យោងតាម The New Indian Express ស្ត្រីរងគ្រោះឈ្មោះ Uma Oram បានកំពុងប្រើប្រាស់ទូរស័ព្ទរបស់នាង មុនពេលវាផ្ទុះ ។ ខណៈនាងបានកំពុងនិយាយទៅកាន់សាច់ញាតិរបស់នាង នៅពេលនោះ នាងកត់សម្គាល់ឃើញថា ថ្មទូរស័ព្ទរបស់នាងបានចេញទឹក ដូច្នេះ នាងសម្រេចចិត្តសាកវា ។ នាងបានដោតទូរស័ព្ទរបស់នាង ទៅនឹងឆ្នាំងសាក និងបន្តការសន្ទនា ។ ភ្លាមៗនោះ ស្រាប់តែទូរស័ព្ទរបស់នាងផ្ទុះឡើង បណ្តាលឲ្យនាងដួលសន្លប់ស្តូកស្តឹងតែម្តង ។
នាងត្រូវបានបញ្ជូនទៅកាន់មន្ទីរពេទ្យ ទីកន្លែងដែលវេជ្ជបណ្ឌិតបានរកឃើញថា នាងបានរងរបួសរលាកធ្ងន់ធ្ងរនៅត្រង់ដៃ, ទ្រូង និងជើង ។
ប៉ុន្តែ គួរឲ្យសោកស្តាយ នៅពេលនាងបានមកដល់មន្ទីរពេទ្យបង្អែកស្រុក (DHH) នាងត្រូវបានគ្រូពេទ្យនៅទីនោះប្រកាសស្លាប់ ។
បងប្រុសរបស់នាងឈ្មោះ Durga Prasad Oram និយាយថា៖ «ទូរស័ព្ទបានកំពុងសាកថ្ម នៅពេលនោះនាងចាប់ផ្តើមនិយាយទៅកាន់សាច់ញាតិ ។ ហើយថ្មរបស់វាបានផ្ទុះឡើងភ្លាមៗតែម្តង ។ មុនពេលយើងអាចដឹងនូវអ្វីពិតប្រាកដបានកើតឡើង Uma បានដេកដួលសន្លប់ទៅហើយ ។ នាងត្រូវបានប្រកាសស្លាប់នៅមន្ទីរពេទ្យ» ។
គេពុំច្បាស់ថា ទូរស័ព្ទរបស់នាងជាប្រភេទម៉ូឌែលអ្វីនោះទេ ប៉ុន្តែ រូបភាពបានបង្ហាញយីហោ Nokia នៅលើទូរស័ព្ទដែលបានផ្ទុះ ។ ក្រុមគ្រួសាររបស់ Uma បានទាមទារសំណងពីក្រុមហ៊ុនទូរស័ព្ទនេះ ព្រោះថា ទូរស័ព្ទនេះទើបតែបើកដំណើរការកាលពីឆ្នាំមុនប៉ុណ្ណោះ ។
ទោះយ៉ាងណា Daily Mail បានរាយការណ៍ថា ក្រុមហ៊ុន Nokia បានបដិសេធថា ទូរស័ព្ទនេះត្រូវបានផលិត ឬ លក់ដោយក្រុមហ៊ុន HMD Global ដែលជាទីផ្សារថ្មីរបស់ទូរស័ព្ទ Nokia ។
ទោះយ៉ាងណា បច្ចុប្បន្ននេះ ប៉ូលីសកំពុងស៊ើបអង្កេតករណីនេះ និងប្រគល់សាកសពនារីរងគ្រោះទៅឲ្យគ្រួសារធ្វើបុណ្យតាមប្រពៃណី ៕ ចន្ទី