ព័ត៌មានពី Fox News ឲ្យដឹងថា គ្រូបង្រៀន Andria Zafirakou បានផ្តួលគូប្រកួត ៣០.០០០នាក់ ដែលមកពីគ្រប់ទីកន្លែងលើពិភព លោក។ នាងទទួលបានពានរង្វាន់នេះ អាស្រ័យដោយបម្រើកិច្ចការអប់រំនៅសាលាសហគមន៍ Alperton ប្រជុំជន Brent ដែលនៅទីនោះសម្បូរទៅដោយជាតិសាសន៍ផ្សេងៗគ្នា នៅប្រទេសអង់គ្លេស។
អ្នកគ្រូ Andria Zafirakou (អាវពណ៌ស្វាយ (ផ្កាម៉ោង១០)) និងសិស្សរបស់ខ្លួន
ប្រការពិសេសដែលអ្នកគ្រូត្រូវបានជ្រើសរើស ព្រោះសិស្សរបស់ខ្លួនសុទ្ធសឹងជាកូនចៅរបស់ក្រុមគ្រួសារក្រីក្របំផុតនៅប្រទេសអង់គ្លេស ហើយអាណាព្យាបាលទាំងនោះស្ទើរតែទាំងអស់ពុំអាចនិយាយភាសាអង់គ្លេសបានឡើយ។
នេះជាទីលើកទី៤ ដែលពានរង្វាន់គ្រូបង្រៀនពិភពលោកដែលមូនិធិ Varkey ដែលមានស្នាក់ការនៅឌូបៃ ជាអ្នកឧបត្ថម្ភ។ អ្នកឈ្នះនឹងទទួលបានប្រាក់រង្វាន់ ១លានដុល្លារ ហើយប្រាក់រង្វាន់នោះ ត្រូវបានផ្តល់ជូនជាច្រើនលើកក្នុងអំឡុងពេល ១០ឆ្នាំ អមជាមួយលក្ខខណ្ឌ គឺគ្រូបង្រៀន ជាម្ចាស់ជ័យលាភីត្រូវបន្តរបរនេះយ៉ាងតិច ៥ឆ្នាំទៀត។
កាលពីឆ្នាំទៅមិញគ្រូបង្រៀនសញ្ជាតិកាណាដា Maggie MacDonnell ជាម្ចាស់ជ័យលាភីដ៏ឧដុង្គឧត្តមនេះ ព្រោះតែបានបម្រើការងារបង្ហាត់បង្រៀនសិស្ស នាសាលារៀនដាច់ស្រយ៉ាលមួយនាតំបន់ប៉ូលខាងជើង៕ សូយន