សាស្ត្រាចារ្យអាមេរិចម្នាក់ មកពីសកលវិទ្យាល័យ Chicago បាននិយាយកាលពីថ្ងៃអង្គារម្សិលមិញនេះថា គ្មានផ្លូវទេដែលកូរ៉េខាងជើងនឹងបោះបង់កម្មវិធីនុយក្លេអ៊ែររបស់ខ្លួនចោលនោះ ពីព្រោះពួក គេមិនមាន ហេតុផលជឿថា អាមេរិចនឹងអនុវត្តកិច្ចព្រមព្រៀងលុបបំបាត់នុយក្លេអ៊ែរចោល ជាមួយពួកគេឡើយ។
សាស្ត្រាចារ្យឈ្មោះ John Mearsheimer បានថ្លែងដូច្នេះថា “កូរ៉េខាងជើងនឹងមិនបោះបង់កម្មវិធីអាវុធនុយក្លេអ៊ែររបស់ខ្លួនឡើយ ហើយប្រទេសចិនក៏នឹងមិនជំរុញឲ្យកូរ៉េខាងជើងធ្វើបែបនោះដែរ។ ហេតុផលគឺថា នៅក្នុងនយោបានអន្តរជាតិ អ្នកមិនអាចទុកចិត្តនរណាម្នាក់បានឡើយ ពីព្រោះអ្នកមិនដឹងប្រាកដពីគោលបំណងរបស់ពួកគេ”។
“គ្មានផ្លូវទេ ដែលកូរ៉េខាងជើងទុកចិត្តលើអាមេរិចនោះ។ ប្រសិនអ្នកជាប្រជាជនកូរ៉េខាងជើង តើអ្នកនឹងទុកចិត្តលើ ដូណាល់ ត្រាំ ឬទេ ហើយតើអ្នកនឹងជឿលើប្រធានាធិបតីអាមេរិចឬទេ?”។
លោកថ្លែងបន្តថា “ខ្ញុំមិនអាចគិតឃើញពីប្រទេសផ្សេងទៀត ដែលត្រូវការអាវុធនុយក្លេអ៊ែរជាងកូរ៉េខាងជើងឡើយ ពីព្រោះអ្នកទាំងអស់គ្នាបានដឹងស្រាប់ហើយថា អាមេរិចកំពុងស្ថិតក្នុងដំណើរផ្លាស់ប្តូររបប (កូរ៉េខាងជើង)។ ដូណាល់ ត្រាំ បាននិយាយរហូតមកពីការផ្លាស់ប្តូររបបនៅក្នុងប្រទេសកូរ៉េខាងជើង”។
សូមបញ្ជាក់ថា ការវិភាគរបស់លោក បានកើតឡើង ខណៈដែលមេដឹកនាំកូរ៉េខាងត្បូង និងអាមេរិចត្រៀមខ្លួនធ្វើកិច្ចប្រជុំកំពូលជាមួយនឹងមេដឹកនាំកំពូល គីម ជុងអ៊ុន ដែលអាចនឹងកើតឡើងនៅចុងខែមេសា និងចុងខែឧសភាខាងមុខ៕ សុភ័ក្ត្រ
