រតនគិរី ៖ អ្នកកាសែត៤នាក់ ដែលកំពុងប្រកបការងារ ក្នុងខេត្តរតនគិរី ដែលសម្បូរដោយព្រៃឈើ ត្រូវបានសមត្ថកិច្ចចាប់ខ្លួន ពាក់ព័ន្ធរឿងជំរិតទារលុយ២លានរៀលពីពលរដ្ឋ ជាថ្នូរ នឹងការចាប់ម៉ាស៊ីនកាត់ឈើ។
ក្នុងដំណាក់កាលសមត្ថកិច្ចនគរបាល នាព្រឹកថ្ងៃទី១៨ ខែមីនា ឆ្នាំ២០១៨ អធិការនគរបាល ស្រុកវើនសៃ បានបញ្ជូនអ្នកកាសែតទាំង៤នាក់ មកស្នងការដ្ឋាននគរបាលខេត្តរតនគិរី ដើម្បីធ្វើការសាកសួរ ដោយជាលទ្ធផលសមត្ថកិច្ចបានរកឃើញចម្លើយពិតថា ក្នុងចំណោមពួកគេ គឺមានម្នាក់ឈ្មោះ សេង ឌីវ៉ាន់ ជាអ្នកបង្ខំជំរិតទារលុយ២លានរៀល ពីពលរដ្ឋដោយផ្ទាល់។
អធិការនគរបាលស្រុកវើនសៃ នៅថ្ងៃទី១៧ ខែមីនា ឆ្នាំ២០១៨ បានបញ្ជាក់ថា ក្រោយពីបានទទួលពាក្យប្តឹងពីពលរដ្ឋមកថា មានអ្នកកាសែត៤នាក់ បានជម្រិតទារលុយ២លានរៀល ជាថ្នូរនឹងការចាប់ម៉ាស៊ីនកាត់ឈើ ដែលកំពុងអារឈើក្នុងចំការ ស្ថិតក្នុងឃុំកោះពាក់ ស្រុកវើនសៃ ខេត្តរតនគិរី ដើម្បីយកមសង់ផ្ទះ។ ដោយអនុវត្តតាមបទបញ្ជារបស់លោកប្រធានគណៈបញ្ជាការឯកភាពស្រុក កងកម្លាំងសមត្ថកិច្ចនគរបាល បានចុះទៅនាំខ្លួនអ្នកកាសែតទាំង៤នាក់ មកអធិការដ្ឋាននគរបាលស្រុក ដើម្បីធ្វើការសាកសួរ។
អ្នកកាសែតទាំង៤នាក់ ទី១ ឈ្មោះ សេង ឌីវ៉ាន់ ចាងហ្វាយសារព័ត៌មានមហានគរអច្ឆរិយៈ ទី២ ឈ្មោះ ផាន ផន និពន្ធនាយករង ទូរទស្សន៍រស្មីបូព៌ា ប្រចាំខេត្តកំពង់ធំ (www.rsp-news.com) ទី៣ ឈ្មោះ សន ចាន់ឌី អ្នកយកព័ត៌មានទូរទស្សន៍អនឡាញរស្មីបូព៌ា (www.rsp-news.com) និងទី៤ ឈ្មោះ ឡេត ឡី អ្នកយកព័ត៌មានសារព័ត៌មានសង្គមកម្ពុជាប្រចាំខេត្តរតនគិរី ។
នាព្រឹកថ្ងៃទី១៨ ខែមីនា ឆ្នាំ២០១៨នេះ អធិការនគរបាល ស្រុកវើនសៃ បានបញ្ជាក់ថា ក្រោយសាកសួរចប់ បានធ្វើការណែនាំ និងធ្វើកិច្ចសន្យា ឲ្យវិលទៅផ្ទះវិញ ៕ ដោយ ៖ បញ្ញាស័ក្តិ