ភ្នំពេញ ៖ ក្រសួងចំនួន៣ គឺក្រសួងអប់រំ យុវជននិងកីឡា ក្រសួងធម្មការ និងសាសនា និងក្រសួងព័ត៌មានបានគាំទ្រ ឲ្យយុវជនមកពីសាកលវិទ្យាល័យ ក្នុងរាជធានី បានបកស្រាយអំពីការទប់ស្កាត់គ្រប់រូបភាពណ អំពីការផ្សាយពាណិជ្ជកម្មស្រីពីគ្រឿងស្រវឹង ដើម្បី ចូលរួមទប់ស្កាត់ ការប្រើប្រាស់គ្រឿងស្រវឹងនៅកម្ពុជា ក្នុងការកាត់បន្ថយ គ្រោះថ្នាក់ចរាចរ អំពើហឹង្សា និងថវិកាជាតិជាដើម។
ក្នុងពិធីផ្សព្វផ្សាយពាណិជ្ជកម្មគ្រឿងស្រវឹង ដល់ស្រទាប់យុវជន សិស្ស និស្សិត កាលពីព្រឹកថ្ងៃទី១៩ មីនា នៅមជ្ឈមណ្ឌលសហប្រតិបត្តិការកម្ពុជា-កូរ៉េ លោកស្រី សឿ សុជាតិតា អនុរដ្ឋលេខាធិការ ក្រសួង អប់រំយុវជន និងកីឡាបានគាំទ្រ ពីការប្រកួត ប្រជែងរបស់និស្សិត និយាយជាសាធារណៈ ក្រោមប្រធានបទ ផលប៉ះពាល់ នៃការប្រើប្រាស់គ្រឿងស្រវឹង គឺក្នុងគោលបំណងផ្ដល់ឱកាសឲ្យស្រទាប់យុវជន បានចូលរួមកាត់បន្ថយផលប៉ះពាល់ជាអវិជ្ជមានដែលកើតចេញពីការប្រើប្រាស់គ្រឿងស្រវឹង នៅកម្ពុជាតាមរយៈទេពកោសល្យក្នុងការនិយាយរបស់ពួកគេទៅដល់សាធារណជន។ លោកស្រី ក៏បានលើកទឹកចិត្តដល់សិស្ស និស្សិតផងដែរ ដែលបានខិតខំចូលរួម ពីការផ្សាយពាណិជ្ជកម្មអំពីគ្រឿងស្រវឹង ដែលដាក់តាំងនៅតាមប៉ាណូ និង ការចាក់ផ្សាយតាមរយៈទូរទស្សន៍ ដែលធ្វើឲ្យប៉ះពាល់ដល់សុខភាព គ្រោះថ្នាក់ចរាចរ អំពើហឹង្សាក្នុងសង្គមជាដើម ។
លោកស្រី បញ្ជាក់ថា ការបញ្ឈប់ឲ្យមានការតាំងចិត្ត ការបញ្ឈប់នេះ យើងកំពុងនិយាយអំពីប៉ាណូ ការផ្សព្វផ្សាយ គ្រឿងស្រវឹង១ប៉ាណូតំលៃប៉ុន្មាន ផ្សាយតាមទូរទស្សន៏តំលៃប៉ុន្មាន ពីភពលោកអត់ទាន់បញ្ឈប់បានទេ គ្រឿងស្រវឹង ប៉ុន្តែនៅលើពិភពលោក ក៏មិនមានប្រទេសណាដែលប្រើប៉ាណូផ្សព្វផ្សាយគ្រឿងស្រវឹង ដូចនៅស្រុកខ្មែរដែរច្បាប់យើងមានហើយនៅតែអនុម័ត។ដូច្នេះគ្រឿងស្រវឹងយើងអត់អាចឃាត់បានទេ ដែលក្រសួងអប់រំទាមទាឲ្យប្អូនចូលរួមផ្សព្វផ្សាយទាំងអស់គ្នា។
