អ្នកតំណាងរបស់កូរ៉េខាងជើង កូរ៉េខាងត្បូង និងអាមេរិចនឹងធ្វើការជួបគ្នានៅក្នុងប្រទេសហ្វាំងឡង់ ដើម្បីចរចារពីការលុបបំបាត់អាវុធនុយក្លេអ៊ែរ។ នេះបើតាមការបញ្ជាក់របស់មន្ត្រីកូរ៉េខាងត្បូង និងហ្វាំងឡង់។
មន្ត្រីក្រសួងការបរទេសហ្វាំងឡើងបាននិយាយថា ការចរចាររបស់កូរ៉េខាងជើងនៅក្នុងប្រទេសហ្វាំងឡង់ក៏នឹងមានវត្តមានរបស់អ្នកតំណាងអាមេរិចផងដែរ ដែលមិនមែនជាមន្ត្រីរដ្ឋាភិបាលទេ។ សហរដ្ឋអាមេរិចមិនមានវត្តមានអ្នកការទូតនៅក្នុងប្រទេសកូរ៉េខាងជើងទេ។
ក្រសួងការបរទេសកូរ៉េខាងត្បូងបានឲ្យសារព៌តមាន CNN ដឹងថា អតីតមន្ត្រី និងអ្នកជំនាញឯកជនមកពីកូរ៉េខាងត្បូង នឹងចូលរួមការចរចារលើកទី ២លើបញ្ហាការលុបបំបាត់ចោលអាវុធនុយក្លេអ៊ែរ។ ក្រសួងដដែលបញ្ជាក់ថា មន្ត្រីអាមេរិចក៏នឹងមានវត្តមានផងដែរ។
សូមបញ្ជាក់ថា កាលពីថ្ងៃអាទិត្យម្សិលមិញនេះ មន្ត្រីជាន់ខ្ពស់កូរ៉េខាងជើងម្នាក់ត្រូវបានគេឃើញឡើងយន្តហោះធ្វើដំណើរទៅកាន់ប្រទេសហ្វាំងឡង់។
ក្រសួងការបរទេសហ្វាំងឡង់បញ្ជាក់ថា ប្រទេសហ្វាំងឡង់គ្រាន់តែសម្របសម្រួលកិច្ចប្រជុំប៉ុណ្ណោះ តែមិនចូលរួមកិច្ចប្រជុំនោះទេ៕ សុភ័ក្ត្រ
