ក្រសួងការពារជាតិអាមេរិច បានប្រកាសនៅថ្ងៃច័ន្ទម្សិលមិញនេះថា សមយុទ្ធយោធារួមគ្នារវាងអាមេរិច និងកូរ៉េខាងត្បូងនឹងចាប់ផ្តើមធ្វើឡើងវិញនៅ ថ្ងៃទី ១ ខែមេសានេះ។ នេះបើតាមការចេញផ្សាយរបស់ CNN។
ការប្រកាសពីការត្រៀមខ្លួនបន្តធ្វើសមយុទ្ធជាមួយនឹងសម្ព័ន្ធមិត្តកូរ៉េខាងត្បូងនេះ កើតឡើងខណៈដែលប្រធានាធិបតី ដូណាល់ ត្រាំ បានត្រៀមខ្លួនដើម្បីធ្វើកិច្ចប្រជុំកំពូលជាមួយនឹងមេដឹកនាំកូរ៉េខាងជើង គីម ជុងអ៊ុន ដែលអាចនឹងកើតឡើងនៅចុងខែឧសភា។
អ្នកនាំពាក្យមន្ទីរបញ្ចកោណអាមេរិច ឈ្មោះ Rob Manning បានថ្លែងនៅក្នុងសេចក្តីប្រកាសដូច្នេះថា “រដ្ឋមន្ត្រីការពារជាតិ James N. Mattis និងរដ្ឋមន្ត្រីការពារជាតិកូរ៉េខាងត្បូង Song Young-moo បានព្រមព្រៀងគ្នាបន្តធ្វើសមយុទ្ធរួមគ្នា ដោយរួមមានសមយុទ្ធ Foal Eagle និង Key Resolve”។
សូមបញ្ជាក់ថា សមយុទ្ធរួមគ្នាប្រចាំឆ្នាំរវាងអាមេរិច និងកូរ៉េខាងត្បូង គ្រោងធ្វើកាលពីខែមុន ប៉ុន្តែសម្ព័ន្ធមិត្តទាំងពីរបានព្រមព្រៀងគ្នាផ្អាកវាបណ្តោះអាសន្ន ដើម្បីកាត់បន្ថយភាពតានតឹងនៅក្នុងតំបន់ ខណៈដែលទេសកូរ៉េខាងត្បុង ធ្វើជាម្ចាស់ផ្ទះព្រឹត្តិការណ៏កីឡាអូឡាំពិចរដូវរងា។
កូរ៉េខាងជើងតែងតែថ្កោលទោសសមយុទ្ធយោធារួមគ្នា រវាងអាមេរិច និងកូរ៉េខាងត្បូង និងចាត់ទុកសមយុទ្ធរបស់ពួកគេថា គឺជាការត្រៀមខ្លួនឈ្លានពានកូរ៉េខាងជើង។ កាលពីមុន ព្យុងយ៉ាង និងចិន បានស្នើឲ្យអាមេរិចបញ្ឍប់ការធ្វើសមយុទ្ធនោះ ដើម្បីបើកឲ្យមានកិច្ចចរចារផ្នែកការទូត៕ សុភ័ក្ត្រ
