ភ្នំពេញ ៖ អភិបាលរាជធានីភ្នំពេញលោកឃួង ស្រេងបានប្រកាសថា រដ្ឋបាលរាជធានីភ្នំពេញនឹងមិនយកប្រាក់ពីអាជីវករ លើការ សាងសង់ផ្សារច្បារអំពៅឡើងវិញឡើយ រួមនឹងការផ្តល់សេវាផ្សេងៗ មិនយកប្រាក់ផងដែរ ។ លោកថា នេះជាកាដូររបស់សម្តេចតេជោហ៊ុន សែន នាករដ្ឋមន្ត្រីនៃព្រះរាជាណាចក្រកម្ពុជាផ្ញើជូនបងប្អូនអាជីវករទាំងអស់។លោកបានបន្ថែមថា ក្រៅពីកាដូរបស់សម្តេចតេជោនាយករដ្ឋមន្ត្រីនោះ អាជ្ញាធររាជធានីភ្នំពេញ ក៏បានជួយធ្វើការជួសជុលនូវប្រព័ន្ធលូ និងផ្លូវបេតុងជុំវិញផ្សារ ផងដែរ ដើម្បីងាយស្រួលដល់បងប្អូនអាជីវករធ្វើដំណើរ កុំឲ្យមានការកកស្ទះ។
ការប្រកាសបែបនេះរបស់លោកឃួង ស្រេងបានធ្វើឡើងកាលពីរសៀលថ្ងៃទី២០មីនា ខណៈដែលលោកដឹកនាំមន្ត្រីនិងអាជ្ញាធរ ចុះសួរសុខទុក្ខនិងពិនិត្យមើលស្ថានភាពផ្សារច្បារអំពៅក្រោយពីត្រូវអគ្គីភ័យឆាបឆេះអស់រាប់រយតូបនោះ។
លោកឃួង ស្រេងបានបញ្ជាក់នៅចំពោះមុខអាជីវករថា សម្តេចតេជោហ៊ុន សែន នាករដ្ឋមន្ត្រីបានសម្រេចរួចហើយ ដោយសម្រេចអោយមានការការសាងសង់ផ្សារច្បារអំពៅឡើងវិញ ហើយតួផ្សារទាំងមូលគឺសម្តេចជាអ្នកចេញលុយទាំងស្រុង ។ចំណែកបងប្អូនអាជីវករទាំងអស់ត្រូវសាងសង់តូបឡើងវិញដោយខ្លួនឯង។
លោកឃួង ស្រេងបានបញ្ជាក់នៅចំពោះមុខអាជីវករថា ការសាងសង់ផ្សារច្បារអំពៅឡើងវិញ គឺមិនអោយមានការដំឡើងចំនួនតូបឡើយ ។ បើបងប្អូនទទួលបានព័ត៌មានថា មានការដំឡើងចំនួនតូបនោះ សូមរាយការណ៍មកអាជ្ញាធររាជធានីភ្នំពេញ អាជ្ញាធរនឹងមានវិធានការភ្លាម។ លោកបន្តថា ក្រៅពីការសាងសង់តួផ្សារអោយហើយនោះ រដ្ឋបាលរាជធានីភ្នំពេញ ក៏នឹងកសាងផ្លូវ ជុំវិញផ្សារនិងដាក់អោយផងដែរ។ទោះបីជាយ៉ាងណាក្តីលោកឃួង ស្រេងបានសំណួមពរដល់បងប្អូនអាជីវករទាំងអស់ជួយចូលរួមលើបញ្ហាអនាម័យបរិស្ថាន ក្នុងផ្សារអោយបានល្អ។
គួររំលឹកថា គ្រោះអគ្គិភ័យដ៏អាក្រក់ឆេះផ្សារច្បារអំពៅនេះ បានកើតឡើងកាលពីវេលាម៉ោង១១ និង៣០នាទីយប់ ថ្ងៃព្រហស្បតិ៍ ទី១៥ ខែមីនា ឆ្នាំ២០១៨ ដែលបានឆេះតូបក្នុងផ្សារច្បារអំពៅ ស្ថិតនៅក្នុងភូមិកណ្តាល សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។
