ប្រធានាធិបតីអាមេរិច ដូណាល់ ត្រាំ បានស្នើឲ្យមានការដាក់ទោសប្រហារជីវិតចំពោះអ្នកជួញដូរគ្រឿងញឿន ដែលសំណើររបស់លោកនេះគឺជាផ្នែកមួយនៃគំរោងរបស់លោកក្នុងកិច្ចប្រឹងប្រែងប្រឆាំងទៅនឹងការរីករាលដាលនៃការប្រើប្រាស់គ្រឿងញៀន។ នេះបើតាមការចេញផ្សាយរបស់ BBC។
លោកថ្លែងដូច្នេះថា រដ្ឋបាលរបស់លោកព្យាយាមផ្លាស់ប្តូរច្បាប់ ដើម្បីប្រហារជីវិតអ្នកចែកចែកគ្រឿងញៀន ប៉ុន្តែវានឹងប្រឈមនឹងការ ប្រឆាំងផ្នែកនយោបាយ និងផ្លូវច្បាប់។
លោកត្រាំ កាលពីថ្ងៃច័ន្ទម្សិលមិញនេះ ត្រូវបានគេស្រែកអបអរ ខណៈពេលលោកបានថ្លែងប្រាប់ហ្វូងមនុស្សនៅក្នុងទីក្រុង Manchester រដ្ឋ New Hampshire ដូច្នេះថា “ប្រសិនជាយើងមិនមានវិធានការតឹងរឹងលើអ្នកចែកចាយគ្រឿងញៀន ពួកយើងនឹងខ្ជះខ្ជាយពេលវេលារបស់ពួកយើង”។
“វិធានការក្តៅ រួមមានទោសប្រហារជីវិត”។
សូមបញ្ជាក់ថា ប្រជាជនអាមេរិចប្រមាណ ២,៤លាននាក់ ត្រូវបានគេព្យាករណ៍ថា កំពុងតែញៀនថ្នាំ។ វិបត្តិគ្រឿងញៀននេះ បានធ្វើឲ្យមនុស្សបាត់បង់ជីវិត ៦៣,៦០០នាក់ទូទាំងប្រទេសកាលពីឆ្នាំ ២០១៦។ នេះបើតាមការបញ្ជាក់របស់មន្ត្រីសុខាភិបាលអាមេរិច៕ សុភ័ក្ត្រ
