(ស្វាយរៀង)៖ នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិនិងជាប្រធានក្រុមការងារចុះជួយក្រុងបាវិតនិងស្រុកចន្ទ្រា ខេត្តស្វាយរៀង បានធ្វើការអំពាវនាវឲ្យខ្មែរទាំងអស់គ្នា ត្រូវរួមគ្នាថែរក្សាតំលៃសន្តិភាពនាពេលបច្ចុប្បន្ននេះឲ្យរស់ស្ថិតស្ថេរ គង់វង្ស មិនឲ្យមានអ្នកណាមួយមកបំផ្លាញបានឡើយ ព្រោះសន្តិភាពនេះរកមកដោយលំបាក ជាការលះបង់ដ៏ធំធេងរបស់ថ្នាក់ដឹកនាំ គណបក្សប្រជាជនកម្ពុជា ទើបមាននូវអ្វីៗសព្វថ្ងៃនេះ។
នាយឧត្តមសេនីយ៍ ម៉ឹង សំផន បានឲ្យដឹងបន្តថា រាជរដ្ឋាភិបាលកម្ពុជា ដែលមានសម្តេចតេជោដឹកនាំ មិនចង់បានអ្វីក្រៅពីឃើញពលរដ្ឋរស់នៅមានជីវភាពសមរម្យ រស់ដោយប្រទេសជាតិមានសុខសន្តិភាព វឌ្ឍនភាព សង្គមរស់ដោយសេចក្តីថ្លៃថ្នូរនោះឡើយ។
ការលើកឡើងរបស់នាយឧត្តមសេនីយ៍បែបនេះ បានធ្វើឡើងក្នុងពិធីបញ្ចុះខណ្ឌសីមាព្រះវិហារនិងសម្ភោធសមិទ្ធផលនានាក្នុងវត្តបទុមរង្សី (ហៅវត្តចេក) ស្ថិតនៅក្នុងភូមិចេក ឃុំសំរោង ស្រុកចន្ទ្រា ខេត្តស្វាយរៀង នៅព្រឹកថ្ងៃទី១៨ ខែមីនា ឆ្នាំ២០១៨នេះ ដែលមានប្រជាពលរដ្ឋចូលរួមយ៉ាងច្រើនកុះករដែលចំណាយថវិកា អស់៦២៥,០០០ដុល្លារអាមេរិច។
នាយឧត្តមសេនីយ៍ បានបញ្ជាក់ថា «សូមប្រជាពលរដ្ឋទាំងអស់ ត្រូវជឿទុកចិត្តលើគណបក្សប្រជាជនកម្ពុជា និងរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ ដែលបានប្រែក្លាយប្រទេស តាំងពីបាតដៃទទេ ឲ្យមានការរីកចម្រើនលើគ្រប់វិស័យ»។
លោកក៏បានធ្វើការជំរុញ ឲ្យអាជ្ញាធរកងកម្លាំង គ្រប់លំដាប់ថ្នាក់ ការពារសន្តិសុខសុវត្ថិភាព ជូនប្រជាពលរដ្ឋឲ្យបានល្អបន្ថែមទៀត ជាពិសេសអនុវត្តន៍គោលនយោបាយភូមិ-ឃុំ មានសុវត្ថិភាពឲ្យទទួលបានជោគជ័យ។
នាយឧត្តមសេនីយ៍ ម៉ឹង សំផន បានលើកឡើងអំពីប្រវត្តិប្រទេសកម្ពុជាដែលធ្លាប់ឆ្លងកាត់របបប្រល័យពូជសាសន៍ប៉ុលពត ដែលបានកាប់សម្លាប់មនុស្សស្លូតត្រង់ជាង ៣ លាននាក់ ហើយបានរំដោះប្រទេស ដោយគណបក្សប្រជាជនកម្ពុជានិងរាជរដ្ឋាភិបាលកម្ពុជា ដែលមានសម្តេចតេជោហ៊ុន សែន ជាប្រមុខដឹកនាំធ្វើប្រទេសជាតិមានការរីចម្រើនលើគ្រប់វិស័យ។
លោកនាយឧត្តមសេនីយ៍បានបញ្ជាក់ថាព្រះពុទ្ធសាសនា បានដើរតួនាទីយ៉ាងសំខាន់ ក្នុងការអប់រំមនុស្សធ្វើអំពើល្អ ស្គាល់បាប ស្គាល់បុណ្យ ស្គាល់គុណ ស្គាល់ទោស ហើយទីអារ៉ាម គឺជាថ្នាលបណ្ដុះណ្តាលធនធានមនុស្ស ឲ្យមានអនាគតភ្លឺស្វាង និងក្លាយជាថ្នាក់ដឹកនាំប្រទេស ប្រកបដោយគុណធម៌ផងដែរ។
លោកនាយឧត្តមសេនីយ៍ បានឲ្យដឹងថា សព្វថ្ងៃនេះព្រះពុទ្ធសាសនា មានការរីកចម្រើនគួរឲ្យកត់សម្គាល់ ដោយប្រទេសកម្ពុជា មានវត្តអារាម ប្រមាណជាង៤០០០វត្ត និងព្រះសង្ឃជាង៦ម៉ឺនអង្គឯណោះ នៅទូទាំងប្រទេស ហើយបើវិស័យព្រះពុទ្ធចក្ររីកចម្រើន វិស័យអាណាចក្រក៏រីកចម្រើនដែរ ពោលគឺត្រូវតែដើរទន្ទឹមគ្នា។ សូមបញ្ជាក់ថា អំណោយដែលត្រូវចែកជូនដល់យាយជីតាជីប្រជាពលរដ្ឋចូលរួមក្នុងម្នាក់ៗទទួលបានថវិការ១ម៉ឺនរៀលនិងក្រណាត់ ស មួយដុំ និងសាលារៀនបី ក្នុងមួយសាលាទទួលបាន១លានរៀល រោងទិសទាំង៩ ក្នុងមួយទិស១លានរៀលផងដែរ៕ វ៉ៃកូ
