មនុស្សយ៉ាងហោចណាស់ចំនួន ៣៥នាក់បានស្លាប់បាត់បង់ជីវិត និងជាច្រើននាក់ទៀតរងរបួស នៅពេលមានការបាញ់គ្រាប់រ៉ូកែតមួយមកលើផ្សារដែលកំពុងមានមនុស្សច្រើន ស្ថិតនៅជាងក្រុង Damascus រដ្ឋធានីរបស់ប្រទេសស៊ីរី។ នេះបើតាមការចេញផ្សាយរបស់ CNN នៅថ្ងៃពុធនេះ។
ប្រភពពីប៉ូលីសបានប្រាប់ទីភ្នាក់ងារសារព៌តមានរដ្ឋស៊ីរី SANA ថា គ្រាប់រ៉ូកែតបានធ្លាក់ចុះផ្សារ Kashkul នៅជាងក្រុង Jaramana ដែលជាផ្នែកមួយរបស់រដ្ឋធានី Damascus។
ជាងក្រុងនៃកន្លែងដែលត្រូវវាយប្រហារដោយគ្រាប់រ៉ូកែត គឺជាតំបន់ដែលស្ថិតក្រោមការគ្រប់គ្រងដោយរដ្ឋាភិបាលស៊ី។ តំបន់នោះទទួលរងការវាយប្រហារពីក្រុមឧទ្ទាមជាញឹកញាប់។
ក្រុមអ្នកឃ្លាំមើលសិទ្ធិមនុស្សស៊ីរី ដែលមានមូលដ្ឋាននៅអង់គ្លេស (SOHR) បានឲ្យដឹងថា ចំនួនអ្នកស្លាប់ អាចនឹងកើនឡើង ដោយសារតែអ្នករងរបួសជាច្រើនកំពុងស្ថិតក្នុងស្ថានភាពធ្ងន់ធ្ងរ៕ សុភ័ក្ត្រ