ថ្ងៃទី ២០ ខែមីនា មហាសន្និបាតលើកទី ១ នៃសភាតំណាងប្រជាជនទូទាំងប្រទេសចិននីតិកាលទី ១៣ បានបិទបញ្ចប់នៅក្រុងប៉េកាំង ។ឯកឧត្តមស៊ី ជីនភីង ប្រធានរដ្ឋចិនបានឡើងថ្លែងសុន្ទរកថាជាលើកដំបូងបន្ទាប់ពីឯកឧត្តមបានជាប់ឆ្នោតបន្តអាណាត្តិជាប្រធានរដ្ឋចិនដោយលើកឡើងថា ឯកឧត្តមនឹងបន្តអនុវត្តតួនាទីរបស់ខ្លួនដែលកំណត់ដោយរដ្ឋធម្មនុញ្ញប្រកបដោយភាពស្មោះត្រង់ដូចពេលមុនៗដែរ ដើម្បីបម្រើដល់ប្រជាជន និងទទួលការពិនិត្យអង្កេតពីសំណាក់ប្រជាជន ។ ឯកឧត្តមគូសបញ្ជាក់ថា យុគសម័យថ្មីនៃសង្គមនិយមប្រកបដោយលក្ខណៈពិសេសចិនគឺជារបស់ប្រជាជនចិនគ្រប់រូប ឲ្យតែសាមគ្គីគ្នាជាធ្លុងមួយ និងធ្វើការតស៊ូជាមួយគ្នា នោះនឹងគ្មានកម្លាំងណាមួយដែលអាចរារាំងប្រជាជនចិនក្នុងការបោះជំហានទៅសម្រេចសុបិនរបស់ខ្លួននោះឡើយ ។
ថ្លែងក្នុងសុន្ទរកថានេះផងដែរ ឯកឧត្តមស៊ី ជីនភីង បានលើកឡើងទៀតថា ប្រជាជនគឺជាគោលចម្បងតាំងពីដើមដល់ចប់ ។ ឯកឧត្តមផ្តល់អនុសាសន៍ឲ្យមន្ត្រីនៃស្ថាប័នរដ្ឋទាំងអស់ មិនថាខ្លួនមានឋានៈខ្ពង់ខ្ពស់ប៉ុនណា ក៏ត្រូវចងចាំថាប្រទេសខ្លួនជាសាធារណរដ្ឋប្រជាមានិតចិន ត្រូវទុកប្រជាជនក្នុងឋានៈខ្ពស់ជាងគេបង្អស់ក្នុងក្រអៅដួងចិត្តរបស់ខ្លួនជាប់រហូត ត្រូវបម្រើដល់ប្រជាជនដោយស្មោះត្រង់ជាប់រហូត ត្រូវខិតខំប្រឹងប្រែងធ្វើការងារដើម្បីផលប្រយោជន៍និងសុខសុភមង្គលរបស់ប្រជាជន ។
ឯកឧត្តមស៊ី ជីនភីងបានគូសបញ្ជាក់ទៀតថា សិទ្ធិអំណាចគ្រប់យ៉ាងរបស់ជាតិគឺរបស់ប្រជាជន ។ ទាល់តែប្រជាជនមានទំនុកចិត្ត ទើបប្រទេសជាតិមានអនាគតដ៏ល្អប្រសើរ និងមានកម្លាំងខ្លាំងក្លា ។
ឯកឧត្តម ស៊ី ជីនភីងបានគូសបញ្ជាក់ថា ការគាំពារអធិបតេយ្យភាពនិងបូរភាពដែនដី សម្រេចការបង្រួបបង្រួមទាំងស្រុងរបស់មាតុប្រទេស ជាក្តីបំណងរួមរបស់កុលបុត្រកុលធីតាជនជាតិចិនគ្រប់រូប និងជាផលប្រយោជន៍ជាមូលដ្ឋាននៃជនជាតិចិន។ នៅចំពោះមុខសច្ចធម៌ជនជាតិនិងចរន្តប្រវត្តិសាស្ត្រ ទង្វើនិងឧបាយកលទាំងអស់ដែលប៉ុនប៉ងធ្វើអបគមន៍មាតុប្រទេសសុទ្ធតែនឹងត្រូវទទួលបរាជ័យទាំងអស់។
ឯកឧត្តម ស៊ី ជីនភីងបានរំលឹកឡើងវិញថា ប្រទេសចិននឹងមិនធ្វើឲ្យមានការពលីផលប្រយោជន៍នៃប្រទេសដទៃដើម្បីជាថ្នូរនឹងការអភិវឌ្ឍរបស់ប្រទេសខ្លួនជាដាច់ខាត ការអភិវឌ្ឍរបស់ប្រទេសចិននឹងមិនកកើតទៅជាការគំរាមកំហែងដល់ប្រទេសណាមួយនោះទេ ប្រទេសចិននឹងមិនធ្វើអនុត្តរភាពជាដរាបហើយក៏មិនវាតទីជារៀងរហូត។
ឯកឧត្តម ស៊ី ជីនភីងបានថ្លែងទៀតថា បក្សកុម្មុយនិស្តចិនត្រូវតែរ៉ាប់រងបន្ទុកប្រវត្តិសាស្ត្រដែលដឹកនាំប្រជាជនឲ្យធ្វើបដិវត្តន៍សង្គមដ៏មហិមា ប្រកាន់ខ្ជាប់ការគ្រប់គ្រងបក្សដោយយុត្តិធម៌និងកាន់អំណាចដើម្បីប្រជាជន រួមសុខទុក្ខជាមួយប្រជាជនព្រមនិងសាមគ្គីរួបរួមកម្លាំងជាមួយប្រជាជនដើម្បីធ្វើការតស៊ូប្រយុទ្ធជាមួយគ្នា៕