បន្ទាយមានជ័យ ៖ អតីតបុគ្គលិកកាស៊ីណូម្នាក់ ដែលកម្លាំងនគរបាលឃាត់ខ្លួនអតីតបុគ្គលិកក្រុមហ៊ុនល្បែងកាស៊ីណូម្នាក់ ករណីជួញដូរខុសច្បាប់ថ្នាំពេទ្យខុសវេជ្ជសាស្ត្រ ព្រោះវាអាចកែបំប្លែងជាគ្រឿងញៀនស្រវឹងខេតាមីនខុសច្បាប់បាន។
ការបង្ក្រាបហើយចោទប្រកាន់ពីបទជួញដូរនិងដឹកជញ្ជូនខុសច្បាប់នូវសារធាតុញៀននោះ ត្រូវកសាងសំណុំរឿងបញ្ជូនទៅតុលាការនៅព្រឹកថ្ងៃទី១៩ ខែមីនា ឆ្នាំ២០១៨ ។
ជនសង្ស័យមានឈ្មោះ វុធ ស្រីម៉ិច ភេទស្រី អាយុ២៧ឆ្នាំ អតីតបុគ្គលិកកាស៊ីណូមួយនៅក្រុងប៉ោយប៉ែត បច្ចុប្បន្នគ្មានមុខរបរពិតប្រាកដ រស់នៅភូមិអូរជ្រៅ សង្កាត់ប៉ោយប៉ែត ក្រុងប៉ោយប៉ែតខេត្ត បន្ទាយមានជ័យ។
កម្លាំងនគរបាលក្រុងប៉ោយប៉ែត សហការនិងកម្លាំងនគរបាលការិយាល័យប្រឆាំងគ្រឿងញៀនខេត្តនិងកម្លាំងមន្ទីរប្រឆាំងគ្រឿងញៀន(BLO) បង្ក្រាបចាប់ខ្លួនស្ត្រីនោះ កាលពីថ្ងៃទី១៧ ខែមីនា នៅចំណុចខាងមុចហាងគុយទាវកាស៊ីណូព្រីនសេស ស្ថិតនៅភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត។
លោកឧត្តមសេនីយ៍ត្រី ចាប សុផាប្ញទ្ធិ ស្នងការរងទទួលផែនប្រឆាំងបទល្មើសនៃស្នងការដ្ឋាននគរបាលខេត្តបន្ទាយមានជ័យឲ្យដឹងថា ៖ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យបានបញ្ជានិងលោក មាស ច័ន្ទពិសិដ្ឋ បានសម្របសម្រួលនីតិវិធីរឿងនេះ។
លោកវរសេនីយ៍ត្រី ង៉េង សុខជា នាយការិយាល័យនគរបាលប្រឆាំងគ្រឿងញៀនខេត្តនៃស្នងការដ្ឋាននគរបាលខេត្តបន្ទាយមានជ័យបានឱ្យដឹងថា ៖ ការបង្ក្រាបនេះ បន្ទាប់ពីមានការយកថ្នាំពេទ្យម្យ៉ាងដែលអាចផ្សំជាថ្នាំញៀនស្រវឹងបានប្រភេទខេតាមីន ( Ketamine ) យកទៅប្រើប្រាស់ក្នុងក្លឹបរាំកម្សាន្តឌីស្កូនៅចំណុចប្លុកកាស៊ីណូក្រុងប៉ោយប៉ែត។ ជំនាញក៏បានកំណត់មុខសញ្ញា ហើយឃាត់ខ្លួនជនសង្ស័យព្រមទាំងម៉ូតូ១គ្រឿង។
សមត្ថកិច្ចឆែកឆេរត្រួតពិនិត្យនៅក្នុងកែបម៉ូតូរកឃើញថ្នាំពេទ្យវេជ្ជសាស្ត្រវត្ថុរាវច្រកដបឈ្មោះ (ខេតាមីន) ចំនួន២ប្រអប់ធំស្មើនិង១៥០ដបមានទម្ងន់ទឹកថ្នាំ១៥០០ក្រាម។ ថ្នាំញៀនខេតាមីន (Ketamine) ត្រូវគេចាត់ទុកជាគ្រឿងញៀនដូចថ្នាំញៀនអ៊ិចស្តាស៊ីដែរ៕ ដោយ ៖ បន្ទាយ