ប្រទេសស៊ុយអ៊ែតកំពុងតែជួយចរចារដើម្បីឲ្យមានការដោះលែងជនជាតិអាមេរិចចំនួន ៣នាក់ ដែលត្រូវបានចាប់ខ្លួនដោយរដ្ឋាភិបាលកូរ៉េខាងជើង។
ជនទាំង ៣នាក់មានឈ្មោះ Kim Hak-song Kim Sang-duk និង Kim Dong Chul។ នេះបើតាមការចេញផ្សាយរបស់សារព៌តមាន
អាមេរិច CNN នៅព្រឹកថ្ងៃច័ន្ទ ទី ១៩ ខែមីនានេះ។
បើតាមប្រភពថ្លែងប្រាប់ CNN ថា រដ្ឋមន្ត្រីការបរទេសកូរ៉េខាងជើង Ri Yong Ho បច្ចុប្បន្នកំពុងស្ថិតក្នុងរដ្ឋធានី Stockholm ប្រទេសស៊ុយអ៊ែត ដើម្បីធ្វើការចរចារជាមួយនឹងរដ្ឋមន្ត្រីការបរទេសស៊ុយអ៊ែត។
សូមបញ្ជាក់ថា លោក Kim Hak-song និង Kim Sang-duk ត្រូវបានរដ្ឋាភិបាលកូរ៉េខាងជើងដាក់ពន្ធធនាគារកាលពីឆ្នាំ ២០១៧ ពីបទសង្ស័យធ្វើសកម្មភាពប្រឆាំងរដ្ឋ ចំនែកលោក Kim Dong Chul ត្រូវបានចាប់ខ្លួនក្នុងឆ្នាំ ២០១៥ និងត្រូវបានកាត់ទោសឲ្យជាប់គុករយៈពេល ១០ឆ្នាំ ពីបទចារកម្ម៕ សុភ័ក្ត្រ
