ភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី១៩ ខែមីនា ឆ្នាំ២០១៨នេះ បានចេញសេចក្តីជូនដំណឹង ស្តីពីថ្ងៃឈប់បុណ្យចូលឆ្នាំខ្មែរប្រពៃណីជាតិ អនុញ្ញាតឲ្យកម្មករនិយោជិតទាំងអស់របស់ខ្លួលឈប់សម្រាកដោយមានប្រាក់ឈ្នួលនាឱកាសបុណ្យ ចូលឆ្នាំខ្មែរខាងមុខនេះ ក្នុងរយៈពេលបួនថ្ងៃ គឺពីថ្ងៃទី១៤ ១៥ ១៦ និងថ្ងៃទី១៧ ខែមេសា ឆ្នាំ២០១៨ ជំនួសឲ្យថ្ងៃទី១៥ដែលត្រូវចំថ្ងៃ អាទិត្យ។
ក្រសួងសូមបញ្ជាក់ថា ក្នុងករណីចាំបាច់បំផុត ដែលសហគ្រាស គ្រឹះស្ថាន មិនអាចបញ្ឈប់សកម្មភាពរបស់ខ្លួន ក្នុងឱកាសថ្ងៃឈប់ សម្រាកចូលឆ្នាំខ្មែរខាងមុខនេះ ម្ចាស់ និងនាយកសហគ្រាស គ្រឹះស្ថាន ត្រូវសម្របសម្រួលជាមួយកម្មករ និយោជិតឲ្យមានស្ម័គ្រចិត្ត ព្រមទាំងបែងចែកឲ្យមានពេលវេលា និងថ្ងៃឈប់សម្រាកបុណ្យបានសមសមស្រប។
កម្មករនិយោជិតដែលធ្វើការថ្ងៃឈប់បុណ្យចូលឆ្នាំនេះ មានសិទ្ធិទទួលនូវប្រាក់បំណាច់បន្ថែមដែលមានចំនួនស្មើនឹងប្រាក់ឈ្នួល ថ្ងៃធ្វើការធម្មតា។
ក្នុងករណីមានលទ្ធភាព ម្ចាស់ ឬនាយកសហគ្រាស គ្រឹះស្ថាន គួរចាត់តាំងឲ្យមានការលេងល្បែងកម្សាន្ត នានា នៅតាមសហគ្រាស គ្រឹះស្ថានរបស់ខ្លួន ដើម្បីចូលរួមអបអរសាទរពិធីបុណ្យចូលឆ្នាំ និងដើម្បីលើកទឹកចិត្តដល់បងប្អូនកម្មករនិយោជិត ដែលបានបំពេញការងារកន្លងមក។ ក្រសួងការងារ មានក្តីសង្ឃឹមជឿជាក់ថា ម្ចាស់ និងនាយកសហគ្រាស គ្រឹះស្ថានទាំងអស់ នឹងអនុវត្តន៍តាមសេចក្តីជូនដំណឹងនេះឲ្យបានត្រឹមត្រូវបំផុត៕ ដោយ ៖ បញ្ញាស័ក្តិ