ខេត្តសៀមរាប ៖ ឃាត់ខ្លួនជនសង្សយ័ម្នាក់ បន្ទាប់ពីធ្វើសកម្មភាពទៅទិញបាយប្រអប់ពីជនរងគ្រោះ ឆ្លៀតឱកាសជនរងគ្រោះរវល់រៀបចំបាយប្រអប់ ជនសង្ស័យបានឆក់យកកាបូបស្ពាយដែលមានដាក់លុយនិងទូរសព្ទ័ ហើយគេចខ្លួន ។
នគរបាលក្រុងសៀមរាប បានឲ្យដឹងថា ៖ កាលថ្ងៃទី១៧ ខែមីនា ឆ្នាំ២០១៨ វេលា ម៉ោង១៥និង១០នាទី នៅត្រង់ចំណុចតូបលក់បាយ-ម្ហូប ស្ថិតនៅក្រុមទី០២ ភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប ជនសង្ស័យម្នាក់ បានជិះម៉ូតូ០១គ្រឿង ម៉ាកហុងដាឌ្រីម សេរ១២៥ ស៊េរីឆ្នាំ២០១៦ ពណ៌ខ្មៅ ចូលមកទិញបាយដាក់សាច់ក្រក ចំនួន៣ប្រអប់ ពីជនរងគ្រោះឈ្មោះ វន្ត័ បូណារិន ភេទ ស្រី អាយុ៣៤ឆ្នាំ មុខរបរលក់បាយ ម្ហូប មានទីលំនៅបច្ចុប្បន្ននៅភូមិខ្នារ សង្កាត់ជ្រាវ ក្រុង-ខេត្តសៀមរាប ខណៈពេលដែលជនរងគ្រោះកំពុងរៀបចំខ្ចប់បាយឲ្យជនសង្សយ័ ដោយទុកកាបូបស្ពាយមួយជាកាបូបដាក់លុយ ពណ៌ខ្មៅ មានរូបផ្កាពណ៌លឿង ស ទុកនៅលើតុលក់ដូរ ពេលនោះជនសង្ស័យឃើញឱកាសស្ងាត់ល្អក៏បានឆក់យកកាបូបខាងលើ ហើយជិះម៉ូតូគេចខ្លួនបាត់ ។
នៅក្នុងកាបូបរបស់ជនរងគ្រោះមានសម្ភារៈដូចជា ៖ ទូរស្ទ័ដៃចំនួន២គ្រឿង(ទី1.ម៉ាកIphone7 ពណ៌ផ្កាឈូក ទី២.ម៉ាកOppo ពណ៌ផ្កាឈូក) ប្រាក់ដុល្លារចំនួន២៤ដុល្លារ ប្រាក់រៀល២០៥០០០រៀល។
បន្ទាប់ពីទទួលបានពាក្យបណ្តឹងពីជនរងគ្រោះ និងដោយមានការចង្អុលបង្ហាញពីលោកវរសេនីយ៍ឯក ទេព ចាន់ណា អធិការនៃអធិការដ្ឋាននគរបាលក្រុងសៀមរាប បានណែនាំអោយ នគរបាលផ្នែកព្រហ្មទណ្ឌ សហការណ៍ជាមួយនគរបាលប៉ុស្តិ៍រដ្ឋបាលសង្កាត់ស្លក្រាម បើការស្រាវជ្រាវ ។
លោកវរសេនីយ៍ត្រី នួន ស័ក្តិចំរើនរិទ្ធ អធិការរងទទួលផ្នែកព្រហ្មទណ្ឌ បានឲ្យដឹងថា បន្ទាប់ពីបើការស្រាវជ្រាវ យើងបានកំណត់ទីតាំងរបស់ជនសង្ស័យ នៅចំណុចម្តុំ ខាងជើងស្ពានរោករ៉ាក ស្ថិតនៅភូមិមណ្ឌល៣ សង្កាត់ស្លក្រាម ក្រុង-ខេត្តសៀមរាប និងបានកំណត់មុខសញ្ញាបាន ហើយបានធ្វើការឃាត់ខ្លួនជនសង្សយ័ និងធ្វើការឆែកឆេរលើខ្លួនជនសង្ស័យភ្លាមៗ ក៏បានឃើញកាបូបស្ពាយ ទូរសព្ទ័ដៃ និងប្រាក់របស់ជនរងគ្រោះនៅនឹងខ្លួនរបស់គេ ហើយយើងក៏បានធ្វើការនាំខ្លួនជនសង្ស័យខាងលើមកធ្វើការសាកសួរ ក្រោយពីការសាកសួរ ជនសង្ស័យរូបនេះ បានឆ្លើយសារភាពថា ខ្លួនពិតជាបានធ្វើសកម្មភាពលួចយកសម្ភារៈ របស់ជនរងគ្រោះខាងលើពិតប្រាកដមែន។
ជនសង្ស័យឈ្មោះ ញ៉ែម ធារី ហៅរី ភេទប្រុស អាយុ៣១ឆ្នាំ មុខរបរជាងជួសជុលរថយន្ត មានស្រុកកំណើតភូមិកោះមិត្ត ឃុំកោះមិត្ត ស្រុកកំពង់សៀម ខេត្តមំពង់ចាម ទីលំនៅបច្ចុប្បន្ននៅភូមិ២ ឃុំស្រីសន្ធរ ស្រុកស្រីសន្ធរ ខេត្តកំពង់ចាម បានចូលមកក្នុងក្រុងសៀមរាប បំរុងស្វែងរកការងារធ្វើ តេបានបែកគំនិតធ្វើសកម្មភាពឆក់កាបូបទៅវិញ ។ វត្ថុតាងដកហូតបានម៉ូតូចំនួន១គ្រឿង ពាក់ស្លាកលេខ ភ្នំពេញ1FQ-8386 លេខតួ និងលេខ ម៉ាស៊ីន ៩៤៦២៨៧៧ម៉ាកហុងដាឌ្រីម សេរ១២៥ ស៊េរីឆ្នាំ២០១៦ ពណ៌ខ្មៅ កាបូបចំនួន១ ទូរស្ទ័ដៃចំនួន២គ្រឿង (ម៉ាក iPhone7 ពណ៌ផ្កាឈូក ម៉ាកOppo ពណ៌ផ្កាឈូក) ប្រាក់ដុល្លារចំនួន២៤ដុល្លារ ប្រាក់រៀល២០៥០០០រៀល។
ជនសង្ស័យនិងវត្ថុតាង ត្រូវបាននគរបាលផ្នែកព្រហ្មទណ្ឌនៃអធិការដ្ឋាននគរបាលក្រុងសៀមរាប កសាងសំណុំរឿងបញ្ជូនទៅ តុលាការ ដើម្បីចាត់ការតាមនិតិវិធី នៃច្បាប់ ។ ចំណែកសម្ភារៈនិងទ្រព្យសម្បត្តិ របស់ជនរងគ្រោះត្រូវបានធ្វើការប្រគល់ជូនជនរងគ្រោះវិញហើយ ៕ ដោយ៖បញ្ញាស័ក្តិ