ ហើយសប្បុរសជនទាំងនោះមានដូចជា ៖ លោកស្រី កូវ ចន្ទវណ្ណារិទ្ធ រស់នៅទីក្រុងភ្នំពេញ បានបន្តជួយអង្ករចំនួន ៥០គីឡូ មី ១កេះ ទឹកត្រីពីរយួរ ទឹកស៊ីអ៊ីវ ២យួរ ទឹកសុទ្ធ ២កេះ ត្រីងៀត ២គីឡូសាច់ក្រក ២គីឡូ និងថវិកាចំនួន ២០ម៉ឺនរៀល។
ចំណែកសប្បុរសជនម្នាក់ទៀត គឺលោក ហែម ប៊ុណ្ណារ៉ែល មេបញ្ជាការកងរាជអាវុធហត្ថខេត្តមណ្ឌលគិរី បានជួយអង្ករចំនួន ៧០គីឡូ និងថវិកាចំនួន ២០ម៉ឺនរៀល។ ត្រង់ចំណុចនេះ លោក ស៊ឹម សុន មេភូមិមានជ័យ បានថ្លែងអំណរអរគុណ ចំពោះទឹកចិត្ត ដែលសប្បុរសជនទាំងអស់ ទាំងពេលកន្លងមក និងបន្តមកដល់បច្ចុប្បន្ននេះ បានជួយផ្តល់ជាស្បៀងអាហារ គ្រឿងឧបភោគបរិភោគ និងថវិកាជាដើម យកទៅផ្តល់ជូន លោកយាយ ម៉ៅ ដែលមានវ័យជិត ៩០ឆ្នាំទៅហើយនោះ ដើម្បីអាចឲ្យរូបគាត់មានអាហារទទួលទាន បន្តជីវិតរស់នៅរហូតមកដល់សព្វថ្ងៃនេះ៕ ដោយ ៖ សមុទ្រឈើ
