ប៉ូលីសហុងកុង បានចាប់ខ្លួនយុវជនអាយុ ១៩ ឆ្នាំ ដែលបានសារភាពសម្លាប់មិត្តស្រីរបស់ខ្លួន និងទុកសាកសពរបស់នាង នៅស្ថានីយ៍រថភ្លើង ក្នុងអំឡុងពេលធ្វើដំណើរទៅកាន់តៃវ៉ាន់ កាលពីខែមុន ។
Chan Tung-kai ដែលមានឈ្មោះហៅក្រៅថា “Big Mile” ត្រូវបានចាប់ឃុំខ្លួននៅវេលាម៉ោង ៦ ល្ងាច ថ្ងៃទី១៣ ខែមីនា នេះបើយោងតាម The Standard ។
សាកសពមិត្តស្រីរបស់យុវជនជាឃាតកររូបនេះ ដែលមានឈ្មោះថា Poon Hiu-wing ត្រូវបានប៉ូលីសតៃវ៉ាន់រកឃើញ នៅវេលាម៉ោង ៩ និង ៤០ នាទី យប់ថ្ងៃកើតហេតុខាងលើ ។
ប៉ូលីសត្រូវបានដឹងថា គូស្នេហ៍វ័យក្មេងនេះ បានធ្វើដំណើរទៅកាន់តៃវ៉ាន់ សម្រាប់ដំណើរកំសាន្តសាងស្នេហ៍ដ៏រ៉ូម៉ង់ទិច កាលពីថ្ងៃទី១៣ ខែកុម្ភៈ និងចុះឈ្មោះចូលស្នាក់នៅសណ្ឋាគារ Purple Garden ។ ទោះយ៉ាងណា Chan សារភាពថា រូបគេបានសម្លាប់ Poon និងដាក់សាកសពរបស់នាងចូលក្នុងវ៉ាលីស និងវាលស្មៅខាងក្រៅស្ថានីយ៍រថភ្លើង Zhuwei នៅក្នុងទីក្រុង New Taipei ។
ឪពុករបស់ Poon បានស្វែងរកជំនួយពីអាជ្ញាធរ បន្ទាប់ពីកើតមានការសង្ស័យកាន់តែខ្លាំងចំពោះ Chan ដែលបានប្រាប់គាត់ថា ពួកគេទាំងពីរបានបែកបាក់គ្នារួចហើយ និងថា រូបគេពុំដឹងថានឹងស្ថិតនៅទីណានោះទេ ។
ប៉ូលីសហុងកុងបានទាក់ទងនឹងប៉ូលីសនៅតៃវ៉ាន់ និងសហការឲ្យបើកការស៊ើបអង្កេតចំពោះករណីនេះ ។
ប៉ូលីសតៃវ៉ាន់ បានរកឃើញ Chan បានចាកចេញពីសណ្ឋាគារ តាមរយៈវីដេអូកាមេរ៉ាឃ្លាំមើល ដោយអូសវ៉ាលីសពណ៌ស៊ីជម្ពូរធំមួយ ក្នុងសកម្មភាពគួរឲ្យសង្ស័យ ។
Poon ដែលមានឈ្មោះហៅក្រៅថា “Amer” បានសរសេរនៅលើគណនីហ្វេសប៊ុករបស់នាងថា៖ «គាត់និយាយថា ខ្ញុំគឺជាមិត្តស្រីដំបូង និងក៏ជាមនុស្សចុងក្រោយបង្អស់របស់គាត់» ។
ទន្ទឹមនោះផងដែរ ប៉ូលីសតៃវ៉ាន់បាននិយាយថា តាមរយៈការធ្វើកោសលវិច្ច័យសាកសពរបស់នាង នោះពួកគេបានសន្មត់ថា នាងត្រូវបានគេច្របាច់.កសម្លាប់តែម្តង, នេះបើយោងតាម The Taipei Times ។
ប៉ូលីសហុងកុង ក៏បានឈានដល់ការចរចា ដើម្បីបញ្ជូន Chan ទៅកាន់តៃវាន់ ។ ទោះយ៉ាងណា ដំណើរការនេះ ត្រូវបានរំពឹងថា ត្រូវការចំណាយពេលខ្លះ ព្រោះអង្គភាពទាំងពីរ ពុំមានកិច្ចព្រមព្រៀងផ្នែកបត្យាប័ន ៕ ចន្ទី