ខេត្តមណ្ឌលគិរី ៖ សាច់សត្វព្រៃជាច្រើនប្រភេទសរុបមានចំនួនជាង ១០០ គីឡូក្រាម ត្រូវបានកម្លាំងសមត្ថកិច្ចចម្រុះ ចុះបង្ក្រាបនៅក្នុងផ្សារសែនមនោរម្យ កាលពីព្រឹកថ្ងៃទី ២១ ខែមីនា ឆ្នាំ ២០១៨។ ក្នុងនោះសម្ថកិច្ចក៏បានឃាត់ខ្លួនអ្នកលក់សាច់សត្វព្រៃ បានម្នាក់បញ្ជូនអោយមន្ត្រីជំនាញ ដើម្បីបន្តអនុវត្តនីតិវិធីច្បាប់។
ប្រភពពីកម្លាំងសមត្ថកិច្ចកងអាវុធហត្ថលើផ្ទៃប្រទេស ឲ្យដឹងថា យុទ្ធនាការការនេះ សមត្ថកិច្ចបង្ក្រាបបានចាប់យកសាច់សត្វព្រៃចំនួន ១១៧គីឡូ ព្រមទាំងឃាត់ខ្លួនអ្នកលក់សាច់សត្វព្រៃខុសច្បាប់បានម្នាក់ ហើយបច្ចុប្បន្នមន្ត្រីជំនាញ់បាននាំយកសាច់សត្វព្រៃទាំងនោះយកទៅដុតចោល។ ចំណែកស្ត្រីអ្នកសាច់សត្វព្រៃ សមត្ថកិច្ចកំពុងសាកសួរឈានដល់បន្តអនុវត្តនីតិវិធីច្បាប់។ ប្រភពខាងលើបានឲ្យដឹងទៀតថា ទីតាំងលក់សត្វព្រៃ គឺនៅផ្ទះស្ត្រីឈ្មោះ សោម គឹមសាង ដោយស្ត្រីរូបនេះ បានលួចរកស៊ីលក់បទល្មើសសាច់សត្វព្រៃនេះ ជាយូរមកហើយ ប៉ុន្តែកន្លងទៅ មិនដែលឃើញសមត្ថកិច្ចចាប់បង្ក្រាបនោះទេ ទើបតែកាលពីព្រឹកថ្ងៃទី២១ ខែមីនា ឆ្នាំ២០១៨នេះ ដោយមានមន្ត្រីអង្គការ វ៉ាយអេត បានដឹកនាំកម្លាំងចម្រុះ ចុះទៅបង្ក្រាប ទីតាំងលក់សាច់សត្វព្រៃខាងលើ ដោយមានកិច្ចសហការណ៍ជាមួយកម្លាំងសមត្ថកិច្ចនៅក្នុងមូលដ្ឋាន រួមមានកម្លាំងអាវុធហត្ថលើផ្ទៃប្រទេស កម្លាំងអាវុធហត្ថខេត្ត មន្ត្រីអង្គការ និង មន្ត្រីរដ្ឋបាលព្រៃឈើខេត្តមណ្ឌលគិរីផងដែរ។
ទាក់ទិនបញ្ហានេះ នាយផ្នែករដ្ឋបាលព្រៃឈើសែនមនោរម្យ លោក ជ័យ សុខា បានឲ្យដឹងដែរថា សត្វព្រៃដែលសមត្ថកិច្ចចុះបង្ក្រាបបាននៅថ្ងៃនេះ មាន ៧ប្រភេទ សរុបចំនួនជាង ១០០គីឡូក្រាម ត្រូវបានជំនាញធ្វើការដុតចោល។ ចំណែកអ្នកលក់សាច់សត្វព្រៃ តម្រូវអោយចូលខ្លួនមកពិន័យតាមច្បាប់ និងធ្វើកិច្ចសន្យាបញ្ឈប់លែងឲ្យលក់សាច់សត្វព្រៃតទៅទៀត។ លោកបន្តថា សត្វទាំងនោះរួមមាន៖ សាច់សត្វកន្ធាយ ពស់ ឈ្លូស ជ្រូកព្រៃ ឆ្មាបា ក្តាន់ញ៉ែង និងសាច់កាំប្រម៉ា សរុបទាំងអស់ចំនួន ១១៧គីឡូក្រាម។
ប្រជាពលរដ្ឋរស់នៅក្រុងសែនមនោរម្យ បានឲ្យដឹងដែរថា ទីតាំងផ្ទះស្ត្រីឈ្មោះ សោម គឹម សាង បានលួចរកស៊ីលក់សត្វព្រៃរាប់ឆ្នាំមកហើយ ប៉ុន្ដែកន្លងមកមិនដែលឃើញមានសមត្ថកិច្ចពីស្ថាប័នពាក់ព័ន្ធណាមួយក្នុងខេត្តនេះ ចេញមុខបង្ក្រាបនោះទេទើបតែពេលនេះមានជំនាញអង្គការវ៉ាយអេត បានដឹកនាំកម្លាំងចម្រុះ ចុះស្រាវជ្រាវជាសម្ងាត់ ទើបអាចចាប់បង្ក្រាបបាន ដោយជោគជ័យនៅពេលនេះ៕ ដោយ ៖ សមុទ្រឈើ