ខេត្តមណ្ឌលគីរី ៖ ប្រជាពលរដ្ឋ បានអះអាងថា បទល្មើសព្រៃឈើនៅតែបន្តកើតមានក្នុងទឹកដីស្រុកកែវសីមា ទោះបីសមត្ថកិច្ចបើកយុទ្ធនាការបង្ក្រាបជាបន្តបន្ទាប់បែបណាក្តី។ ប្រជាពលរដ្ឋឲ្យដឹងថា ៖ ជាក់ស្ដែងកាលពីល្ងាចថ្ងៃទី១៨ ខែមីមា ឆ្នាំ២០១៨ កម្លាំងគនបាលនៃស្នងការដ្ឋានខេត្តមណ្ឌលគិរី បានឃាត់រថយន្តដឹកឈើពេញប្រៀប ១គ្រឿងប្រគល់អោយជំនាញរដ្ឋបាលព្រៃឈើ ខេត្តមណ្ឌលគិរី។
ទាក់ទិនបញ្ហានេះ លោកឧត្តមសេនីយ៍ត្រី ឡោ សុខា ស្នងការខេត្តមណ្ឌលគិរី មានប្រសាសន៍ថា ក្នុងសកម្មភាពទប់ស្កាត់ការចរាចរណ៍បទល្មើសព្រៃឈើឆ្លងដែនខុសច្បាប់ កម្លាំងការិយាល័យប្រឆាំងបទល្មើសសេដ្ឋកិច្ចខេត្តមណ្ឌលគិរី បានសហការណ៍ជាមួយនគរបាលព្រហ្មទណ្ឌខេត្ត និង កំលាំងអធិការរដ្ឋាននគរបាលស្រុកកែវសីមា និងកម្លាំងវរៈការពារព្រំដែន ៦២១ បានចុះល្បាតនៅក្នុងស្រុកកែវសីមា បានប្រទះឃើញរថយន្តដឹកឈើខុសច្បាប់ ១គ្រឿង នៅត្រង់ចំណុចចម្ការម្រេចផ្លូវចូលច្រករបៀង(ងាំដី) ដែលស្ថិតនៅក្នុងភូមិឆ្នែង ឃុំស្រែខ្ទុម ស្រុកកែវសីមា។
រថយន្តដឹកឈើខុសច្បាប់ ដែលបម្រុងលោតឆ័ត្រយកទៅលក់អោយឈ្មួញវៀតណាម ហើយត្រូវកម្លាំងនគរបាល នៃស្នងការដ្ឋាននគរបាលខេត្តមណ្ឌលគិរី បង្ក្រាបបានមាន ម៉ាកឡង់គ្រីស័រ ពណ៌ខ្មៅពុំមានពាក់ស្លាក់លេខ បានផ្ទុកឈើប្រណិតប្រភេទ កកោះចំនួន ១៨ដុំ មានប្រវែង ២ម៉ែត្រ និងមានមុខកាតចាប់ពីមុខ ៣០សង់ទីម៉ែត្រឡើងទៅ ចំណែកអ្នកបើកបររត់គេចខ្លួនបាត់។បច្ចុប្បន្ន រថយន្ត និងវត្ថុតាងខាងលើ ត្រូវបានកម្លាំងនគរបាលសេដ្ឋកិច្ច ប្រគល់ឲ្យទៅសង្កាត់រដ្ឋបាលព្រៃឈើស្រែខ្ទុម និងស្រែព្រះរក្សាទុក និងចាត់ការបន្ត។
ពលរដ្ឋ បានកត់សម្គាល់ថា បទល្មើសព្រៃឈើ នៅស្រុកកែវសីមា មិនមានការថមថយនោះទេ ពួកគាត់អះអាងថា ក្រុមឈ្មួញនៅតែបន្តសកម្មភាពដឹកជញ្ជូនឈើយ៉ាងសកម្ម ចេញពីដែនជម្រកសត្វព្រៃកែវសីមា និងចេញពីតំបន់សហគមន៍មួយចំនួន នៅក្នុងទឹកដីកែវសីមា។ ប្រជាពលរដ្ឋ បានឲ្យដឹងថា ការចាប់បង្ក្រាប របស់មន្ត្រីជំនាញហាក់បីដូចជានៅមានកំរឹត ក្រុមពលរដ្ឋទទូចសំណូមពរដល់អាជ្ញាធរខេត្តនេះ ចាត់វិធានការចំពោះបទល្មើសព្រៃឈើ ដែលកំពុងកើតមានពេញបន្ទុកនេះផង បើមិនដូច្នេះព្រៃឈើក្នុងសហគមន៍និងព្រៃក្នុងដែនជម្រកសត្វព្រៃកែវសីមា និងរលាយហិនហោចក្នុងពេលដ៏ខ្លីខាងមុខជាក់ជាមិនខាន៕ ដោយ៖ សមុទ្រឈើ