លោកហេន ហ៊ុនហួន អនុរដ្ឋលេខាធិការក្រសួងធម្មការ និងសាសនា បានគាំទ្រ ការផ្ដល់ឱកាសឲ្យនិស្សិតកម្ពុជានេះ អំពីការទប់ស្កាត់ផ្សាយគ្រឿងស្រវឹងគ្រប់រូបភាព នៅតាមប៉ាណូ និងជារូបភាពនៅតាមសាធារណៈនេះដែរ។ លោកក៏បានជំរុញដល់និស្សិតចូលរួមកាត់បន្ថយផលប៉ះពាល់ជាអវិជ្ជមាន ដែលកើតចេញពីការប្រើប្រាស់គ្រឿងស្រវឹងនេះឲ្យបានស៊ីជម្រៅបន្ថែមទៀត ព្រោះការផ្ដល់ឱកាស នេះ ពិតជាមានសារសំខានខ្លាំងណាស់ ដើម្បីបញ្ជ្រាបការយល់ដឹងដល់ប្រជាពលរដ្ឋ គ្រប់ស្រទាប់វណ្ណៈ ដើម្បី រួមគ្នាការពារសុខភាព កាត់បន្ថយគ្រោះថ្នាក់ចរាចរ និងអំពើហឹង្សានៅក្នុងប្រទេសទាំងមូល ។
លោកវេជ្ជបណ្ឌិត មុំ គង់ នាយកប្រតិបត្តិអង្គការចលនាដើម្បីសុខភាពកម្ពុជា បានថ្លែងថា ប្រហែលជាផ្ទាំងប៉ាណូ ឬ ផ្ទាំងបដា ឬ ផ្ទាំងរូបភាពធំតូច ឬ ទម្រង់ផ្សាយពាណិជ្ជកម្មដំបូងបង្អស់ដែលយើងឃើញរៀងរាល់ព្រឹកនៅក្នុងផ្ទះ ឬ ពេលចេញពីផ្ទះ គឺជាការផ្សាយពាណិជ្ជកម្មគ្រឿងស្រវឹង។ គួរឲ្យកត់សំគាល់ថា មានប្រជាជនកម្ពុជា ៩៨% ដែលបានឃើញការផ្សាយពាណិជ្ជកម្មគ្រឿងស្រវឹងយ៉ាងតិចម្ដង (សាកលវិទ្យាល័យភូមិន្ទភ្នំពេញ, ២០១៥)។ យោងតាមលទ្ធផលស្រាវជ្រាវស្ដីពីការប្រើប្រាស់គ្រឿងស្រវឹងក្នុងចំណោមសិស្សវិទ្យាល័យ (២០១៦) របស់អង្គការសុខភាពពិភពលោក បានរកឃើញថា ៤០%នៃសិស្សវិទ្យាល័យនៅរាជធានីភ្នំពេញចាប់ផ្ដើមសេពគ្រឿងស្រវឹងមុនអាយុ១៨ឆ្នាំ។ ២០% នៃសិស្សវិទ្យាល័យដែលជាអ្នកសេពគ្រឿងស្រវឹងធ្លាប់សេពគ្រឿងស្រវឹងរហូតដល់ស្រវឹងខ្លាំង (អង្គការសុខភាពពិភពលោក, ២០១៦)។
នៅក្នុងការប្រកួតជានិយាយសាធារណៈវគ្គពាក់កណ្ដាលផ្ដាច់ព្រ័ត្រដែលរៀបចំដោយអង្គការចលនាដើម្បីសុខភាពកម្ពុជាកាលពីថ្ងៃទី ២៨ ខែកុម្ភៈ យុវជន៩រូប បានលើកឡើងប្រហាក់ប្រហែលគ្នាអំពីភាពគគ្រឹកគគ្រេងនៃការផ្សាយពាណិជ្ជកម្មគ្រឿងស្រវឹងក៏គ្មានដែនកំណត់ដែលពួកគេបានសង្កេតឃើញ។ តើការផ្សាយពាណិជ្ជកម្មគ្រឿងស្រវឹងមានទំនាក់ទំនងយ៉ាងដូចម្ដេចទៅនឹងការប្រើប្រាស់គ្រឿងស្រវឹង? ៩១%នៃប្រជាពលរដ្ឋកម្ពុជាគិតថាការផ្សាយពាណិជ្ជកម្មគ្រឿងស្រវឹងគឺជាកត្តាចំបងទាក់ទងយុវជននិងកុមារសេពគ្រឿងស្រវឹង (សាកលវិទ្យាល័យភូមិន្ទភ្នំពេញ, ២០១៥)។ យ៉ាងណាមិញ ការផ្សាយពាណិជ្ជកម្មគ្រឿងស្រវឹងនឹងបន្តជាប្រធានបទសម្រាប់ការប្រកួតនិយាយជាសាធារណៈវគ្គផ្ដាច់ព្រ័ត្រនៅថ្ងៃទី១៩ ខែមីនា ឆ្នាំ២០១៨ ប្រារព្ធនៅមជ្ឈមណ្ឌល សហប្រតិបត្តិការកម្ពុជា-កូរ៉េ ក្នុងសាកលវិទ្យាល័យភូមិន្ទភ្នំពេញ។
យុវជន៥រូប មកពីសាកលវិទ្យាល័យភូមិន្ទភ្នំពេញ សាកលវិទ្យាល័យន័រតុន និង សាកលវិទ្យាល័យភូមិន្ទកសិកម្ម ដែលបានឆ្លងផុតវគ្គពាក់កណ្ដាលផ្ដាច់ព្រ័ត្រនឹងធ្វើការវិភាគលម្អិតចំពោះការផ្សាយពាណិជ្ជកម្មគ្រឿងស្រវឹងដែលពួកគេបានឮឬបានឃើញក្នុងជីវភាពប្រចាំថ្ងៃពួកគេ រួមនឹងផ្ដល់អនុសាសន៍ចំពោះការទប់ស្កាត់ផលប៉ះពាល់ដែលកើតចេញពីការផ្សាយពាណិជ្ជកម្មគ្រឿងស្រវឹងផងដែរ។ គួរបញ្ជាក់ថាការប្រកួតនេះរៀបចំឡើងក្នុងគោលបំណងផ្ដល់ឱកាសឲ្យយុវជនចូលរួមកាត់បន្ថយផលប៉ះពាល់ជាអវិជ្ជមានដែលកើតចេញពីការប្រើប្រាស់គ្រឿងស្រវឹងនៅកម្ពុជាតាមរយៈទេពកោសល្យក្នុងការនិយាយរបស់ពួកគេ។ បេក្ខជនជ័យលាភីលេខ១ដល់លេខ៣នឹងទទួលបានរង្វាន់រៀងគ្នាជាទឹកប្រាក់ ពី១លាន២សែនរៀល ៨សែនរៀល និង ៤សែនរៀល។
សូមបញ្ជាក់ថា៖តាមរបាយការរបស់អង្គការចលនា ដើម្បីសុខភាពកម្ពុជាបានឲ្យដឹងថាការប្រើប្រាស់គ្រឿងស្រវឹង អាចបង្កឲ្យមានផលប៉ះពាល់ដល់សុខភាព ជំងឺមិនឆ្លងមានជាង២០០មុខ ដែលបង្កឲ្យមានគ្រោះថ្នាក់ចរាចរ ករណីអំពើហឹង្សា និងខាតបង់ថវិកាជាតិ ។ បាត់បង់ជីវិតប្រជាពលរដ្ឋជិត២៥០នាក់ក្នុងឆ្នាំ២០១៦ ដោយសារគ្រោះថ្នាក់ចរាចរបណ្តាលមកពីគ្រឿងស្រវឹង និងខាតបង់ទ្រព្យសម្បត្តិប្រហែល ៤៤លានដុល្លារនៅក្នុងឆ្នាំ២០១១៕ ដោយ ៖ កូឡាប