ចំពោះមូលហេតុដែលបង្កឲ្យមានអគ្គិភ័យលើកនេះ សមត្ថកិច្ចបានបញ្ជាក់ថា បណ្តាលមកឆ្លងចរន្តអគ្គិសនី (ទុស្សេ) ម្តុំតូបឈាងខាងកើតផ្សារ បង្កជាអណ្តាតភ្លើងឆេះតូបតគ្នាៗឡើងយ៉ាងសន្ធោសន្ធៅតែម្ដង ដោយបំផ្លាញអស់តូបសរុប ៥៨៨តូប ក្នុងនោះតូបក្នុងតួផ្សារ ចំនួន៣៤២តូប និងតូបក្រៅតួផ្សារ ចំនួន២៤៤តូប ប៉ុន្តែមិនមានរងរបួសដល់អាយុជីវិតមនុស្សនោះទេ។
ក្នុងឱកាសនោះដែរ ក្រុមអាជីវករផ្សារច្បារអំពៅ ដែលទទួលរងគ្រោះដោយអគ្គិភ័យបានសម្តែងការសាទរគាំទ្រយ៉ាងកក់ក្តៅក្រៃលែងចំពោះការយកចិត្តទុកដាក់ពីសម្តេចតេជោ ចំពោះអាជីវកររងគ្រោះបន្ទាប់ពីរងគ្រោះដោយអគ្គិភ័យ។
ក្រុមអាជីវករផ្សារច្បារអំពៅបានសាទរនិងគាំទ្រសម្តេចតេជោមានទឹកចិត្តអាណិតអាសូររបស់សម្តេច ព្រមទាំងការផ្តល់ជូនតាមសំណូមពររបស់ក្រុមអាជីវកររួមមាន។ ១. សាងសង់ឡើងវិញ ដំបូលផ្សារដែលបានខូចខាត។ ២. រៀបចំហេដ្ឋារចនាសម្ព័ន្ធផ្លូវថ្នល់ បណ្ដាញលូជុំវិញផ្សារ និងចាក់បេតុងក្នុងបរិវេណផ្សារ៣. អនុញ្ញាតឱ្យអាជីវករសាងសង់តូបដោយខ្លួនឯង តាមចំនួនតូបដែលធ្លាប់មាន ដោយគិតគូរមិនអោយមានការលួចបន្ថែមតូបលក់ដូរឡើយ។ ៤. សម្រួលការរៀបចំឯកសារផ្សេងៗដើម្បីសាងសង់អោយបានឆាប់រហ័ស និងដោយឥតគិតថ្លៃ។
នៅល្ងាចថ្ងៃទី២០មីនានេះ លោកឃួង ស្រេង អភិបាលរាជធានីភ្នំពេញបានចុះផ្ទាល់ដល់ទីតាំងផ្សារច្បារអំពៅដែលបានឆាបឆេះដោយគ្រោះអគ្គីភ័យកាលពីពេលថ្មីៗកន្លងមកនេះ។ ក្នុងនោះលោកអភិបាលបានណែនាំអោយអាជ្ញាធរខណ្ឌ សង្កាត់ ប្រធានផ្សារត្រូវបន្តយកចិត្តទុកដាក់ខ្ពស់ជាមួយការខ្វះខាត និងសំណូមពរចាំបាច់ផ្សេងៗរបស់អាជីវករ ព្រមទាំងចាត់មន្ត្រីជំនាញពាក់ព័ន្ធផ្សេងៗពន្លឿនការសំអាតសំណល់ពីអគី្គភ័យ និងរុះរាន់រៀបចំតាមការផ្តល់ជូនខាងលើ ដើម្បីអោយបងប្អូនអាជីវករឆាប់បានចូលលក់ដូរឡើងវិញចៀសវាសប៉ះពាល់ដល់ជីវភាពប្រចាំថ្ងៃរបស់ពួកគាត់៕ ដោយ៖កូឡាប
