ខេត្តព្រះសីហនុ ៖ រដ្ឋបាលខេត្តព្រះសីហនុ កាលពីថ្ងៃចន្ទ ទី១៩ ខែមីនា ឆ្នាំ២០១៨ បានរៀបចំកិច្ចប្រជុំពិភាក្សាឆ្លងរបាយការណ៍សិក្សាលទ្ធភាពអនុវត្តគម្រោងស្ថាបនាផ្លូវលេខ ៤៥២ ប្របឆ្នេរសមុទ្រ មានប្រវែង ៩,៣៤០ ម៉ែត្រ និងទទឹង ១៨ ម៉ែត្រ ចាប់ពីផ្លូវជាតិលេខ ៤៥ ស្ថិតក្នុងឃុំរាម ស្រុកព្រៃនប់ ភ្ជាប់ទៅកាន់ផ្លូវលេខ១៤៩សេ ស្ថិតនៅក្នុងសង្កាត់លេខ ៤ ក្រុងព្រះសីហនុ ខេត្តព្រះសីហនុ។ កិច្ចប្រជុំនេះ ក្រោមអធិបតីភាព លោក ជាវ វិជ្ជាក់ អភិបាលរងខេត្តព្រះសីហនុ ដោយមានមន្ត្រីតំណាងមកពីមន្ទីរស្ថាប័នពាក់ព័ន្ធក្រោមឱវាទខេត្ត បានចូលរួមពិភាក្សា។
ការស្ថាបនាផ្លូវប្របឆ្នេរសមុទ្រនេះ រដ្ឋបាលខេត្តព្រះសីហនុ បានរៀបចំ ឲ្យមានក្រុមការងារចម្រុះចុះសិក្សាលទ្ធភាពអនុវត្តគម្រោងស្ថាបនាផ្លូវលេខ ៤៥២ (តំបន់ពយម៉ាចូវ) ដោយការសិក្សានេះ មានគោលបំណងស្វែងរកអត្ថប្រយោជន៍ និងផលប៉ះពាល់ពីគម្រោងស្ថាបនាកំណាត់ផ្លូវលេខ៤៥២ ក្រោមជំនួយឥតសំណង របស់សាធារណរដ្ឋសង្គមនិយមវៀតណាម តាមរយៈ លោក ង្វៀន ហ្វជុង អគ្គលេខាធិការមជ្ឈឹមបក្សកុម្មុយនីស្តវៀតណាម ក្នុងដំណើរបំពេញទស្សនៈកិច្ចផ្លូវរដ្ឋ នៅខេត្តព្រះសីហនុ កាលពីថ្ងៃទី២១ ដល់ថ្ងៃទី២២ ខែកក្កដា ឆ្នាំ២០១៧។
លទ្ធផល នៃកិច្ចពិក្សានេះបង្ហាញថា កំណត់ផ្លូវលេខ ៤៥២ ខាងលើ គឺមានចំណុចចាប់ផ្តើមខ្នែងចេញពីផ្លូវលេខ៤៥ ចន្លោះគីឡូម៉ែត្រលេខ៧ និងលេខ៨ ស្ថិតនៅភូមិអុង ឃុំរាម ស្រុកព្រៃនប់ ដោយឆ្ពោះមកតភ្ជាប់ជាមួយផ្លូវខេត្តលេខ១៤៩ សេ ក្បែរវត្តអូរត្រេះ ស្ថិតនៅភូមិ៦ សង្កាត់លេខ៤ ក្រុង-ខេត្តព្រះសីហនុ មានចំងាយ ១១ គីឡូម៉ែត្រ ដោយគ្រោងចំណាយថវិកាសម្រាប់គម្រោងនេះចំនួន ១៧,៩០៤,០១៨.០០ ដុល្លារសហរដ្ឋអាមេរិក។ មន្ត្រីរដ្ឋបាលខេត្តព្រះសីហនុ បានឲ្យដឹងថា គម្រោងស្ថាបនាផ្លូវប្របមាត់សមុទ្រ ចាប់ពីឆ្នេរសមុទ្ររាម ស្ថិតក្នុងឃុំរាម ស្រុកព្រៃនប់ តភ្ជាប់ឆ្ពោះមកសង្កាត់លេខ៤ ក្រុង-ខេត្តព្រះសីហនុ នាពេលនេះមិនមានឧបសគ្គអ្វីរារាំងនោះទេ ហើយនឹងស្ថាបនាចេញជារូបរាង ក្នុងពេលដ៏ឆាប់ខាងមុខនេះ៕ ដែន សីមា